JUECES 1
1
Judá shinallatac Simeón aillucuna Adoni-bezertaprezushcamanta
1Josué huañushca quipami, israelcunaca Mandac Diostaca:
—¿Ñucanchicpuramanta cananeocunahuan macanacungapacca maijanta puntaca rina canchic?— nishpa tapurcacuna.
2Shina tapucpi, Mandac Diosca:
—Judá ailluracmi llucshinga. Chai llactataca paicunapac maquipimi churani— nirca.
3Shina nicpi, Judá ailluca paipac huauqui Simeonpac aillutaca:
—Ñucanchic japina cashca allpata japingapac, huichai rishpa, cananeocunahuan macanacugrishun. Chai quipaca, cancuna japina cashca allpamantapish macanacugringapac— nirca.
Shina nicpimi, Simeonca paicunahuan rirca. 4Judá aillu huichai rishpa macanacucpica, Mandac Diosmi cananeocunata, ferezeocunata paicunapac maquipi churarca. Chashna churacpimi, Bezec pueblopi macanacushpa chunga huaranga gentecunata huañuchirca. 5Bezec pueblopi jatun mandac Adoni-bezecta tarishpaca, paihuanpish macanacushpami cananeocunatapish, ferezeocunatapish misharcacuna 6Shina mishacpimi, Adoni-bezecca miticushpa callparca. Shina callpacpica cati rishpami, japishpa chaquimantapish, maquimantapish mama dedota pitircacuna. 7Shina piticpimi, jatun mandac Adoni-bezecca:
«Ñucami canchis chunga jatun mandaccunataca paicunapac chaquimanta, maquimanta mama dedota pitichircani. Shina ruhuashpaca ñuca micucpi, urmashcata micuchunmi miza ucupi churarcani. Paicunata ruhuashca shinallatacmi ñucatapish Diosca ruhuashca» nirca. Chai quipaca Jerusalenman apacpimi chaipi huañurca.
Judá aillu Jerusalentapish,Hebrontapish quichushcamanta
8Judá ailluca Jerusalenpi causaccunahuan macanacushpami, chai pueblota japishpa, chaipi causaccunataca espadahuan huañuchishpa pueblota rupachirca. 9Chai quipaca Judá ailluca urcucunapi, Neguev pambacunapi, Sefela pambacunapi causac cananeocunahuanmi macanacugrirca. 10Chaimanta rishpaca, Hebronpi causac cananeocunahuan macanacushpami, Sesai, Ahimán, Talmai mandaccunatapish huañuchirca. Utcapica Hebronca Quiriat-arba shutimi carca.
Jatun Mandac Otoniel Debir pueblota atishcamanta
(Jos 15.15-19)
11Cutin chaimanta rishpaca, Debir pueblopi causaccunahuanmi macanacugrirca. Utcapica chai puebloca Quiriat-sefer shutimi carca. 12Chai quipami Calebca:
«Maijanpish Quiriat-sefer pueblopi causaccunahuan macanacushpa mishacmanca ñuca ushi Acsatami paipac huarmi cachun cusha» nirca.
13Shina nicpica Cenazpac churi Calebpac quipa huauqui Otonielmi chai pueblopi causaccunahuan macanacushpa mishashpa chai pueblota japirca. Shina ruhuacpimi Calebca paipac ushi Acsata paipac huarmi cachun curca. 14Paihuan ricucpimi Otonielca paipac huarmitaca: “Cambac taita allpata cuchun mañai” nishpa, huarmitaca cunarca. Acsa burromanta uricucpimi Calebca:
—¿Imatatac ningui?— nirca.
15Shina nicpimi paica:
—Ñuca mañashcata uyaiyari. Neguev allpata cushpaca yacucunatapish cuiyari— nirca.
Shina nicpimi, Calebca yacu llucshicuc junducunataca jahuapipish, urapipish curca.
Judá, Benjamín aillucuna allpata quichushcamanta
16Moisespac suegro Ceneopac huahuacunami palmacuna tiyac pueblomanta Judá ailluhuan, Judá shitashca pambaman rirca. Chai pambaca Arad pueblo ladollapi cac Neguev pambami carca. Paicunaca chai gentecunahuanmi causangapac saquirirca.
17Judá ailluca paipac huauqui Simeón ailluhuan rishpami Sefatpi causac cananeocunahuan macanacushpa atishpa tucuchirca. Chaimantami chai pueblotaca Horma shutita shutichirca.
