RUT 4
4
Booz runa Ruthuan cazarashcami
1Chai punllallatajmi Boozca, Belenman rishpa, chai puebloman yaicuna pungupi tiyarirca. Booz runa chaipi tiyacujpimi, pai tapusha nicushca familia runa chaita pasacujpi Boozca chai runataca:
–Jala tiyito uyai, caillapi tiyaripai– nijpi, chai runaca chaiman rishpa tiyarirca. 2Boozca chai pueblopi causajcunapaj chunga cunaj yuyajcunata cayamushpami, caipi tiyaripaichij nirca. Paicuna chaipi tiyarijpica, 3pai tapusha nicushca familia runataca:
–Moabmanta tigramuj Noemica, ñucanchij familia Elimelecpaj asha allpatami c'atucun. 4Chaitami caipi tucui tiyacujcunapaj ñaupajpi, ñuca pueblopaj cunaj yuyajcunapaj ñaupajpi can randichun yachaj chayachini. Can randisha nishpaca randi. Mana randisha nishpapish mana randinichu nishpa ñucaman huillapai. Shujtaj randinapajca pi mana tiyanchu. Canllami randi tucungui. Can mana randijpica ñucami randi tucuni– nijpi chai runaca:
–Ari randishami– nirca.
5Chaimi Boozca:
–Noemipaj allpata randishpaca, Moabmanta caj viuda Ruthuanpishmi chai punllallataj cazarana cangui. Chai huarmihuan cazarashpa huahuacunata charijpimi, Rutpaj ñaupa cusa japina cashca allpataca chai huahuacuna japinga– nirca.
6Chaimi chai familia runaca:
–Chai allpa mana ñucapajtaj cana cajpica, mana randisha ninichu. Ñuca huahuacuna japina cashcata ama chingachingapaj ñuca randina cashcataca, can randilla– nirca.
7Israelcunapurapica, ñaupa punllamantami shuj ricuchinata charircacuna. Maijanpish paipaj japina cashcata, mana cashpaca randina cashcata mana nishcata ricuchingapajca, paipaj pargateta llujshichishpami caishuj randisha nicujman cuna carca. Pai mana nishcata ricuchingapajmi Israelpica chashna ruraj carca.
8Chaimi c'uchulla familia runaca ñucaca mana randinichu, can randilla nishpa paipaj pargateta surcushpa Boozman curca.
9Chaipimi Boozca cunaj yuyajcunatapish, chaipi caj tucuicunatapish cashna nirca:
–Tucui cancunami ricucunguichij. Elimelecpaj, Mahlonpaj, Quelionpaj tucui imalla tiyashcataca Noemiman randishpami ñucaca japigrini. 10Mahlonpaj huarmi cashca Moabmanta caj Ruttapish ñuca huarmi cachunmi japini. Chai huarmipi huahuacunata charijpimi, Mahlón imallata japina cashcataca paicuna japijpi, paipaj familiapurapipish cai pueblo pungupi cajcunapajpipish paipaj shutica mana anchuchishca canga. Cunanca tucui caicunataca cancunami uyajcuna ricujcuna canguichij– nircami.
11Chai pueblo pungupi caj cunaj yuyajcunahuan cajcunapish cashnami nircacuna:
–Ari, uyajcuna ricujcunami canchij. Diosca Raquelman Leaman achca huahuacunata cujpimi, israelcunaca achcata mirarishcanchij. Chai shinallataj cambaj huarmi Rutmanpish achca huahuacunata cushca alli canman. Efrata nishca Belenpica cantaca tucuicuna alli nishca, achcata charij runami nishca cachun. 12Judapaj huarmi Tamarpaj churi Faresta achca huahuacunayujta rurashca shinallataj canmanpish Mandaj Dios cujpica, Ruthuanca achca huahuacunayuj tucushca alli canguiman– nircacunami.
13Chashnami Boozca Ruttaca paipaj huarmi cachun japishpa cazararca. Booz paipi chayarijpica, Mandaj Dios cujpimi, chichushpa shuj c'ari huahuata huacharca.
14Chai llajta huarmicunapish Noemitaca:
–Canta cuidangapaj huacharishca nietota cuj Mandaj Diostaca allimari cangui nicunchijmi. Cai huahuaca israelcunapurapica tucuicuna rijsishca, alli nishca cachun ninchijmi. 15Cai huahuami cambaj alma llaquihuan huañucujtaca cushichinga. Can yuyaj cajpipish, paimi cuidanga. Cambaj nueraca canta c'uyashcamantami cai huahuataca huachashca. Paica can canchis churicunata charishcatapish ashtahuan yalli allimari– nircacunami.
16Noemica chai huahuata japishpaca, paipaj rigrapimi huiñachirca. Paimi huiñachij mama tucurca.
17Chaimi c'uchullapi causajcunaca: –Noemica shuj c'ari huahuatami huachashca– nishpa chai huahuataca Obed shutita shutichircacuna. Paica Isaipaj yaya, Davidpaj abuelomi carca.
18Farespaj huahua huahuacunaca caicunami: Farespaj huahuaca Hezronmi. 19Hezronpaj huahuaca Rammi carca. Rampaj huahuaca Aminadabmi carca. 20Aminadabpaj huahuaca Naasonmi carca. Naasonpaj huahuaca Salmonmi carca. 21Salmonpaj huahuaca Boozmi carca. Boozpaj huahuaca Obedmi carca. 22Obedpaj huahuaca Isaimi carca, Isaipaj huahuaca Davidmi carca.
Currently Selected:
RUT 4: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.