1 TIMOTEO 1
1
Allillachu canguichij nishcami
1Ñucanchijta Quishpichij Dios, ñucanchij shunguta churashpa caticushca Mandaj Jesucristopish mandashcamanta, Jesucristopaj apóstol Pablomi cani.
2Jesucristota crishcamantaca ñuca huahuataj caj Timoteomanmi quillcani: Ñucanchij Dios Yayapaj, ñucanchijta Mandaj Cristo Jesuspaj mana c'uyaipajta c'uyaj canapish, llaquij canapish, sumaj causaipish canhuan cashca cachun ninimi.
Pandata yachachijcuna yachachichunca ama saquingui nishcami
3Macedoniaman sarun rishpa, canta Efesopi saquiripai nishca shina, cunanpish chaillapitaj saquiripangui. Chaipi saquirishpaca, shujtaj shina yachachinataca ama yachachichijchu nishpa mandangui. 4Yanga parlocunata, ñaupa yayacunapaj mana yupaipaj shuticunatapish ama uyachun ningui. Chaicunaca rimanacuillapimi churan. Dios imata rurasha nishcataca crishpalla ruranapajca chaicunaca mana allichu. Chaicunata jarcachunmi mingani.
5Chuya shungumanta llujshishca c'uyaihuan c'uyanacushpa, ima mapata mana yuyashpa, ama nij tucujlla crijcuna cachunmi chashna mandani. 6Maijancunaca chaicunamanta anchurishpami, yanga shimicunata parlana yuyailla causacuncuna. 7Paicunaca mandashcata jatun yachachijcuna cashun nishpa yachachicushpaca, imata rimacushcatapish, chashnatajmi nishpa yachachicushcatapish, imata nisha nicushcataca manataj entendincunachu.
8Ashtahuanpish Mandashcapi nishcatataj yachachijpica, alli cashcatami yachanchij. 9Caita ricujpica: Mandashcataca cashcata rurajpajca mana cushcachu. Ashtahuanpish mandashcata p'aquijcunapajmi, mana cazujcunapajmi, Diosta mana rijsijcunapajmi, juchayujcunapajmi, chanzata rurajcunapajmi, yangata rurajcunapajmi, yaya mamata huañuchijcunapajmi, shujtajcunata huañuchijcunapajmi, 10huainayajcunapajmi, c'aripura millaita rurajcunapajmi, gentecunata shuhuajcunapajmi, llullashpa llaquichijcunapajmi, alli yachanata jarcajcunapajpishmi cushca cashca. 11Sumaj Dios alli huillaita huillachun ñucaman mingashca alli huillaimi chaitaca yachachin.
Pablotaca Diosca paipajta ruraj cachun churashcami
12Ñucanchijta Mandaj Cristo Jesustaca, ñucata sinchiyachishpa, alli crij cashcata ricushpa paipajta rurachun churashcamantami pagui nini. 13Ñaupaca ñucaca Diosta c'amij, catirashpa llaquichij, maipish cachun rimajmi carcani. Chaicunataca mana yachaj, mana crij cashpa, chashna ruracujpipish Diosmi ñucataca llaquirca. 14Ñucanchij Jatun Diosca paipaj mana c'uyaipajta c'uyaj canata, crinata, c'uyaitapishmi, Cristo Jesushuan shujlla tucujpi ñucapica yallijta tallirca.
15Tucuicuna alli nishpa, chasquinalla shimica caimi: Cristo Jesusca juchayujcunata quishpichingapajmi cai pachaman shamurca. Chaicunamanta yallica, ñucami yallitaj juchayuj cani. 16Chashna cajpipish Diosmari ñucataca llaquishpa chasquirca. Dios llaquij cashcatami, Jesucristoca ñucapi ricuchirca. Ñuca ima shina cajta ricushpa, q'uipata crina cajcuna huiñai causaita charichunmi chashna rurarca. 17Chaimantami huiñaita Jatun mandaj, mana huañuj, mana ricuipaj, shujlla yachaj Diostaca, alli nishpa, huiñai huiñaita sumajyachishca cachun nini. Chashna cachun.
18Cai mandashcataca huahua Timoteo, sarunmanmi Dios huillachijpi huillajcunaca canmantaca huillarca. Paicuna nishca shinallatajmi ñucapish mingani. Alli macanacuj soldado shina mishashpa, 19crishcatapish, alli yuyaiyuj canatapish cuidangui. Maijancunaca mana chashna rurashpami, yacupi huashicuj shina crishcataca saquincuna. 20Himeneopish, Alejandropish chashna tucujcunapurapimi, Diosta ama c'amichunmi paicunataca Satanasman curcani.
Currently Selected:
1 TIMOTEO 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.