Matiu 1
UBV77

Matiu 1

1
Orua ri Jesu Kristi
(Luk 3.23-38)
1Ọbe rẹ orua rẹ Jesu Kristi, ọmọ rẹ Devid; ọmọ rẹ Ebraham. 2Ebraham de vwiẹ Aizik, Aizik de vwiẹ Jekọp, Jekọp de vwiẹ Juda kugbe imoni rọye, 3Juda kọye ọsẹ ri Pẹrẹz kugbe Zera ri Tama vwiẹri, Pẹrẹz kọye ọsẹ ri Hẹzrọn, Hẹzrọn kọye ọsẹ ri Ram, 4Ram kọye ọsẹ rẹ Aminadab, Aminadab kọye ọse ri Nahshọn, Nahshọn kọye ọsẹ ri Salmọn. 5Salmọn kọye ọsẹ rẹ Boaz ri Rehab vwieri, Boaz kọye ọsẹ rẹ Obẹd rẹ Rutu vwiẹri, Obẹd kọye ọsẹ rẹ Jesse, 6Jesse kọye ọsẹ rẹ Devid rẹ ovie.
Devid kọye rha ọsẹ rẹ Solomọn rẹ aye rẹ Uraiya vwiẹ kẹ. 7Solomọn kọye ọsẹ ri Rẹhoboam, Rẹhoboam kọye ọsẹ ri Ahija, Ahija kọye ọsẹ rẹ Asa, 8Asa kọye ọsẹ ri Jehoshafat, Jehoshafat kọye ọsẹ ri Joram, Joram kọye ọsẹ rẹ Uzaiya, 9Uzaiya kọye ọsẹ ri Jotam, Jotam kọye ọsẹ rẹ Ahaz, Ahaz kọye ọsẹ ri Hẹzikaya, 10Hẹzikaya kọye ọsẹ ri Manase, Manase kọye ọsẹ rẹ Emọs, Emọs kọye ọsẹ ri Josaya, 11Josaya kọye ọsẹ ri Jekonaya kugbe imọni rọye, vwẹ ọke rẹ vwo mu ayen kpo imu vwi Babilọn.
12Re rhi vwo mu ayen kpo imu vwi Babilọn nu, Jekonaya ọsẹ ri Shitiẹl, Shitiẹl kọye ọsẹ ri Zerubabẹl, 13Zerubabẹl kọye ọsẹ rẹ Ahiud, Ahiud kọye ọsẹ rẹ Eliakim, Eliakim kọye ọsẹ Azọ, 14Azọ kọye ọsẹ ri Zadọk, Zadọk kọye ọsẹ rẹ Akim, Akim kọye ọsẹ rẹ Ẹliud, 15Ẹliud kọye ọsẹ rẹ Eleaza, Eleaza kọye ọsẹ ri Matan, Matan kọye ọsẹ ri Jekọp, 16Jekọp kọye ọsẹ ri Josẹf rẹ ọshare ri Meri, ro vwiẹ Jesu, re se Kristi.
Evwiẹ ri Jesu Kristi
(Luk 2.1-7)
17Ọtiọye na orua na ejobi nẹ Ebraham rhe ri te ọke ri Devid da dia ihwe-ẹne. Nẹ ọke ri Devid rhe ri te ọke rẹ emuo kpo Babilọn da dia orua ihwe-ẹne. Nẹ ọke rẹ emuo kpo Babilọn rhi te ọke ri Kristi da dia orua ihwe-ẹnẹ.
18Asakiephana enẹ e vwiẹ Kristi wan. Ọke ri Josẹf vwọ sa Meri rẹ oni ri Jesu phihọ otọ, yẹ ayen je rhe mroma-a, Meri da rhe mrevun rẹ Erhi Ọfuanfon; 19Josẹf rẹ oshare rọye na, da dia omamọ rẹ ohwo, ọ gbe guọnọ phọphọ-ọ, ẹkẹvuọvo ọ da guọnọ nẹ ọye bẹbẹ siobọ no. 20Ọke rọ vwọ jẹ iroro na, nighe amakashe rẹ Ọrovwohwo de bro rhe vwẹ evwerhẹ, ọ da ta kẹ, Josẹf rẹ ọmọ ri Devid, wọ djẹ oshọ-ọ, ra reyọ Meri rẹ aye wẹ na, kidie evun rọ mrẹre na ọ rẹ Erhi Ọfuanfon. 21O che vwiẹ ọmọ ku wo se odẹ rọye Jesu, fikiridie ọye che sivwi ihwo rọye nẹ umwemwu. 22Enana ejobi rhe phia, rere emu na ejobi vwọ gba, rẹ Ọrovwohwo wan unu rẹ emraro rọye ta:
23Nighe, ọmọtobẹ cha mrevun, ko vwiẹ ọmọshare, ke se odẹ rọye Immanuẹl, otọ rọye Ọghẹnẹ vẹ avwanre herọ. 24Josẹf de gbune rhọvwo, o de ru kirobo rẹ amakashe rẹ Ọrovwohwo ta kẹ, ọ da reyọ aye rọye kpo. 25Ayen ivẹ na mroma tavwe re ki vwiẹ ọmọ na-a; o de se odẹ roye Jesu.