JUAN 11
11
Lázaro huañushcamantami
1María, Marta causan Betania pueblopica paicunapaj turi Lazaromi ungushca carca. 2(Chai ungushca Lazaropaj pani Mariami Mandaj Jesustaca mishquijllata ashnacujhuan chaquipi tallishpa paipaj ajchahuan chaquichirca). 3Chai panicunami Jesuspajmanca:
–Mandaj Jesús, can c'uyashca Lazaroca ungushcamari– nishpa huillachun cacharcacuna.
4Chaita Jesús uyashpaca:
–Chai ungüica mana huañunapajchu. Ashtahuanpish Taita Dios tucuita rurai tucuj cashcata ricuchinapajmi. Taita Diospaj Churipish chai ungüimantami jatunyachishca canga– nircami.
5Jesusca Lazarotapish, Martatapish, Mariatapish c'uyarcami. 6Lázaro ungushca cashcata uyashpapish, ishqui punllacamami, pai maipi cashca llajtallapitaj saquirirca. 7Chai q'uipami Jesusca yachacujcunataca:
–Jacuchij, cutin Judeaman– nijpi,
8yachacujcunaca:
–Yachachij, sarunllatajmi judiocunaca rumicunahuan shitashun nircacuna. ¿Cutinchu chaiman risha ningui?– nircacuna.
9Chaimi Jesusca:
–¿Manachu punllaca chunga ishqui horasta charin? Punllapi purijca, cai pachapaj luz achijyachicujpica mana ñitcanchu. 10Ashtahuanpish tutapi purijca, luz paipi mana tiyashcamantami ñitcanlla– nircami.
11Chashna nishca q'uipaca Jesusca:
–Ñucanchij c'uyashca Lazaroca dormicunmi. Paita rijchachinamanmi rigrini– nijpimi,
12paipaj yachacujcunaca:
–Mandaj Jesús, dormicushpaca alliyangallami– nircacuna.
13Chashna nishpaca Jesusca Lazaroca huañushcami nisha nircami. Ashtahuanpish paicunaca dormishpa samaricujllapimi, chashna nicun yuyarcacunami. 14Chashna yuyacujpimi Jesusca:
–Lazaroca huañushcatajmi– nishpa alli huillarca. 15–Ñucaca cancuna alli crij cachun ñuca mana chaipi cashcamantaca cushicunimi. Cunanca paipajman jacuchij– nircami.
16Shina nijpimi ishqui huacharishca Tomasca, caishuj yachacujcunataca:
–Shinashpaca, ñucanchijpish Jesushuan huañungapaj jacuchijlla– nirca.
Jesusca causachijpish causaita cujpishmi
17Jesús chayanapajca, Lazaroca ñami chuscu punllata jutcupi churashca cashca carca. 18Betaniaca, Jerusalenmanta mana carupichu carca. Quimsa kilómetro shinallapimi carca. 19Chaimantami Martata, Mariatapish paicunapaj turi huañushcamanta llaquilla cajpi cushichingapaj achca judiocuna shamushca carca. 20Martaca Jesús chayamun nijta uyashpami, tupanaman llujshishpa rirca. Mariaca huasi ucupimi carca. 21Martaca Jesustaca:
–Mandaj Jesús, can caipi cashca cajpica, ñuca turica mana huañunmanchu carca. 22Cunanpish Taita Diosta can mañajpica, imatapish Taita Diosca cuna cashcata yachanimi– nijpimi,
23Jesusca:
–Cambaj turica causaringami– nirca.
24Chashna nijpi Martaca:
–Huañushcacuna causarina punllapi paipish causarina cashcataca yachanimi– nijpimi,
25Jesusca:
–Ñucami causachijpish, causaiyujpish cani. Maijanpish ñucata crijca, huañushca cashpapish causaringami. 26Maijan causacujcunapish ñucata crijca, huiñaita manataj huañungachu. ¿Chaitaca cringuichu?– nircami.
27Chaimi Martaca:
–Ari, Mandaj Jesús. Ñucaca cantaca Cristo, cai pachaman shamuna cashca Taita Diospaj Churi cashcatami crini– nirca.
Lázaro huañushcamanta Jesús huacashcami
28Chashna nishca q'uipami Martaca paipaj ñaña Mariapajman rishpaca:
–Yachachijca caipimi, cantami cayacun– nishpa allijlla huillarca.
29Shina nijta uyashcahuan jatarishpami Mariaca Jesuspajman rirca. 30Jesusca chai uchilla llajtamanca, manaraj chayarcachu. Martahuan maipi tupashcallapitajmi cashca carca. 31Mariataca huasimanta callpashpa llujshishpa rijta ricushpami, paita cushichinaman shamushpa paipaj huasipi tiyacuj judiocunaca, jutcupimari huacagrin ninacushpa paita catishpa shamurcacuna.
32Mariaca Jesuspajman chayashpaca paipaj ñaupajpi cungurishpami:
–Mandaj Jesús, can caipi cashca cajpica, ñuca turica mana huañunmanchu carca– nirca.
