JUECES 10
10
Mandac Tola israelcunata mandashcamanta
1Abimelec huañushca quipaca Isacar aillupuramanta Fuapac churi Dodopac nieto Tolami israelcunata quishpichingapac jatarirca. Paica Efrainpac urcu Samir pueblomantami carca. 2Paica ishcai chunga quimsa huatatami israelcunata mandarca. Quipataca huañurcami. Shina huañucpimi Samir pueblollapitac enterrarca.
Mandac Jair israelcunata mandashcamanta
3Mandac Tola huañushca quipaca Galaad aillumanta mandac Jairmi israelcunata quishpichingapac jatarirca. Paica ishcai chunga ishcai huatatami israelcunata mandarca. 4Paica quimsa chunga churicunatami charirca. Chai churicunaca quimsa chunga burrocunapi montashpami puric carca. Shinallatac quimsa chunga pueblocunatami charirca. Chai pueblotaca cunancamanmi Jair pueblocuna nishpa cayan. Chai pueblocunaca Galaad llactapimi. 5Jair huañucpica, Camón pueblopimi enterrarca.
Mandac Jefté israelcunata mandai callarishcamanta
6Israelcunaca Baal, Astarot, Siria llacta, Sidón pueblopi tiyac, Moabpac, Amonpac churicunapac, filisteocunapac dioscunata servishpami Mandac Diosta piñachircacuna. Chashnami Mandac Diosta cungarishpa mana servircacuna.
7Chaimantami Mandac Dios israelcunahuan nina japiric shina piñarishpa filisteocunapac maquipi, shinallatac amonitacunapac maquipi churarca. 8Chai punzhapimi chunga pusac huatacunata yallita servichishpa llaquichirca. Jordán yacumanta chimbaman Galaadpi cac amorreocunapac llactapi causac israelcunatapish chashnallatacmi llaquichishpa charirca. 9Chai quipaca amonitacunaca Jordán yacuta pasashpami Judapac, Benjaminpac aillucunahuan, Efrainpac huasi ucu familiahuan macanacungapac rirca. Chashnami israelcuna mai llaquita aparca. 10Chaimantami israelcunaca Mandac Diosta caparishpa mañashpaca:
—Canta servinata saquishpa shuctac Baal dioscunata servishpami canta piñachishpa juchallishcanchic— nirca.
11Chashna mañacpimi Mandac Diosca:
—Cancunaca Egipto gentecuna, amorreocuna, amonitacuna, filisteocuna, 12Sidón gentecuna, amalecitacuna shinallatac madianitacuna llaquichicpica, ñucata mañarcanguichicmi. ¿Shina mañacpica manachu quishpichircani? 13Shina cacpipish cancunaca ñucata saquishpami, shuctac dioscunata servinguichic. Chaimantami cutinca mana quishpichisha. 14¡Cunanca cancunata cai llaquimanta quishpichichunca, cancuna acllashca dioscunata caparishpa mañagrichic!— nirca.
15Shina nicpimi, israelcunaca Mandac Diostaca:
—Ñucanchicca juchallishcanchicmi. Cunanca cambac allipac can munashcata ruhuailla. Shina cashpapish cunan punzhaca quishpichiyari— nircacuna.
16Shina nishpami paicunapac chaupipi tiyac dioscunata anchuchishpa Mandac Diosta servircacuna. Mandac Diosca israelcuna llaquita apacucta ricushpaca, paipish llaquirircami.
Jefté mandac tucushcamanta
17Amonitacunaca tandanacushpami Galaad llactapi carpa huasicunata shayachishpa tiyarirca. Cutin israelcunaca Mizpa pueblopimi tandanacushpa carpacunata shayachishpa tiyarirca. 18Galaad llactapi causac pushac israelcuna paicuna tapunacushpaca:
—Maijanpish amonitacunahuan macanacuita callarichicmi tucui Galaad llactapi causaccunata mandanga— nircacuna.
Currently Selected:
JUECES 10: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.