NEHEMÍAS 2
2
Jatun mandac Artajerjes Nehemiasta Jerusalenmancachashcamanta
1Jatun mandac Artajerjes ishcai chunga huatata mandacucpimi, Nisán nishca quillapi jatun mandacpac ñaupapi vinota japishpa paiman curcani. Utcapica jaicapi paipac ñaupapica mana llaquilla cashcanichu. 2Chaimantami jatun mandacca:
—¿Ima nishpatac canca llaquilla cangui? Canca mana ungushcachu cangui, ashtahuanpish cambac shungupimi llaquita charingui— nirca.
Shina nicpimi, yallita manchaihuan 3jatun mandactaca:
—Jatun mandaclla, huiñaita causangui. Ñaupa ñuca taitacunata enterrashca puebloca shitashca pamba shinami, saquirishca pueblo pungucunatapish rupachishcami. Chaimantaca ¿Ima shinatac mana llaquilla cashayari?— nircani.
4Shina nicpimi, jatun mandacca:
—¿Imatatac ruhuachun ningui?— nirca.
Shina nicpimi, jahua pachapi causac Diosta mañashpa, 5jatun mandactaca:
—Can jatun mandacman alli cacpi, canta servic ñucapish cambac ñaupapi alli ricurishca cacpica, ñuca taitacunata enterrashca pueblota cutin allichigringapac Judá llactaman cachai— nircani.
6Shina nicpimi, paipac huarmi ladopi tiyacucpi jatun mandacca:
—¿Rinaca mashna punzhashi canga? ¿Ima horasta cutimungui?— nirca.
Shina nicpi, ñuca caiman ima horas cutimunata huillacpimi, jatun mandacca allimi rilla nirca. 7Shina nicpipish jatun mandactaca:
—Canman alli cacpica, Judá llactaman ñuca ricucpi, ama jarcachun jatun yacu chimba lado llactacunata mandaccunaman shuc quillcata cachai. 8Shinallatac Diospac huasi ladopi tiyac huasi pungucunata pueblo pircacunata, ñuca causana huasitapish ruhuangapac caspicunata cuchun, can jatun mandacpac sachacunata cuidac Asafman shuc quillcata cachai— nircani.
Mandac Dios ñucahuan cacpimi, jatun mandacca ari nircalla. 9Chai quipami ñucaca jatun yacu chimba ladota mandaccunapacman rishpa, jatun mandac cachashca quillcata curcani. Jatun mandacca soldadocunata mandaccunatapish, caballopi ric soldadocunatapish cacharcami. 10Israelcunata ñuca ayudangapac shamushcata yachashpami, horonitapuramanta Sanbalatpish, amonitapuramanta Tobiaspish yallita piñarirca.
Nehemías Jerusalén muyundi pircata ricushpa purishcamanta
11Jerusalenman chayashpa, chaipi quimsa punzhata cashpami, 12ñucaca tuta jatarishpa maijan runacunahuan rircani. Paicunamanca Jerusalenpi ñucata imata ruhuachun Dios yuyaita cushcataca mana huillarcanichu. Ñucallami caballopi montashca carcani. Shuctac caballocunaca mana tiyarcachu. 13Chai tutaca pugru pambaman llucshina punguta llucshishpami, Dragón jundu ladoman chayashpa, mapata shitana pungu ladocaman purishpa Jerusalén pircacunata urmachishcatapish, pungucunata rupachishcatapish ricurcani. 14Chai quipaca junduman llucshina punguta rishpami, jatun mandacpac jatun paila yacu ladoman cuchuyarcani. Ashtahuanpish ñuca montashpa ricuc caballohuanca mana pasaipacchu cashcarca. 15Jatun yacu ladota tuta huichai rishpami, muyundi jatun pircataca alli ricurcani. Chashna rishpami, pugru pambaman llucshina pungullatatac cutishpa yaicurcani.
16Shina cacpipish, quipa mandaccunaca ñuca maiman rishcatapish, imata ruhuashcatapish mana yacharcachu. Ñucaca Judá llacta runacunamanpish, curacunamanpish, alli nishcacunamanpish, quipa mandaccunamanpish, chaipi ima ruhuaccunamanpish manarac huillarcanichu. 17Chai quipami ñucaca:
—Jerusalén shitashca pamba shina tucushcamanta, pungucunata rupachishcamanta ñucanchic yalli llaquilla cashcataca cancunallatac yachanguichicmi. ¡Chaimanta pipish ñucanchicta ama burlachunca, Jerusalén pircacunata allichingapac shamuichic!— nircani.
18Dios paipac maquihuan ñucata ayudacushcatapish, jatun mandac ñucata imata nishcatapish ñuca huillacpimi paicunaca:
—¡Shinaca, allichi callaringapac jatarishunchic!— nircacuna.
Shinami caishuc chaishuc ashtahuan sinchiyashpa allichi callarircacuna. 19Ashtahuanpish Horón pueblomanta Sanbalatpish, jatun mandacta servic amonitapuramanta Tobiaspish, arabepuramanta Gesempish chaita uyashpami ñucanchicta asishpa burlashpaca:
—¿Cancunaca imatatac ruhuacunguichic? ¿Jatun mandacpac contrachu tucugringuichic?— nircacuna.
20Shina nicpimi paicunataca:
—Ñucanchictaca jahua pachapi causac Diosmi ayudanga. Shina ayudacpimi, paita servic ñucanchicca tucui jatarishpa cutin allichishun. Ashtahuanpish cancunaca Jerusalenpica imata ruhuanatapish, imata japinatapish, imata yuyarinatapish mana charinguichicchu— nircani.
Currently Selected:
NEHEMÍAS 2: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.