SALMOS 2
2
SALMO 2
Mandaj Dios churashca mandajmi
1Llajtacunapi causajcunaca ¿ima nishpataj c'ariyashpa caparinacucuncuna?
¿Imamantashi manapish canata yuyarinacucuncuna?
2Cai allpapi caj jatun mandajcunapish jataringami.
Mandajcunapish tandanacushpa jatarishpami, Mandaj Diostapish, pai churashca mandajtapish:
3“Pai huatashcamanta cacharirishunchij, paipaj huascamanta cacharirishpa llujshishunchij” ningacuna.
4Jahua pachapi causajca paicunatapish asingami, Jatun Diosca paicunatapish chanzata rurangami.
5Chashna rurashpaca jatunta p'iñarishpami rimanga.
Pai p'iñarishcahuanca muspachingami.
6“Ñucapajlla caj Sión urcu jahuapi mandachunca ñuca churashca jatun mandajtami churarcani.”
7Mandaj Dios ñucaman ima nishcatami huillagrini:
“Paica ñuca huahuami cangui, cunanmi canmanca causaita cuni.
8Ñucaman mañailla can japina cashcataca llajtacunatami cusha.
Inti llujshinmanta, inti huashicuncama, tucui cai pachatami canman cusha.
9Paicunataca fierro varahuan p'aquingui.
Allpa mangata shina ñutungui” ninmi.
10Cunanca jatun mandajcuna alli yuyaita japichij. Cai pacha juezcunapish ñuca cunashcata uyaichij.
11Mandaj Diospajtaca manchaihuan ruraichigari.
Chujchushpa cushicuichigari.
12Pai p'iñarishpa cancunapaj causaita ama chingachichun paipaj churita alli nichij.
Pai p'iñarishpaca mana saquingachu.
Paipi shunguta churajcunaca cushichishcami canga.
Currently Selected:
SALMOS 2: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.