JOB 21
21
Job millaita ruhuaccunami allita causan nishcamanta
1Chaimantami Jobca:
2«Ñucata cushichingapac
ñuca rimashcata alli uyaichic.
3Quipata burlashpa asingapacpish
ñuca rimashcata sumacta uyaichic.
4¿Ñucaca runamanchu
aij nishpa huillacuni?
¿Ima nishpatac ñuca shungupica
mana llaquirisha?
5Ñucata ricushpa mancharishpa
saquirichicyari.
Shimita maquihuan tapaichicyari.
6Chaicunata yuyarishpaca
ñucallatacmi yallita mancharini.
Chaita yuyarishpami
ñuca cuerpopish
chucchuita charini.
7¿Ima nishpatac Diosta
mana manchaccunaca
yuyaccaman causashpa
ashtahuan charicyancuna?
8Paicunapac huahua huahuacunapish
paipac ñaupapimi sinchita huiñacun.
Paipac nietocunapish
paipac ladopimi causacun.
9Paipac huasipi causaccunaca
imatapish mana manchashpami
causancuna.
Paicunataca Diospish
mana llaquichinchu.
10Paipac torocunapish,
churiyuc torocunami.
Vacacunaca mana shullushpami huachan.
11Paipac uchilla huahuacunapish
ovejacuna shinami callpacuncuna.
Paipac churicunaca
jahuata saltashpami purincuna.
12Paicunaca tamborapi,
arpapi tocashpami cantancuna.
Flautapi tocashpami cushicuncuna.
13Tucui punzhacuna
cushilla causashpami
huañushpapish sumacta
Seolman urai rincuna.
14Chashna causashpami Diostaca:
“¡Ñucanchicpac ñaupamanta anchuri!
Can imata ruhuachun nishcacunataca
mana yachacushun ninchicchu.
15Servingapacca,
¿pitac tucuita ruhuac Diosca?
¿Paita mañashpaca imatatac
japishun?” nincuna.
16Riquichic, Dios cushca allicunaca
mana paicunapac maquipichu.
¡Amatapish ñucaca
paicuna shina yuyaricusha!
17¿Mashna cutinta Diosta
mana manchaccunapac
lamparataca huañuchishca?
¿Mana cashpaca paicunataca
llaquicuna japishcachu?
¿Mana cashpaca Dios nina japiric shina
piñarishpa tucuchishcachu?
18Paicunaca huaira apanalla
ucsha shina, mana cashpaca jatun
huaira apanalla tamo shinami.
19Diosca taitacunapac juchamantaca
churicunatami llaquichingapac
charicun nincunami.
¡Juchata ruhuacllatacmi
llaquita apana can!
¡Chashna ruhuacpimi yuyaita japinga!
20¡Paipac ñahuillahuantacmi
paipac llaquitaca ricunga!
Tucuita ruhuac Dios yallita
piñarishcataca ubiac shinami
chasquinga.
21Paipac causanaca
asha quillacunallami tiyan.
Pai huañushca quipa
paipac familia ima tucunataca
¿imatac yachangayari?
22Diosca jahua pachapi
causaccunata taripacmi.
Shina cacpica, ¿pitac paitaca
yachachi pudingayari?
23Shuc runa sinchirac cashpapish,
sumacta causacushpapish,
cushilla causacushpapish,
24huira runa cashpapish
paipac tullucuna
ñutcu junda cashpapish huañungami.
25Caishucca mana cushilla
causashpa, causaipi mana
cushicushpami huañunga.
26Shina cashpapish
ishcaitacmi allpaman rin.
Ishcaipitacmi curucunapish jundan.
27Ñucaca cancuna ima yuyacushcata,
ñucata piñashpa,
juchanchigricushcatapish yachanimi.
28Cancunaca: “¿Mandacpac
mandana huasica maipitac?
¿Diosta mana manchaccunapac
huasicunaca maipitac?” ninguichicmi.
29Cancunaca ñanta pasaccunataca,
¿manachu tapushcanguichic?
Paicuna cutichishpa:
30‘Millaita ruhuac runaca
llaqui punzhapica
mana ima tucungachu.
Dios piñaric punzhaca
huacaichishcami canga’
nishcataca, ¿manachu yuyaringuichic?
31¿Pitac pai mana allita
ruhuashcataca ñahuipi ricuchingayari?
¿Pitac pai imata ruhuashcamantaca
japina cashcata cungayari?
32Paitaca enterrana
jutcumanmi apanga.
Chai allpa montón jahuapimi cuidanga.
33Pai samarina pugru pambaca
mishquillami ashnacunga.
Chai huañushcata huandushpa ricpica,
achca gentecunami huashatapish,
ñaupatapish ringacuna.
34¿Ima shinatac cancunaca
yangalla rimashcacunahuanca
cushichinguichicyari?» nirca.
Currently Selected:
JOB 21: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.