JOB 22
22
Elifaz Jobta juchanchishcamanta
1Temanitapuramanta Elifazca:
2«¿Runaca Diospacca
ima allipac valingachu?
¿Jatun yachac cashpapish Diosmanca
allita ruhuai pudingachu?
3Can cashcata ruhuac cashcamantaca,
¿tucuita ruhuac Diosca
cushicungachu?
Can ima pandata mana ruhuac
cashcamantaca,
¿ima allita japingachu?
4¿Can allita caticushcamantachu
rimashpa taripacun yuyanguichu?
5Ashtahuanpish can millaita
ruhuashcacunaca yallita achcami.
Can mana allita ruhuashcacunaca
mana tucuripacmi.
6Cambac huauquicunamantaca
yangami prendata japircangui.
Churanata mana chariccunamantaca
churanatami quichurcangui.
7Shaicushca runamanpish
mana yacuta curcanguichu.
Yarcachicucpipish
mana micunata cararcanguichu.
8Achcata charic runalla,
allpatami japircangui.
Alli nishca runalla,
chaipimi causarcangui.
9Viuda huarmimanpish
imata mana cushpami
chushaclla maquita cacharcangui.
Taita mama illac huahuacunatapish
llaquichircanguimi.
10Chaimantami cambac muyundipi
llaquichiccunaca tiyan.
Cungailla llaquicuna
japishpami manchachinga.
11Yallita amsa cacpimi,
mana ricui pudingui.
Achca yacumi cantaca aguachicun.
12Diosca jahua pachamanta
ashtahuan jahua pachapimi tiyacun.
Lucerocunapish paimanta
urapimi cancuna.
Chaitaca ricuiyari.
13Shina cacpipish canca:
“¿Diosca imatatac yachanyari?
Yallita amsapica,
¿ima shinatac taripangayari?
14Jahua pachapi caiman
chaiman puricushpapish,
Puyu tapashca cacpica,
mana ricungachu” ninguimi.
15¿Millaita ruhuac runa
purishca ñanllatatacchu
canpish purisha ningui?
16Paicunaca manarac huañuna punzha
chayacpimi huañurcacuna.
Jatun yacu apashca shinami tucurirca.
17Paicunaca Diostaca:
“Ñucanchicmanta anchuri”
nicmi carca.
Tucuita ruhuac Diosca
ñucanchicmantaca,
¿Imatatac ruhuai pudinga? nircami.
18¡Achca charinacunatami
paicunapac huasipi jundachirca.
Shina cacpipish, ñucaca
mana paicuna shina yuyarisha ninichu!
19Cashcata ruhuaccunaca
chaita ricushpami cushicunga.
Mana faltayuc runacunaca:
20“Ñucanchicta piñaccunataca
tucuchishcami.
Paicuna ima charishcacunataca
ninami tucuchishca”
nishpami asingacuna.
21Cunanca Dios-huan alli tucuiyari.
Sumac causaitami charingui.
Chaimantaca allicunatami japingui.
22Cunanca paipac shimihuan
mandashcata uyaiyari.
Paipac shimicunata cambac
shungupi huacaichiyari.
23Tucuita ruhuac Diosman
cutirishpaca cutinllatacmi
sinchiyangui.
Cambac huasimantapish
millaitaca tucuimi anchuchingui.
24Curitami allpata yalli charingui
Ofir llactamanta curitaca,
yacu huaicu rumita
shinami charingui,
25tucuita ruhuac Diosmi
cambac curi shinaca,
cullquitaca achcatami charingui.
26Tucuita ruhuac
Dios-huanmi cushicungui.
Cambac ñahuihuanmi Diosta
huichailla ricungui.
27Can paita mañacpica uyangami.
Canpish paiman imata cusha nishcataca
pactachinguimi.
28Can imata munashcapish pactangami.
Can purina ñanpipish
luzmi achicyachinga.
29Jatun tucushcacunaca,
pingaichishcami canga.
Yangalla caccunataca
Diosmi jatunyachinga.
30Millaita mana ruhuac runataca
Paimi quishpichinga.
Cambac maquihuan ima millaita
mana ruhuashcamantami
cantaca quishpichinga» nirca.
Currently Selected:
JOB 22: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.