HECHOS 4
4
Pedrotapish Juantapish mandajcunapuralla tandanacushcapajman pushashcami
1Chaipi cajcunaman paicuna chashna huillacujpirajmi, curacunaca Taita Diospaj huasita cuidajcunata pushajcunandij, saduceocunandij ñapish paicunapajman chayarcacuna. 2Jesucristohuan shujlla tucushca cashpallami huañushcacunapaj chaupimanta causarinaca tiyan nishpa yachachicujpimi p'iñarircacuna. 3Chaimi paicunata japishpaca ña chishi cashcamanta cayandij punllacama carcelpi churarcacuna. 4Chashna rurajpipish paicuna huillashcata uyajcunaca achcacunami crircacuna. C'aricunallami pichca huaranga shina carca.
5Cayandij punllaca llajtata mandajcuna, cunaj yuyajcuna, mandashcacunata quillcajcunapishmi Jerusalenpi tandanacurcacuna. 6Chaipica curacunata jatun pushaj Anás, Caifás, Juan, Alejandro, curacunata jatun pushajcunapaj tucui familiacunapishmi carca. 7Pedrota Juanta paicuna tandanacushcapaj ñaupajman pushamushpaca:
–¿Pi mandajpitaj, pipaj shutipitaj cancunaca tucui caicunataca ruranguichij?– nijpi,
8Pedroca, jucha illaj Espirituhuan junda cashpami cashna nirca:
–Llajtata mandajcuna, Israelcunata cunaj yuyajcuna: 9Cunan shuj ungushca runata alliyachishpa paipaj allita rurashcamantachu “¿ima shinataj paita alliyachircanguichij?” nishpa tapunguichij. 10Cancuna tapushcataca cancunapish, Israelpi tucui causajcunapish yachachun huillasha. Nazaretmanta Jesucristotaca, cancunami chacatashpa huañuchircanguichij. Cancuna huañuchijpipish Taita Diosmi paitaca huañushcacunapaj chaupimanta causachirca. Paipaj shutipi alliyachijpimi, cai runaca cancunapaj ñaupajpi alliyashca shayacun. 11Chai Jesustaca cancunaca huasita rurajcuna mana nishpa rumita shitaj shinami rurarcanguichij. Ashtahuanpish chai rumillatajmari huasita rurangapaj callaripi churana rumi tucushca. 12Ashtahuanpish pi shujtaj Quishpichijca mana tiyanchu. Cai pachapi causajcunata quishpichichunca Taita Diosca pi shujtajtaca mana cushcachu. Jesusllami quishpichi tucun– nircami.
13Pedropish, Juanpish mana manchashpa rimajta uyashpami mandajcunaca:
–¿Ima shinataj mana jatun yachanaman rishca yanga runacunaca chashna rimanchu imamí?– nishpami achcata mancharircacuna. Chashna nicushpapish paicunataca, Jesushuan purijcuna cashcatami yuyarircacuna. 14Chai alliyachishca runapish, Pedrohuan, Juanhuan shayacujta ricushpa paicunataca, imata mana ni tucurcacunachu. 15Chaimantami paicunataca mandajcunapuralla tandanacushcamanta llujshichishpa paicunapuralla parlanacushpa, 16cashna nircacuna:
–¿Imatataj cai runacunataca rurashun? Paicunaca pi mana rurai tucuipaj mancharinataca Jerusalenpimi rurashpa ricuchin. Tucui chaipi causajcunami chashna rurashcataca alli yachancuna. Chaimanta mana chashnachu rurashca nishpapish mana ni tucunchijchu. 17Shina cajpipish paicuna chashna ruracushcaca, ama ashtahuan yacharichun, cunanmanta pacha chai runapaj shutimantaca, ama piman huillachun manchachishunchij– nircacunami.
18Paicunata cayashpaca:
–Chai Jesús ima shina tucushcataca ñataj piman rimanguichijman, yachachinguichijman– nishpami mandarcacuna. 19Chaipica Pedroca, Juandijmi paicunamanca cashna cutichircacuna:
–Taita Diosta cazunapaj randica ¿cancunata cazunachu alli? Chaitaca cancunallataj Taita Diospaj ñaupajpi alli yuyarichij. 20Ñucanchij imallata ricushcata, uyashcata huillanataca mana saqui tucunchijchu– nircacunami.