33Chashna nishpa María huacajpi, paita catishpa shamuj judiocunapish huacajta ricushpa Jesuspish yallitaj llaquishpa llaquinachishpami, 34–¿Maipitaj paitaca churarcanguichij?– nijpi paicunaca:
–Mandaj Jesús, jacu ricungui– nircacuna.
35Jesuspish huacarcami. 36Chaita ricushpami judiocunaca:
–¡Riquichij, ima shinami Lazarotaca c'uyashca!– nircacuna.
37Chaipi cajcunamanta maijancunaca:
–Paica, ñahui mana ricujtapish alliyachircamari. Pai caipi cashpaca Lázaro ama huañuchunpish imallatapish ruranmanmi carca– nircacunami.
Lazarota causachishcami
38Jesusca cutinllataj yallitaj llaquirishpami Lazarota churashca jutcuman shamurca. Chai jutcuca, jatun rumihuan huichcashcami carca. 39Jesusca ña chayashpaca:
–Rumita anchuchichij– nircami. Shina nijpi Lazaropaj pani Martaca:
–Mandan Jesús, jutcupi churashcaca ñamari chuscu punlla, ashnacungamari– nijpi,
40Jesusca:
–Can crishpaca Taita Diosca tucuita rurai tucuj cashcata ricunguimi nishpa ¿manachu nircani?– nircami.
41Jesús chashna nijpica, huañushcata churashca jutcuta huichcashca rumita anchuchijpimi Jesusca jahuanta huichilla ricushpa cashna nirca:
–Yayitu, ñuca mañashcata uyashcamanta pagui ninimi. 42Ñuca mañashcata uyaracuj cashcataca yachanimi. Ashtahuanpish cai ñuca muyundijpi caj achcacuna can cachashca cashcata crichunmi chashnaca nini– nircami.
43Chai q'uipaca:
–¡Lázaro, chaimanta llujshimui!– nishpami sinchita caparirca.
44Shina nijpi chai huañushcaca chaquicunandij, maquicunandij maitushca, umatapish linsohuan pilluchishcami llujshimurca. Chaimi Jesusca:
–Pilluchishcacunata pascaichij purichun– nirca.
Jesusta huañuchingapaj yuyarinacushcami
(Mt 26.1-5; Mr 14.1-2; Lc 22.1-2)
45Jesús chashna rurajta ricushpaca, Mariata cushichinaman shamushca judiocunapuramantaca achcacunami Jesusta crircacuna. 46Cutin maijancunaca, Jesús imallata rurashcatami fariseocunaman huillagrircacuna. 47Chaimantaca curacunata mandajcuna, fariseocunapish, mandajcunapurallami tandanacurcacuna. Chashna tandanacushpaca:
–Cai runaca pi mana rurai tucuipajtamari achcata ruracun ¿imatataj rurashunri? 48Paita chashna rurashpa catichun saquijllapica, ñataj paita tucuicuna crinman, ñucanchij Taita Diospaj huasitapish Roma llajtamanta shamushpa urmachishpa shitanman, cai ñucanchij llajtatapish ñataj quichunman– nircacunami.
49Chashna nijpi tandanacushcapuramanta, chai huatapi curacunata mandaj Caifás curami cashna nirca:
–Cancunaca imata mana yachanguichijchu. 50Cai ñucanchij llajtapi tucui causajcuna huañunapaj randica, shuj runalla huañunamari ñucanchijpajca tucuimanta yalli alli. Chaitaca manamari yachanguichijchu– nircami.
51Shina nishpaca mana paipaj quiquin yuyaimantachu nirca. Ashtahuanpish chai huatapi curacunata mandaj cajpimi, llajtapi tucui causajcunamanta Jesús huañunataj cashcata Taita Dios huillachijpi chashna huillarca. 52Mana chai llajtallamantachu huañuna carca. Ashtahuanpish tucui cai pachapi urapi janajpi caj Taita Diospaj huahua cajcunata tandachingapajmi chashnaca huañuna carca. 53Chai punllamantami, Jesustaca huañuchinatajmi nishpa yuyarinacurcacuna.
54Chaita yachashpami Jesusca judiocunapaj paca pacalla puricushpaca, shitashca pamba c'uchulla llajtapi caj Efraín shuti puebloman rishpa, paipaj yachacujcunandij chaipi carca.
55Judiocunapajca Pascua fiestami chayamucurca. Chaimantami chai llajtacunamantaca, Pascua punllapi Taita Diospaj ñaupajpi alli ricuringapaj, imallata rurana cashcata rurangapaj achcacuna ñaupaman Jerusalenmanca huichiyarcacuna. 56Chai rijcunaca Jesusta mashcarcacunami. Taita Diospaj huasipi cashpapish:
–¿Imatataj yuyanguichij? ¿Cai fiestamanca shamungachu imashí?– nishpami, caishuj chaishuj tapunacurcacuna.
57Curacunata mandajcunapish, fariseocunapish Jesús maipi cashcata maijanpish yachashpaca, huillaj shamuchun paita japigringapaj nishpami, shuj mandashcata churashcacuna carca.
Currently Selected:
JUAN 11: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.