LEVÍTICO 3
3
Dios-huan alli tucuna ofrendamanta
1Maijanpish Mandac Dios-huan alli tucungapacca, mana ima tucushca huagrata, mana cashpaca vacatami cuna can. 2Chai huagra umapi paipac maquita churashpami, Dios-huan tupana huasi yaicunapi huañuchinga. Chai quipaca Aaronpac churi curacunami yahuartaca altar muyundipi chirapanga.
3Chai quipami Dios-huan alli tucungapac cushca huagratapish, huagra chunzhulli tapashca huiratapish, huicsapi tiyac huiratapish Diosman cushpa rupachinga. 4Shinallatacmi ishcai riñontapish, chaita tapashca huiratapish, lomo huiratapish, riñoncunapish, yana shungu jahua tapashca huiratapish, chunzhulli huiratapish llucchinga. 5Chaicunataca Aaronpac churi curacunami tucui rupachina ofrendahuan altar jahuapi rupachinga. Chaimi Mandac Diosmanca mishquilla ashnanga.
6Maijanpish Mandac Dios-huan alli tucungapac cari ovejata, mana cashpaca huarmi ovejata cashpaca mana ima tucushca alli animaltami cuna can. 7Cutin pactalla ovejata cushpaca Mandac Diospac ñaupaman apamushpami, 8chai oveja umapi maquita churashpa Dios-huan tupana huasi ladopi huañuchinga. Aaronpac churi curacunami chai yahuartaca altar muyundipi chirapanga.
9Mandac Dios-huan alli tucuna ofrendataca lomo tullu tucurinapi pitishpami chupatapish, chaipi tiyac huiratapish, chunzhulli tapashca huiratapish rupachina can. 10Shinallatac ishcai riñontapish, chaipi tiyac huiratapish, lomopi tiyac huiratapish, riñoncunatapish, yana shungu huirapish, chunzhulli huiratapishmi rupachinga. 11Chashnami curaca altar jahuapi rupachinga. Tucui chaicunaca Mandac Diosman cushpa rupachishcami canga.
12Chai ofrenda huarmi chivota cacpica, Mandac Diospac ñaupaman apamushpami 13chai chivopac umapi maquita churashpa, Dios-huan tupana huasi ñaupapi huañuchina can. Chai yahuartaca Aaronpac churi curacunami altar jahua muyundipi chirapanga.
14Chaimantami Mandac Dios-huan alli tucungapac cushca animaltaca rupachinga. Chunzhulli tapashca huiratapish, huicsapi tiyac tucui huiratapish, 15ishcai riñontapish, chaita tapashca huiratapish rupachinga. Chai riñoncunallahuanmi yana shungu huiratapish, chunzhulli tapashca huiratapish rupachinga. 16Chaicunataca curami altar jahuapi rupachinga. Chaicunaca micuna ofrendami canga. Chaicunata rupachishcami Diosmanca mishquilla ashnanga. Tucui chaicunaca Mandac Diosman cushcami canga.
17Cai mandashcacunaca huiñaipacmi canga. Maipi cashpapish cai mandashcacunata cazushcamantami huiratapish, yahuartapish mana micuna can” ningui» nirca.
Currently Selected:
LEVÍTICO 3: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.