2 SAMUEL 2
2
Judá llajtata jatun mandaj cachun Davidta churashcami
1Chai q'uipami Davidca Mandaj Diostaca:
–Judá llajtapi tiyaj ¿maijan pueblocunaman huichiyashachu?– nishpa tapujpi Mandaj Diosca:
–Huichiyailla– nirca.
Cutinllatajmi Davidca:
–¿Maimantaj huichiyasha?– nijpi Mandaj Diosca:
–Hebronman huichiyai– nirca.
2Chaimi Davidca, paipaj ishqui huarmicunata pushashpa rirca. Chai huarmicunamanta shujca, Jezreel pueblomanta caj Ahinoam shutimi carca. Caishujca Carmel pueblomanta Nabalpaj huarmi cashca Abigailmi carca. 3Davidca paihuan caj runacunatapish, paicunapaj huasi ucu familiandijmi pusharca. Paicunaca Hebronpi caj pueblocunapimi causarcacuna. 4Judá llajta runacuna shamushpami, Davidtaca aceitehuan churashpa Judá llajtata jatun mandaj cachun churarcacuna. Galaad llajtapi caj Jabes pueblopi causajcunami Saultaca pambarcacuna nishpami Davidmanca huillarcacuna. 5Chaimi Davidca Galaadpi caj Jabespi cajcunamanca: “Cancunapaj amo Saulta llaquishpa paita churanapaj jutcuta cushcamantaca Mandaj Dios cancunata alli nishca cachun nishpa huillachunmi huillajcunata cacharca. 6Cunanca Mandaj Diospish cancunata llaquishca cachun. Cancuna chashna rurashcamantaca ñucapish cancunapaj allicunataca rurashatajmi. 7Cancunapaj amo Saúl huañujpipish, fuerzarishpa c'ari c'ari sinchi maquicuna tucuichij. Judá llajtapi causajcunaca paicunata jatun mandaj cachunmi ñucataca aceitehuan churancuna” nircami.
Israelcunahuan Judá llajtapi causajcunahuan macanacushcami
8Saulpaj soldadocunata mandaj Abnerca, Nerpaj churimi carca. Paica Saulpaj churi Is-bosetta, Mahanaim puebloman pushashpa rishpami, 9Galaad, Gesuri, Jezreel, Efraín, Benjamín llajtacunapi causaj tucui israelcunata jatun mandaj cachun churarca. 10Saulpaj churi Is-bosetca israelcunata mandai callaringapajca chuscu chunga huatayujmi carca. Paica ishqui huatatami mandarca. Judá llajtapi causajcunallami Davidtaca catircacuna. 11Hebronpi cashpa Judá llajtata David mandashca punllacunaca canchis huata sujta quillacunami carca.
12Nerpaj churi Abnerca, Saulpaj churi Is-bosetpajta rurajcunandijmi Mahanaimmanta llujshishpa Gabaonman rirca. 13Sarviapaj churi Joabpish, Davidpajta rurajcunandij Hebronmanta llujshishpa rishpami, Gabaonpi caj yacu tanque c'uchupi Is-bosethuan tupanacurca. Chaipimi shujcunaca yacu tanque shuj ladoman, caishujcunaca chaishuj ladoman shayarircacuna. 14Chaipimi Abnerca Joabtaca:
–Cunanca ishquindij ladomanta mosocuna llujshishpa, ñucanchij ñaupajpi macanacuchun– nijpi Joabca:
–Shinashpaca macanacungapaj llujshichij– nirca.
