JUECES 13
13
Sansón huacharishcamanta
1Israelcunaca cutinllatac Mandac Diospac ñaupapi mana allita ruhuai callaricpimi, Mandac Diosca chuscu chunga huatata filisteocunapac maquipi churarca.
2Zora pueblomantami Dan aillupuramanta Manoa runa tiyarca. Paipac huarmica huahuata mana chari pudic cashpami, mana sajuarirca. 3Mandac Diospac ángel chai huarmiman ricurishpaca:
«Canca mana huahuata chari pudicmi cangui. Shina cashpapish cunanca huicsayuc tucushpami shuc huahuata charigringui. 4Chaimanta cunanca ima machana yacutapish, vinotapish ama ubianguichu. Shinallatac ima mapayachic micunata ama micunguichu. 5Cunanca huicsayuc tucushpami, huahuata charigringui. Chai huahuataca acchatapish ama pitinguichu. Chai huahuaca mamapac huicsamanta pachami nazareo canga. Paimi israelcunataca filisteocunapac maquimanta quishpichinga» nirca.
6Shina nicta uyashpami chai huarmi cusapacman rishpaca:
«Diosmantami shuc runa ñucapacman shamurca. Pai Diospac ángel shina cacpimi manchashpa maimanta cashcatapish mana tapurcani. Paipish shutitaca mana huillarcachu. 7Shina cashpapish paica: “Riqui, canca huicsayuc tucushpami shuc cari huahuata charigringui. Chaimanta cunanca ima vinotapish, ima machana yacutapish ama ubianguichu. Shinallatac ima mapayachic micunatapish ama micunguichu. Chai huahuaca mamapac huicsamanta pachami huañungacaman nazareo canga” nircami» nirca.
8Chaimanta Manoa Mandac Diosta mañashpaca: «Ñuca Mandaclla, sarun cachashca cambac runata, chai huacharigricuc ñucanchic huahuata ima shina huiñachinata huillachun cutin cachaiyari» nirca.
9Manoa mañashcata uyashpami, Diosca cutinllatac paipac angelta Manoapac huarmi chagrapi cacpi cacharca. Shina cacpipish paipac cusa Manoaca mana paihuanchu carca. 10Chaimantami Manoapac huarmica utcashpa callpa rishpa paipac cusataca:
«¡Uyai, sarun punzha ñucaman ricurishca runami cutin shamushca!» nishpa huillarca.
11Shina huillacpimi cusaca jatarishpa huarmita catishpa, chaiman chayashpaca:
—¿Canchu sarun cai huarmihuan parlacca cangui?— nishpa tapurca.
Shina tapucpi chai runaca:
—Ari, ñucami cani— nirca.
12Shina nicpimi Manoaca:
—Can nishca shina pactacpica, ¿ima shinatac huahuaca causanga? ¿Imatatac ruhuana can?— nishpa tapurca.
13Shina nicpimi, Mandac Diospac angelca Manoataca:
—Huarmica tucui ñuca nishcatami, cazuna can. 14Uvasmanta ruhuashcataca imatapish ama micunguichu, vinotapish, machana yacutapish ama ubianguichu. Shinallatac imapish mapayachictaca ama micunguichu. Tucui ñuca mandashcatami pactachina can— nirca.
15Chaimantami Manoaca Mandac Diospac angeltaca:
—Ñucanchic manadamanta shuc chivota huañuchishpa, canman yanungacaman ashata shuyai— nirca.
16Shina nicpimi, Mandac Diospac angelca:
—Ñucata jarcacpipish cambac micunataca mana micushachu. Shina cashpapish chivota Mandac Diosman cushpa tucui rupachisha nishpaca, rupachilla— nirca.
Manoaca Mandac Diospac ángel cashcataca mana yacharcachu. 17Chaimantami Manoaca Mandac Diospac angeltaca:
—Can huillashca shina pactacpi canta alli ningapac, ¿ima shutitac cangui?— nirca.
18Shina nicpimi, Mandac Diospac angelca:
—¿Imapactac ñuca shutitaca tapungui? Ñuca shutica sumaimana shutimi— nirca.
19Manoaca paipac manadamanta shuc chivota apamushpami, asha harinahuan Mandac Diospac rumi jahuapi tucui rupachirca. Chaipimi angelca Manoapish, huarmipish ricucucpi, milagrota ruhuashpa ricuchirca. 20Diosman cushca altarpi nina culun nishpa huichai ricucpimi, Mandac Diospac angelca Manoapish, paipac huarmipish ricucucpi ninapi huichaiman rishpa chingarirca. Chaimantami paicunaca pambaman tuparicta cumurircacuna.
21Mandac Diosca Manoamanpish, paipac huarmimanpish mana ashtahuan ricurircachu. Chaimantami Manoaca Mandac Diospac ángel cashcata yachac chayarca. 22Shina yachashpami Manoaca paipac huarmitaca:
—¡Ñucanchicca Diostami ricushcanchic. Cunanca huañushunmi!— nirca.
23Shina nicpimi, Manoapac huarmica:
—Mandac Dios ñucanchicta huañuchisha nishpaca, ñucanchic cushpa tucuita rupachishcatapish, asha harinatapish mana chasquinmanchu carca. Shinallatac tucui caicunatapish, mana ricuchinmanchu carca. Shinallatac imatapish mana huillanmanchu carca— nirca.
24Chai huarmica shuc cari huahuata sajuarishpami, chai huahuataca Sansonta shutichirca. Chai huahua huiñacpimi, Mandac Diosca bendiciarca. 25Zora pueblohuan, Estaol pueblohuan tupanacuipi cac Danpac carpa huasipimi Sansontaca Diospac Espíritu japirca.
Currently Selected:
JUECES 13: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.