21Paicuna pi mana rurai tucuipajta rurajta ricushpa, tucuicuna Taita Diosta allimari cangui nicushcamantami ima shina mana llaquichi tucurcacuna. Chaimantami chai runamantaca ñataj piman huillanguichijman nishpa manchachishca q'uipaca cacharishpa cacharcallacuna. 22Pi mana alliyachipajta alliyachishca runaca, chuscu chunga huatacuna yallitami charirca.
Mana manchashpa Jesucristomanta huillaj cangapaj mañashcami
23Mandajcuna cacharishpa cachajpi caishuj crijcunapajman shamushpaca, curacunata pushajcuna, cunaj yuyajcunapish imalla nishcatami tucuita parlarcacuna. 24Chaita uyashpaca, tucuicunami shuj yuyailla Taita Diostaca cashna nishpa mañarcacuna: “Tucuicunapaj jahuapi caj Jatun Dios, canca jahua pachata, cai pachata, mama cuchata, chaicunapi tucui imalla tiyajcunatapish ruraj Taita Diosmi cangui. 25Cambajta ruraj Davidtami cashna huillachircangui:
“Mana judiocunaca ¿ima nishpataj p'iñarincuna?
Llajtapi cajcunapish ¿ima nishpataj yangata yuyancuna?
26Cai pachata jatun mandajcunapish, llajtacunata mandajcunapish Jatun Diostapish, pai cachashca Cristotapish p'iñashpami shuj yuyailla tandanacun” nishcami.
27Chashna nishca shinallatajmi cai pueblopica, Herodesca, Poncio Pilatohuan, israelcunaca mana israelcunahuan tandanacurcacuna. Paicunaca Quishpichij cachun churashca cambaj jucha illaj Churi Jesusta p'iñashpami, shuj yuyailla tucurcacuna. 28Can ñaupaman chashna rurasha nishpa yuyarishca shinallatajmi, paicunaca rurarcacuna. 29Jatun Dioslla cunanca paicuna manchachishun yuyashpa jarcashcata ricuhuai. Ñucanchij cambajta rurajcunataca, canmanta huillangapaj imatapish mana manchana yuyaita cuhuai. 30Quiquinca tucuita rurai tucuj cashcahuan ñucanchijtaca ungushcacunata alliyachijcunata, ricuchinacunata rurajcunata, pi mana ruraipajta rurajcunata cambaj Churi Jesushuan rurahuai” nishpami mañarcacuna.
31Chai q'uipaca, paicuna tandanacushpa tiyacun huasimi chujchurca. Paicunaca tucuicunami jucha illaj Espirituhuan junda carcacuna. Chashna cashpami Taita Diospaj Shimitaca mana manchashpa huillarcacuna.
Tucui ima charishcacunapish tucuicunapajmi carca
32Crijcunaca tucuicunami shuj shungulla, shuj yuyailla carcacuna. Pi mana “caica ñucapajmi, chaica ñucapajmi” nircachu. Tucui imalla charishcacunapish tucuicunapajmi carca. 33Mandaj Jesús causarishcata paicuna ricushcataca, jatun poderhuanmi apostolcunaca huillarcacuna. Mana c'uyaipajta c'uyaica, tucui paicunapaj jahuapimi yallitaj carca. 34Chaimantami paicunapurapica, maijanpish ima illaj mana carcacuna. Charijcunaca allpata, huasita c'atushpami chai cullquitaca apamujcuna carca. 35Chai c'atushca cullquitaca apostolcunapajmanmi apamurcacuna. Chaimi paicunaca imata mana charijcunaman chaupishpa curcacuna. 36Chipremanta José shuti levita runapish, paicunahuanmi carca. Paitaca apostolcunaca Bernabé nijcunami carca. (Bernabé nishcaca, “Cushichij” nisha ninmi). 37Chai runaca pai charishca allpata c'atushpami, cullquita apamushpaca apostolcunaman curca.
Currently Selected:
HECHOS 4: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.