JUECES 12
12
Efraín aillucuna Jeftehuan macanacushcamanta
1Efraín aillucunaca tandanacushpami, Jordán yacuta pasashpa Zafón pambaman chayashpa Jeftetaca:
—¿Ima nishpatac amonitacunahuan macanacungapac rishpaca mana ñucanchicta cayashpa rircangui? Chaimantami huasitaca candi rupachigrinchic— nirca.
2Shina nicpimi Jefteca:
—Ñucapish, ñuca gentecunapish amonitacunahuan sinchita macanacushpa cancunata cayachun cacharcanimi. Shina cachacpipish cancunaca mana ayudac shamurcanguichicchu. 3Ña mana ayudac shamucpimi, ñucaca huañuna cacpipish huañushachari nishpa amonitacunahuan macanacugrircani. Shina macanacucpimi, Mandac Dios amonitacunata ñuca maquipi churarca. ¿Cunanca ima nishpatac ñucahuan macanacungapac shamunguichic?— nirca.
4Shina nishpami Jefteca tucui Galaad gentecunata tandachishpa, Efraín aillucunahuan macanacurca. Shina macanacushpaca Galaad gentecunami Efraín aillucunata atirca. Paicunaca: «Cai Galaad llactapi causacuc cancunaca Efraín aillumanta llucshi shamushpami, Efraín llactapac, Manasés llactapac chaupipi causacunguichic» nishca carca.
5Chashnami Galaad gentecunaca Efraín aillucunapac Jordán yacu ladopi tiyac allpacunata japirca. Chashna japishpami Efraín aillumanta puchushca miticushpa saquiric gentecunaca:
—Cai Jordán yacuta chimbaman pasachun saqui— nic carca.
Shina nicpica:
—¿Efrainpac aillumantachu cangui?— nic carca.
Shina tapucpi mana nicpica, 6shinashpaca:
—Shibolet ni— nicmi carca.
Cutin mana chai rimaita ni pudishpa: “Sibolet” nicpica, chai Jordán yacu ladollapitacmi pitinacushpa huañuchirca. Chai punzhaca Efraín aillucunaca chuscu chunga ishcai huaranga gentecunami huañurca.
7Jefteca sucta huatatami israelcunata mandashpa Galaad pueblollapitac huañurca. Shina huañucpica, chaillapitacmi enterrarca.
Ibzanpish, Elonpish, Abdonpish juez cashcamanta
8Jefté huañushca quipaca Belén pueblomanta Ibzanmi israelcunataca mandarca. 9Paica quimsa chunga churita, quimsa chunga ushitami charirca. Chai ushicunataca shuctac llacta gentecunahuanmi cazarachirca. Cutin churicunamanca quimsa chunga huarmicunatami shuctac llactamanta apamurca. Ibzanca canchis huatatami juez carca. 10Pai huañucpica, Belén pueblollapitacmi enterrarca.
11Chai quipaca Zabulón aillumanta Elonmi israelcunapac mandac carca. Paica chunga huatatami mandarca. 12Zabulonpac aillupuramanta Elón huañucpica, Zabulonpac llacta Ajalón pueblopimi enterrarca.
13Chai quipaca Piratón pueblomanta Hilelpac churi Abdonmi israelcunapac mandac carca. 14Paica chuscu chunga churita, quimsa chunga nietotami charirca. Paicunaca canchis chunga burrocunatami montangapac charirca. Paica pusac huatatami israelcunapac juez carca. 15Piratón pueblomanta Hilelpac churi Abdón huañucpica, Piratón pueblollapitacmi enterrarca. Chai puebloca Efrainpac llacta Amalecpac urcupimi carca.
Currently Selected:
JUECES 12: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.