18Chashnallatac Judá ailluca Gaza pueblotapish, Ascalón pueblotapish Ecrón pueblotapish allpacunandimi japirca. 19Judá aillucunaca Mandac Dios paicunahuan cacpimi, urcucunapi causaccunata llucchishpa cacharca. Ashtahuanpish pugru pambapi causac gentecunaca fierro carretacunatami charirca. Chaimantami paicunataca mana llucchishpa cachai pudirca.
20Moisés nishca shinallatacmi Hebrón pueblotaca Calebman curca. Chai pueblomantami paica Anacpac quimsa churicunata llucchishpa cacharca.
21Shina cacpipish, Benjamín ailluca Jerusalenpi causac jebuseocunataca mana llucchishpa cachai pudircachu. Chaimantami jebuseocunaca Benjamín ailluhuan cunancaman chaillapitac causancuna.
Josepac aillu Bet-elta quichushcamanta
22Josepac huasi ucupuramantapish Bet-el pueblopi causaccunahuan macanacungapac huichai rircami. Mandac Diosmi paicunahuan carca. 23Josepac huasi ucupuracunaca pacalla ricuccunatami Bet-el pueblopi churarca. Utcapica chai puebloca Luz shutimi carca. 24Pacalla ricuccunaca chai pueblomanta llucshic runahuan tupashpami:
«Chai puebloman maita yaicuna cashcata ricuchi. Chashna ricuchicpica, cantaca mana huañuchishunchu» nirca. 25Chashnami chaipi causaccunataca espadahuan chugrichishpa tucui huañuchirca. Ashtahuanpish chai puebloman yaicunata ricuchic runataca paipac familiandimi imata mana ruhuashpa richun saquirca. 26Chai runaca heteocuna causana llactaman rishpami shuc pueblota ruhuashpa, Luz shutita shutichirca. Chai shutimi cunan punzhacaman can.
Manasés, Efreaín aillucuna allpata quichushcamanta
27Manasés ailluca Bet-seán, Taanac, Dor, Ibleam, Meguido pueblopi causaccunatapish, chai ladopi tiyac uchilla llactacunapi causaccunatapish mana llucchishpa cachai pudircachu. Chaimantami cananeocunaca chai llactallapitac causashpa catirca. 28Shina cashpapish israelcunaca ashtahuan mirashpa, achca tucushpami cananeocunamanta impuestota chasquishpa charirca. Paicunataca mana llucchishpa cachai pudircacunachu.
29Efraín aillupish Gezer pueblopi causac cananeocunataca mana llucchishpa cachai pudircachu. Ashtahuanpish paicunapac chaupillapitacmi Gezer pueblopi causarca.
Shuctac aillucuna allpata quichushcamanta
30Shinallatac Zabulón aillupish Quitrón pueblopi, Nahalal pueblopi causac cananeocunataca mana llucchishpa cachai pudircachu. Chai runacunaca paicunapac chaupillapitacmi impuestota cushpa causarca.
31Shinallatac Aser aillupish Aco pueblopi, Sidón pueblopi, Ahlab pueblopi, Aczib pueblopi, Helba pueblopi, Afec pueblopi, Rehob pueblopi causaccunataca mana llucchishpa cachai pudircachu. 32Aser aillucunaca chai llactapi causac cananeocunata mana llucchishpa cachai pudishpami, paicunallahuantac tandarishpa causarca. 33Neftalipac aillupish Bet-semes pueblopi, Bet-anat pueblopi causac cananeocunataca mana llucchishpa cachai pudishpami, paicunallahuantac tandarishpa chai llactapi causarca. Bet-semes, Bet-anat pueblopi causaccunaca impuestota cushpami causarca.
34Cutin Dan aillutaca amorreocunaca pugru pamba llactacunaman mana yaicuchun saquishpami urcucunallapi causachun saquirca. 35Chaimantami Heres urcupipish, Ajalón, Saalbim pueblopipish causarca. Shina cacpipish, Josepac huasi ucupuramanta mirarishpami amorreocunamantaca impuestota chasquishpa causarca. 36Amorreocunapac llactacunaca Acrabim urcuman rina huichaimanta, Sela pueblomanta huichaimanmi carca.
Currently Selected:
JUECES 1: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.