2 TIMOTEO 4
4
Diospaj Shimitaca huillana horaspipish mana huillana horaspipish huillachun nishcami
1Mandaj Jesucristo mandanapaj shamushpaca, huañushcacunaman causajcunamanpish paicuna imalla rurashcatami ricuchinga. Chai Mandaj Jesucristopaj, Taita Diospaj ñaupajpimi canmanca mingani. 2Diospaj Shimitaca huillana horaspipish mana huillana horaspipish huillacuilla. Ima shina cashcatataj rimacuilla, sinchita cunacuilla, yuyachishpa rimaicuilla, ama p'iñarishpa yachachicuilla. 3Alli yachachinata mana uyasha nina punllacuna shamungami. Chaicunaca paicuna millaita rurashca shinallataj yachachichunmi yachachijcunataca jundachingacuna. 4Mana llullata uyanamantapish anchurishpami, yanga parlocunallata uyanachingacuna. 5Ashtahuanpish canca, tucuipi alli yuyaiyuj cai. Llaquicunatapish apai, alli huillaita huillashpa can rurana cashcataca pajtachi.
6Ñucaca Taita Diosman cushpa rupachinapaj animal shina ña huañunallami cani. Ñuca rina punllapish c'uchullapimi. 7Macanacuipica allimi mishashcani, callpashpa mishanacuitapish tucuchishcanimi, crishcatapish allimi cuidashcani. 8Chaimantami, cashcata ruraj cashcata ricuchij corona ñucapajca ch'icanchishca tiyacun. Chaitaca cashcata ruraj Mandaj Jesusmi shamuj punllapi cunga. Mana ñucallamanchu cunga, ashtahuanpish pai shamunata tucui c'uyajcunamanpishmi cunga.
Imalla rurana cashcata yachachishcami
9Ima shinapish ñucata ricunaman utca shamupai. 10Demas shuti runaca cai pachapi tiyajcunata munashcamantami, ñucallata saquishpa Tesalonicaman rirca. Crescenteca Galaciaman, Titoca Dalmaciamanmi rirca. 11Lucasllami ñucahuan caipi. Marcosta mashcashpa canhuan pushamui. Paica ñucahuan Diospajta ruranapajca allimi. 12Tiquicotaca, Efesomanmi cacharcani. 13Can shamushpaca, Troaspi caj Carpopaj huasipi saquimushca churanata, librocunata, ashtahuantajca quillcana caracunata apamungui.
14Fierromanta imatapish ruraj Alejandroca, ñucataca achcatami llaquichirca. Chaimantaca Mandaj Jesusmi, pai rurashca shinallataj cunga. 15Paica ñucanchij huillashcacunata ama uyachun ima shinapish jarcajmi carca. Canpish paimanta huaquichiringui.
16Mandajcunapaj ñaupajpi ñuca ima shina cashcata punta rimacujpica, pi mana ñucahuan carcachu. Ashtahuanpish tucuicunami ñucallata saquircacuna. Paicuna chashna rurashcataca Diosca ama yuyarishca cachun. 17Paicuna chashnajpipish, Mandaj Jesusca ñucahuanmi carca. Pai ñucaman fuerzata cujpimi, tucui mana judiocuna uyachun huillana cashca alli huillaitaca huillarcani. Paimi ñucataca leonpaj shimimanta quishpichirca. 18Mandaj Jesusmi tucui millaimanta quishpichinga. Chashna rurashpaca, jahua pacha paipaj mandacunpi cangacamami ñucataca huaquichinga. Paitaca huiñai huiñaita jatunyachishca cachun. Chashna cachun.
Tucuchingapaj alli canguichij nishpa Dios allicunata cuchun nishcami
19Aquilata paipaj huarmi Priscilata, Onesiforopaj huasipi cajcunatapish, alli cashca canguichij ninmi nipai. 20Erastoca, Corintopimi saquirirca. Shinallataj Trofimotaca, ungushcatami Militopi saquimurcani. 21Ima shinapish manaraj tamya punllacuna tucujpi shamui. Eubulo, Pudente, Lino, Claudia, tucui huauquicunapishmi cancunataca alli cashca cachun nincuna.
22Mandaj Jesucristoca cambaj espirituhuan cachun. Mana c'uyaipajta c'uyaj canapish cancunahuan cachun. Chashna cachun.
Currently Selected:
2 TIMOTEO 4: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.