TITO 2
2
Imahuan mana chagrushca yachanata yachachichun nishcami
1Chaimanta imahuan mana chagrushca yachanata canta yachachishca shinallataj yachachingui. 2Yuyaj c'aricunataca, alli yuyaiyuj, mana pugllarij, yuyaisapa, tucui shunguhuan crij, c'uyaj, mana p'iñarijcuna cachun yachachingui. 3Yuyaj huarmicunatapish alli cazuj, yangamanta mana juchachij, mana machaj cachun, ashtahuanpish allita yachachijcuna cachun yachachingui. 4Chashna cashpami, chairaj huarmicunataca paicunapaj cusacunata, huahuacunata c'uyaj, 5alli yuyaiyuj, mapa yuyai illaj, paicunapaj huasipi allicunata ruraj, alli shungu, paicunapaj cusacunatapish cazujcuna canata yachachingacuna. Chashna cajpimi, Taita Diospaj shimica mana c'amishca canga.
6Shinallataj chairaj c'aricunatapish alli yuyaiyujcuna cachun yuyachishpa rimai. 7Shujtajcuna ricushpa catichun canllatajpish tucuipi allicunata rurangui. Yachachinapipish tucui shunguhuan, ama pugllarishpa yachachingui. 8Mana juchachipaj sumaj shimicunahuan rimangui. Chashna cajpimi p'iñajca, pingarishpa cancunataca mana allicunami nishpa mana juchachi tucunga. 9Amopajta rurajcunataca paicunapaj amocunata cazujcuna cachun, tucui imapipish amo munashcata rurajcuna cachun, ama c'ariyajcuna cachun, 10ama shuhuacuna cachun, ashtahuanpish tucui imapipish alli nishcacuna cachun yuyachishpa rimai. Chaimi ñucanchijta Quishpichij Diospaj yachanaca, sumaj cashcata yachangacuna.
11Diosca tucui cai pachapi causajcunata quishpichingapajmi paipaj mana c'uyaipajta c'uyaitaca ricuchirca. 12Paimi ñucanchijtaca Diospaj tucushpa, cai pacha millai munaicunatapish saquishpa, cai causaipica alli yuyaihuan cashcata rurashpa, Diospajlla causachun yachachin. 13Chaimi ñucanchij jatun Dios Quishpichij Jesucristo sumaj cashcahuan shamunataca, ñucanchijca chai yuyailla cushijlla shuyacunchij. 14Tucui millaimanta llujshichishpa paipajlla pueblo cachun chuyayachishpa, paipajllata rurana yuyailla cajta rurangapajmi paillataj ñucanchijmanta curirca.
15Cantaca pi ama yanganchichun. Cai yachachishcacunahuanca ama manchashpa yuyachishpa sinchita rimangui.
Currently Selected:
TITO 2: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.