15Shina nijpica, Saulpaj churi Is-bosetpaj partecunaca Benjaminpaj aillumantami chunga ishqui runacuna llujshircacuna. Davidpajta rurajcunamantapish chunga ishquillatajmi llujshircacuna. 16Paicunaca caishujmanta chaishujmanta uma ajchapi japinacushpami, caishujmanta chaishujmanta espadahuan costillaspi satinacurcacuna. Chashnami paicunaca tucuicuna shuj huañuita huañurcacuna. Chaimantami Gabaonpi caj chai pambataca, “Helcat-hazurimta” shutichircacuna. 17Chashna tucujpimi chai punllaca yallitaj p'iñarinacushpa caishuj soldadocunapish macanacushpa Abnertapish, israelcunatapish Davidpajta rurajcuna misharcacuna. 18Chaipica: Sarviapaj Joab, Abisai, Asael quimsa churicunapishmi carca. Chai Asaelca urcupi purij tarugapaj chaquicuna shina yallitaj callpaj chaquicunayujmi carca. 19Chashna cashpami Asaelca, alli ladomanpish lluqui ladomanpish mana anchurishpa Abnertaca catirashpa rirca. 20Abner huashaman tigralla ricushpaca:
–¿Canca Asaelchu cangui?– nijpi Asaelca:
–Ari, ñucami cani– nirca.
21Chaimi Abnerca:
–Alli ladota cashpa, lluqui ladota cashpa rishpa caishuj soldadocunata catishpa paicuna ima charishcacunata quichushpa ñucataca ama catichu– nirca.
Shina nijpipish Asaelca, paita catinataca mana saquircachu. 22Chaimi Abnerca cutinllataj Asaeltaca:
–Ñucata catinataca saqui. Maitataj cantaca huañuchishari. Cambaj huauqui Joabhuanca ¿ima shinataj ñahui ñahui tupashari?– nirca.
23Manataj saquijpimi, Abnerca Asaeltaca paipaj lanza huasha lado puntahuan pechopi satijpi lanzaca huashaman pasarca. Chaimi Asaelca chaillapitaj urmashpa huañurca. Asael huañushca siricun chaita rijcunaca tucuicunami paita ricushpa shayarircacuna. 24Joabpish, Abisaipish Abnertaca ashtahuanmi catishpa rircacuna. Ña inti huashicucuitami, Gía pueblo ch'imbapurapi caj Amma urcuman chayarcacuna. Chai urcuca, Gabaonman rina shitashca pamba ñan c'uchullapimi carca. 25Chaipimi Benjaminpaj ailluca Abnerpaj huashapi tucui soldadocuna shuj shinalla tucushpa urcu puntapi shayarircacuna. 26Chai urcumantami Abnerca, Joabtaca:
–¿Macanacuica tucuicunata tucuchingacamachu caticungalla? Macanacui tucurishca huashaca jayaj llaqui canataca ¿manachu yachangui? Quiquin huauquicunallatataj catirashpa llaquichinata saqui nishpaca, ¿ima horacamataj ninguiyari?– nirca.
27Chaimi Joabca:
–¡Taita Diosca causajmi! Can mana chashna nishca cajpica, ñuca gentecunaca caya tutamantacama paipaj huauquicunata catinataca mana saquinmanchu carca– nirca.
28Chashna nishpa gachupi Joab tocajpica, tucuicuna chaillapi saquirishpa israelcunataca ña mana ashtahuan catirashpa llaquichircacunachu. Ña mana ashtahuan macanacurcacunachu. 29Abnerpish, paihuan cajcunapish chai tutaca tucui tutami Arabata rircacuna. Bitrón chaita Jordán yacuta ch'imbashpami Mahanaimman chayarcacuna.
30Joabca Abnerta catirashpa llaquichinata saquishpaca, tucuicunata tandachishpa ricushpaca, Davidpajta rurajcunamanta chunga iscun runacuna, Asaelpish illashcatami yachaj chayarca. 31Davidpajta rurajcunaca Abnerhuan caj Benjaminpaj aillutaca 360 runacunatami huañuchishca carca.
32Chai q'uipaca Asaelpaj aichata apashpaca Belenpimi paipaj yayata churashca jutcupi churarcacuna. Chai tutaca tucui tuta rishpami Joabpish, paihuan caj runacunapish pacarinapajca Hebronman chayarcacuna.
Currently Selected:
2 SAMUEL 2: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.