HAGEO 2
2
Diospaj huasitaca sumajta allichishca
1Canchis quillapaj ishqui chunga shuj punllapimi Mandaj Diosca, Dios ima nishcata huillaj Hageotaca cashna mandarca: 2“Judá llajtata mandaj Salatielpaj churi Zorobabelmanpish, Josadacpaj churi, curacunata mandaj Josuemanpish, tucui chaipi causajcunamanpish cashna ni: 3Sarunman cai huasi sumaj cashcata ricujcunapuramantaca, ¿maijan causacunguichijrajchu? ¿Cunanca ima shina cashcatataj ricunguichigari? ¿Cancunapaj ñahuipica, cai huasica ima mana tiyashca shinachu ricurin imatagari? 4Chaimanta cunanca, can mandaj Zorobabelpish, Josadacpaj churi, curacunata mandaj Josuepish, tucui cai llajtapi causajcunapish, cai huasita rurashpa catichijlla, ama saquirichijchu. Ñucaca, cancunahuannmi cani ninimi tucuita Mandaj Diosca. 5Shinallataj cancuna Egiptomanta llujshimucujpi, ima shinami shuj ruranata rurasha nircani, chashnallatajmi ñuca Espirituca cancunahuan canga. Chashna cajpica ama imata manchanguichijchu” ninmi. 6Tucuita Mandaj Diosca cashnapishmi nin: “Ñallami jahua pachatapish, cai pachatapish, mama cucha yacutapish, chaquishca allpatapish chujchuchisha. 7Shinallataj tucui llajtacunapi causajcunatapish chujchuchishami. Tucui llajtacunapi causajcuna shamuchun munashcami shamunga. Shinallataj cai huasitaca sumajyachishami” ninmi tucuita Mandaj Diosca. 8Shinallataj tucuita Mandaj Diosca, cashnapishmi nin: “Cullquipish, curipish ñucapajmi. 9Q'uipata rurashca cai huasica, ñaupaman rurashca huasitapish yalli sumajmari canga” ninmi tucuita Mandaj Diosca. “Caipica sumaj causaitamari churasha” ninpishmi tucuita Mandaj Diosca.
Mandaj Diosca israelcunataca paita mana cazujpi llaquichishcamanta
10Jatun mandaj Darío ishqui huatata mandacujllapitajmi, iscun quillapaj ishqui chunga chuscu punllapi, Mandaj Diosllataj pai ima nishcata huillaj Hageotaca cashna nirca: 11“Tucuita Mandaj Dios ñucaca cashnami nini: Cunanca curacunata cashna tapui: Mandashcapi nishca shina, 12shuj runaca Diospajlla ch'icanchishca aichata paipaj churanapi migllashpa apacungachari. Chai aichata migllashca churanapi tanda cashpa, aicha cusashca cashpa, vino cashpa, aceite cashpa, mana cashpaca ima shujtaj micuna cashpapish tuparishcallamanta ¿chaipish Diospajlla micuna tucungachu? nishpa tapui” nircami. Chashna tapujpica chai curacunaca: “Mana” nircacunami. 13Shina nijpipish Hageoca cashna tapurcarajmi: “Maijanpish huañushca aichapi tuparishpaca mapami tucun. Chashna tucushca jahua, Diospajlla caj chai micunacunapi tuparingachari. Pai tuparishca micunaca ¿mapachu saquirinman?” nishpa tapujpica, chai curacunaca: “Ari, mapatajmari saquirinman” nircacunami.
14Chashna nijpimi, Hageoca cashna nirca: “Mandaj Diosca cashnami nin: Ñuca ñaupajpica, cai runacunapish chashna mapacunallatajmi. Paicuna imata rurashcapish, paicuna ñucaman caipi imata cushcapish chashna mapallatajmi. 15Chashna cashcamantaca, Mandaj Diospaj huasita manaraj pircai callarishpa cunanmantapacha alli yuyarichigari. 16Manaraj caita ruranata callarishpaca, ¿imamantataj maijanpish ishqui chunga efa tiyana montón granota pallai callarishpaca, chunga efallata japij carcanguichigari? ¿Imamantataj pichca chunga puñu vino llujshina pajta uvata capishpapish, ishqui chunga puñullata vinotaca japij carcanguichigari? 17Ñucamari cancuna tarpushca granocunataca, jatun acapanahuan, ungüicunahuan, runduhuan chingachircani. Chashna rurajpipish, manataj ñucapajman cutirircanguichijchu” ninmi Mandaj Diosca. 18“Cancunaca cunanmantaca alli yuyarichigari. Diospaj huasitaca iscun quillapaj ishqui chunga chuscu punllapimi, rumicunata churashpa callaricunguichij. Cunan punllamanta cancunapaj shungupi alli yuyarichigari. 19Cancunapaj tarpuna muyucunaca p'utsacunapirajmi tiyacun. Uvapish, higocunapish, granadacunapish, olivo yuracunapish manaraj sisanllapishchu. Shina cajpipish cancunamanca cunan punllamantami allicunata cusha ninmi” nircami.
Mandaj Diosca Judá llajtata mandaj Zorobabelpaj allita rurasha nishcamanta
20Iscun quillapaj chai ishqui chunga chuscu punllallapitajmi cutinllataj Mandaj Diosca, Hageotaca cashna nirca: 21“Judá llajtata mandaj Zorobabelman cashna ni: Ñucaca jahua pachatapish, cai pachatapish chujchuchishami. 22Cai pachata mandajcunatapish, paicuna mandashpa tiyanatapish chingachishami. Macanacuna carretacunatapish, chai carretacunapi purij soldadocunatapish urmachishami. Shinallataj caballocunatapish, chai jahuapi tiyarishpa purij soldadocunatapish huañuchishami. Paicunapaj espadacunallahuantajmi caishuj chaishuj huañunacungacuna. 23Ñuca paicunata chashna llaquichicui punllacunapica, Salatielpaj churi ñucata servij can Zorobabeltaca, ñuca sellota churana sortijasta shinami huaquichisha. Ñucamari cantaca agllarcani. Ñucaca tucuita Mandaj Dios cashpami, chashna nini ni” nircami.
Currently Selected:
HAGEO 2: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.