PROVERBIOS 31
31
Jatun mandac Lemuel rimashcamanta
1Caicunaca jatun mandac Lemuel rimashcami. Dios huillashcata paipac mama paiman yachachishpaca:
2¡Ñuca huahualla!
¡Ñuca huicsamanta llucshishca
huahualla!
¡Ñuca munashca huahualla!
3Cambac fuerzataca
ama huarmicunapi tucuchichu.
Jatun mandaccunata tucuchic
ñanpica ama causanguichu.
4Lemuel-lla, jatun mandaccunaca
mana vinota ubianchu.
Mandaccunaca sidrataca mana ubianachu.
5Pacta chaicunata ubiashpa
mandashcacunata cungaringuiman.
Pacta llaquilla causaccunaman
allita ruhuanata cungaringuiman.
6Sidrataca
ña huañugricuccunaman cui.
Vinotaca llaquirishcacuna
ubiachun saquichilla.
7Chaita ubiashpami huaccha cashcatapish,
llaquilla cashcatapish
mana ashtahuan yuyaringa.
8Mana rimari pudiccunamanta
rimariyari.
Imata mana ruhuai pudiccunata
juchanchishpa llaquichigricucpi
misaiyari.
9Cambac shimihuan rimarishpa
cashcata ruhuashpa taripaiyari.
Huacchacunatapish, imata mana
chariccunatapish misaiyari.
Alli huarmita alli nishcamanta
10Yuyaisapa huarmitaca
¿pitac tari pudingayari?
Chashna huarmica achic nicuc
sumac rumitapish yalli valimari.
11Paipac cusapish
paipi shunguta churashpami causan.
Paihuanca ima illacpish
mana causangachu.
12Chai huarmica punzhantami
llaquichinapac randica,
allita ruhuashpa causan.
13Millmata, linota mashcashpami
cushicushpa paipac maquihuan
imatapish ruhuan.
14Jatun barco catunahuan shamuc shinami
micunata apashpa carumanta chayamun.
15Manarac achicyacpi jatarishpami,
paipac tucui familiamanpish,
paita servicmanpish micunata caran.
16Alli allpata ricushpa randishpami,
paipac maquihuan uvas chagrata ruhuan.
17Sinchita chumbillishpa,
paipac rigrata sinchiyachishpami
imatapish ruhuan.
18Ima shina caturicucta ricuranmi.
Paipac lamparapish tutaca
mana huañunchu.
19Shuc maquihuanca sicsicta,
caishuc maquihuanca piruruta
muyuchishpami puchcacun.
20Huacchacunamanpish,
imata mana chariccunamanpish
maquita chutashpami caran.
21Paipac tucui familiacunami
racu churanacunahuan purin.
Chaimantami rasucpipish paipac familia
chirichinataca mana manchan.
22Pullucunatapish paillatacmi ruhuan.
Paipac churanacunapish ashtahuan alli
linota ahuashca yana puca churanami.
23Pushac yuyaccunahuan
paipac cusa pueblo pungupi
tiyaricpica tucuimi ricsin.
24Baitacunata ahuashpami catun.
Catushpa, randishpa puriccunamanmi
chumbicunatapish achcata catun.
25Paica sumac churanata churarishca shinami
fuerzatapish charin, alli nishcapish can.
Quipa punzha ima tucunatapish
mana manchashpami asin.
26Paica alli yachac cashpami
imatapish riman.
Shinallatac cuyaihuanmi yachachin.
27Huasipi imapish alli cachunmi ricuran.
Paica mana yanga micushpalla causanchu.
28Paipac huahuacuna jatarishpaca:
“Cushicui mamita” nincunami.
Paipac cusaca:
29“¡Achca huarmicunami allita ruhuan.
Shina cashpapish canmi tucui paicunata
yalli alli cangui!” ninmi.
30Ñahuilla sumac cashpaca inquitanllami.
Ricuilla sumac cashcapish yangallami can.
Ashtahuanpish Mandac Diosta
manchac huarmimi alli nishca canga.
31¡Paipac maquihuan imata ruhuashcamantaca
paimanpish ima allicunata cuichicyari!
¡Pai imata ruhuashcataca
pueblo pungucunapi alli nichicyari!
Currently Selected:
PROVERBIOS 31: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.