1 SAMUEL 3
3
Mandaj Dios Samuelta cayashcami
1Samuel mosoca Elí curapaj ñaupajpimi Mandaj Diospajta rurashpa causarca. Chai punllacunapica Mandaj Diosca, huaquinllapimi huillachij carca. Muscuipi shinapish huaquinllapimi ricurirca. 2Elica cashnami tucurca. Paipaj ñahui zuyuyashpa catijpimi mana ricui tucushpa paipaj causana ucupi siricurca. 3Samuelpish Diospaj arca maipimi tiyacun Mandaj Diospaj huasillapitajmi dormicurca. Diospaj huasipi japichishca pacaricuj lámpara manaraj huañujpimi, 4Mandaj Diosca:
–Samuel– nishpa cayajpi Samuelca:
–Caipimi cani– nishpa, 5jatarishcahuan Elí maipi canman rishpaca:
–Caipimi cani, ¿imapajchari cayarcangui?– nijpi Elica:
–Ñucaca mana cayashcanichu, cutin tigra siririgrilla– nijpi Samuel rishpaca sirirircallami. 6Mandaj Diosca cutinllataj Samuel nishpa cayajpimi, Samuelca jatarishcahuan Elí maipi cashcaman rishpaca:
–Caipimi cani. ¿Imapajchari cayarcangui?– nijpi Elica:
–Ñuca huahualla, ñucaca mana cayashcanichu, cutinllataj siririgrilla– nirca.
7Samuelca, Mandaj Diostaca manaraj rijsircachu. Mandaj Diospaj rimaitapish manaraj uyajchu carca. 8Samueltaca Mandaj Diosca ña quimsa cutin cayajpimi, cutinllataj jatarishpa Elipajman shamushpaca:
–Caipimi cani. Imapajchari cayangui– nijpi Elica, moso Samueltaca Mandaj Dios cayacuna cashcata yuyashpa, 9cashna nirca:
–Rishpa siririgrilla. Cutinllataj cayajpica: Mandaj Dioslla, imata cashpapish huillahuailla, cambajta ruraj ñucaca uyacunimi ningui– nijpi Samuelca, pai siricushcaman tigrashpa sirirircallami. 10Mandaj Dios shamushpa shayarishpaca ñaupaman shinallatajmi:
–¡Samuel! ¡Samuel!– nishpa cayajpi Samuelca:
–Cambajta ruraj ñucaca uyacunimi. Imata cashpapish nihuailla– nirca.
11Chaimi Mandaj Diosca Samueltaca:
–Cai israelcunapurapica mancharinatami ruragrini. Chaita uyajcunapajca ishquindij rinrincunapimi uyaricujlla shina saquiringa. 12Chai punllapimi Elitapish paipaj huasi ucupuratapish llaquichisha nishcataca pajtachisha. Paipaj huasi ucupurata tucui imalla rurasha nishcataca callarimanta tucuringacamami tucuita tucuchisha. 13Elica, paipaj churicuna millaillata rurashpa ñucata yallitaj p'iñachicujta yachashca jahua, mana jarcashpa saquircallami. Chaimantaca paipaj huasi ucupurataca paicuna ima shina rurashcata ricuchishpami, huiñaicama llaquichisha. 14Chaimanta Elipaj huasi ucupuracunataca, paicuna millaita rurashcamanta sacrificiocunata cujpipish, imalla cuna cashcata cujpipish, manataj perdonashachu nircanimi– nirca.
15Samuelca pacaringacama sirishpa jatarishpaca, Mandaj Diospaj huasi pungucunatami pascarca. Samuelca muscuipi shina ricushcata, uyashcataca Eliman parlanataca mancharcami. 16Ashtahuanpish Elica Samuelta cayashpami:
–Samuel ñuca huahualla– nijpi paica:
–Caipimi cani– nirca.
17Chaimi Elica:
–Taita Diosca canmanca ¿imallatataj nircari? Pai imalla nishcataca ama imata pacashpa huillahuai. Can mana tucuita huillajpica, paillataj cantaca llaquichichun– nirca.
18Samuelca imata mana pacashpa tucuita huillajpimi Elica:
–Paica Mandaj Diosmi. Paipaj imamí alli chaita rurachun– nirca.
19Samuelca huiñarcami. Mandaj Diosca paihuanmi carca. Pai huillashca shimicunaca tucuimi pajtarca. 20Chaimi tucui israelcuna, Dan pueblomanta callarishpaca, Beerseba pueblocama Samuelca imatapish pajtachij, Mandaj Diospaj profeta cashcata yacharcacuna. 21Mandaj Diosca, Silo pueblopimi ricuricujlla carca. Chaipimi Samuelmanca pai imata rurasha nishcata huillarca.
Currently Selected:
1 SAMUEL 3: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.