2 TESALONICENSES 3
3
Diospaj Shimica jatunyachishca cachun nishcami
1Chaimanta huauquicuna, Mandaj Jesuspaj shimica cancunapurapi ima shina tucushca shinallataj shujtaj llajtacunapipish utca yachaj chayachijpi, alli nishca cachun ñucanchijmanta Taita Diosta mañaichij. 2Millai gentecunamanta Taita Dios huaquichichunpish ñucanchijmanta mañaichij. Crinataca mana tucuicuna crishun nincunachu. 3Ashtahuanpish Mandaj Jesusca tucui imatapish pajtachijmi. Paillatajmi cancunataca sinchiyachinga, millaimantapish huaquichinga. 4Ñucanchij mandashcataca cancunaca ruracunguichijmi, ashtahuan ruranguichijmi. Chaitaca Mandaj Jesús rurachicuna yuyaillami canchij. 5Cancunata Mandaj Jesusllataj cancunapaj shungucunataca Taita Diospaj c'uyaipi pushachun. Cristo shinallataj mana p'iñarij canatapish cuchun.
Trabajashpa causachun yuyachishpa cunashcami
6Ashtahuanpish huauquicuna, ñucanchijta Mandaj Jesucristopaj shutipimi cancunataca cashna mandanchij. Ñucanchij yachachishcata chasquishca shina mana purishpa, maipish cachun purij huauquicunamanta anchurichij. 7Ñucanchij ima shina yachachishcata, ima shina causashcata ricushpa causanataca ñami yachanguichij. Ñucanchijca cancunapurapica mana maipish cachun puricurcanchijchu. 8Ñucanchijca pipaj micunata yangamanta mana micurcanchijchu. Chaipaj randica, maijan cancunata ama p'iñachingapajmi punllapish tutapish chai yuyai, mana shaicushpa trabajarcanchij. 9Ñucanchijca chasquinatataj charishca cashpapish, cancuna ñucanchijta ricushpa chai shina catichunmi pita mana p'iñachircanchij. 10Ñucanchij cancunahuan cashpaca: Maijanpish mana trabajasha nijca ama micuchun nishpami mandarcanchij. 11Cancunapuramanta maijancunaca imapi mana trabajashpa, maipish cachun purishpa shujtajcunapajpi satiricuncuna nijtami cunanca uyanchij. 12Chashnacunataca ñucanchijta Mandaj Jesucristopaj shutipimi mandashpa, yuyachishpa rimanchij. Quiquin maquihuan trabajashcallata micuchun.
13Ashtahuanpish huauquicuna, cancunaca allita ruranataca ama shaicuichijchu. 14Cancunaman caita quillcashpa yachachishcacunata maijan mana cazujpaj shutitaca ricunallata charinguichij. Pai pingarichunca paihuanca ama tandanacunguichij. 15Ashtahuanpish paitaca ama p'iñanguichij. Chaipaj randica huauquita shina cunanguichij.
16Sumaj causaita cuj Mandaj Jesusllataj cancunamanca, tucuipi sumaj causaita cushpa caticuchunlla. Mandaj Jesusca tucui cancunahuan cachun.
17Cai tucui quillcataca Pablomi alli cashca cachun nishpa, rijsinallata ñuca quiquin maquihuan cashna quillcani.
18Ñucanchijta Mandaj Jesucristopaj mana c'uyaipajta c'uyaj canaca tucui cancunahuan cashca cachun. Chashna cachun.
Currently Selected:
2 TESALONICENSES 3: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.