JUECES 3
3
Canaán llactapi gentecuna saquirishcamanta
1Macanacunata manarac yachac Canaanpi causac israelcuna Diosta yuyaricta, mana yuyaricta ricungapac Mandac Diosca saquishca llactacunaca caicunami: 2Manarac macanacuita yachac israelcuna yachacuchun, shinallatac huahua huahuacunaman macanacunata yachachichunmi saquirca. 3Chai llactacunaca caicunami: Filisteocunamantaca pichca pushaccuna, tucui cananeocuna, Líbano urcu llactapi causac sidoniocunapish, heveocunapish cancuna. Paicunapac llactaca Baal-hermón urcumantaca Hamat pueblocamanmi carca. 4Chai llactacunataca israelcunapac taitacunaman Mandac Dios Moisesta huillachishca mandashcacunata pactachicta, mana pactachicta ricungapacmi saquirca.
5Shina cashcamantami israelcunaca cananeocunahuan, heteocunahuan, amorreocunahuan, ferezeocunahuan, heveocunahuan, jebuseocunahuan causarca. 6Chashna causashpami, israelcunaca paicunapac ushicunahuan cazararca. Shinallatac israelcunapac ushicunapish chai gentecunahuan cazarashpa, paicunapac diosta adorarcacuna.
Otoniel Cusan-risataimta atishcamanta
7Israelcunaca Mandac Diospac ñaupapi mana allita ruhuashpami paicunata Mandac Diosta cungarishpa Baal dioscunata, Aserami diosman ricchacunata servircacuna. 8Chaimantami Mandac Diosca nina japiric shina piñarishpa, israelcunataca Mesopotamia llactata mandac Cusan-risataimpac maquipi churarca. Chaipimi paicunaca pusac huatata servirca. 9Israelcuna chashna llaquita apashpa Mandac Diosta caparishpa mañacpimi, Mandac Diosca chai llaquimanta llucchirca. Chai llaquimanta llucchicca Cenazpac churi Calebpac quipa huauqui Otonielmi carca. 10Otonielca Mandac Diospac Espíritu japicpimi, israelcunapac juez tucushpa macanacungapac llucshirca. Mandac Diosca Siria llactata jatun mandac Cusan-risataimta paipac maquipi churacpimi, Cusan-risataimtaca atirca. 11Chashnami chai llactapi causaccunaca chuscu chunga huatata cushilla causarca. Quipataca Cenazpac churi Otonielca huañurcami.
Moabitacuna israelcunata llaquichicucpi Aod atishcamanta
12Israelcunaca cutinllatacmi Mandac Diospac ñaupapi mana allita ruhuai callarirca. Chaimantami Mandac Diosca israelcunata llaquichichun Moab llactata mandac Eglonta sinchiyachirca. 13Chai mandacca amonitacunata, amalecitacunata tandachishpami israelcunataca huañuchirca. Chashna atishpami, palmacuna tiyac pamba pueblotaca tucui japirca. 14Chaimantami israelcunaca chunga pusac huatata jatun mandac Eglonta servishpa causarcacuna.
15Chashna llaquita causacushpami israelcunaca Mandac Diosta caparishpa mañarca. Shina mañacpimi, Mandac Diosca chai llaquimanta llucchichun Benjamín aillumanta Gerapac churi imatapish lluquihuan ruhuac Aodta churarca. Paitami israelcunaca Moab llactata jatun mandac Eglonman shuc convidanata cugrichun cacharca. 16Aodca chaupi metro ishcai filoyuc espadatami ruhuashca carca. Chai espadatami paipac churana ucuta alli lado cinturapi huarcuchishpa rirca. 17Shina rishpami, Moab llactata mandac Eglonman convidanata cugrirca. Eglonca yalli huira runami carca. 18Mandac Eglonman convidanata cushca quipaca paihuan shamuc gentecunataca caya minchacaman nishpami cacharca. 19Ashtahuanpish ruhuashcalla dioscuna tiyac Gilgal pueblo cuchumanta cutishpami Eglontaca:
—Jatun mandaclla, canmanca shuc pacalla huillanatami charini— nirca.
Shina nicpimi paica:
—¡Upallai!— nirca.
Chai quipami, Eglonca tucui paihuan caccunataca canzhaman llucchichun mandarca. 20Rupai punzhacunapi llandurina ucupi mandac Eglón tiyacucpimi Aodca:
—Can jatun mandacmanca Diosmanta huillanatami charini— nirca.
Chashna nicpimi, Eglonca pai tiyacushcamanta jatarirca. 21Shina jataricpimi, Aodca lluqui maquihuan alli lado cinturamanta espadata llucchishpa huicsapi satirca. 22Shina saticpimi, espadaca cabondi huicsapi tucui yaicurca. Mandac Eglón yalli huira cacpimi, espada tucui pambarirca. Chaimantami Aodca espadata mana llucchishpa, chaillapitac saquirca. Shina cacpica mapapish llucshircami. 23Quipaca Aodca Eglón llandurina ucumanta llucshishpami, pungutapish huichcashpa, aldabashpa corredorman llucchirca.
24Aod llucchishca quipaca mandac Eglonta serviccuna shamushpami pungucuna huichcashca, aldabashca cacta ricurca. Chaita ricushpami:
«Cai llandurina ucullapitacmi jatun mandacca mapayachicunga» yuyarca. 25Chashnami unaicaman shuyacurcalla. Ña unaita shuyacushpallatacmi punguta mana pascacpi, llaveta japishpa, punguta pascashpa yaicurca. Shina yaicushpaca jatun mandac Eglón ucu pambapi huañushca siricuctami tarirca. 26Chashna paicuna shuyacucpica, Aodca ñami miticushpa callpashca carca. Paica Gilgal pueblo cuchullapi tiyac dioscuna tiyana pambata pasashpami Seirat pambapi miticurca.
Aod moabitacunata atishcamanta
27Aod chaiman yaicushpaca Efrainpac urcupimi cornetapi tocarca. Chashna tocacpimi, israelcunaca Aodhuan urcumanta urai shamurca. Paica israelcunata ñaupashpami shamurca. 28Chaipimi Aodca paicunataca:
«¡Ñucata catichiclla! Mandac Diosmi ñucanchicta piñac moabitacunata ñucanchic maquipi churashca» nirca.
Shina nicpimi, Aodta catishpa rishpaca Moab puebloman rina ñan Jordán yacupi chapashpa, pita mana pasachirca. 29Chai punzhapica macanacunata alli yachac alli sinchi chunga huaranga moabitacunatami huañuchirca. Shinami shucllatapish mana atichishpa tucui huañuchirca. 30Chai punzhapica moabitacunaca israelcunapac maquipimi yaicurca.
Chai quipaca pusac chunga huatatami cushilla chai llactapica causarca.
Filisteocuna israelcunata llaquichicucpi
Samgar llucchishcamanta
31Aod huañushca quipaca Anatpac churi Samgarmi sucta patsac filisteocunata huagrata tucsina puyahuan huañuchirca. Chashnami paipish israelcunataca chai llaquimanta llucchirca.
Currently Selected:
JUECES 3: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.