HAGEO 2
2
Diospac mushuc huasipi cushicunamanta
1Canchis quilla, ishcai chunga shuc punzhapi Mandac Dios pai ima nishcata huillac Hageoman huillashpaca: 2«Salatielpac churi Judá llactata mandac Zorobabelta, Josadacpac churi curacunata mandac Josueta, caishuc saquirishca gentecunataca: 3Ñuca huasi utcapi sumaimana cashcata ricuccunaca, ¿maijan causacunguichicchu? ¿Cunanca ima shinatac ricurin? ¿Manachu cai huasica utcapi ima shina cashcahuan ricucpica yangalla? 4Chaimanta Zorobabel-lla, Josadacpac churi curacunata mandac Josuella, sinchicuiyari. Tucui llactapi causaccunapish sinchicushpa, tucui shunguhuan trabajaichicyari. Ñucaca cancunahuanmi cani. Chaitaca Mandac Dios ñucami nini. 5Egipto llactamanta cancunata llucshicushpa, cancunahuan ari nishca shinallatacmi ñuca espirituca cancunapac chaupipi canga. Chaimanta ama manchanguichicchu. 6Cunanmanta asha punzhacuna quipaca jahua pachatapish, cai pachatapish, mama cuchatapish, chaquishca allpatapish chucchuchishami. 7Tucui llactacunapi causaccunatami chucchuchisha. Chashna ruhuacpimi, tucui llactacunapi causaccunaca sumac charishcacunata apamunga. Chaicunahuanmi cai huasipica sumacyachishca canga. 8Curipish, cullquipish ñucapacmi. Chaitaca imatapish ruhuac Mandac Dios ñucami nini. 9Cai quipa ruhuashca ñuca huasimi punta ruhuashca huasitapish yalli sumaimana canga. Caipica cushi causaitami cusha. Chaitaca tucuita Mandac Dios ñucami nini» ninmi.
Mandac Dios israelcunata llaquichinamanta
10Jatun mandac Darío ishcai huata, iscun quilla, ishcai chunga chuscu punzhata mandacucpi, Mandac Dios pai ima nishcata huillac Hageota huillachirca. 11Hageoca: «Tucuita Mandac Diosca: Curacunaman mandashcacunamanta tapushpaca: 12Maijan Diospaclla chicanyachishca aichata paipac churanacunapi micllashpa apacucpi, chai churana punta tandapi, cusashca aichapi, vinopi, aceitepi, mana cashpaca ima shuctac micunapi tuparicpica, ¿Diospaclla tucungachu? ningui ninmi» nirca.
Shina tapucpi, chai curacunaca:
—Mana— nirca.
13Hageoca:
—Maijan huañushcapi tuparishpa, chai micunacunapi tuparicpica, chaicunaca, ¿mapachu tucunga?— nirca.
Shina tapucpimi curacunaca:
—Ari, mapami tucunga— nirca.
14Shina nicpimi Hageoca: «Mandac Diosca: Chashnallatacmi cai llacta gentecunapish ñuca ñaupapica tucun. Chashna cacpica, paicuna imata ruhuashcapish, ñucaman imata cushcapish chashnallatacmi mapa tucun. 15Chaimanta cunan punzhamanta pacha, Mandac Diospac huasita manarac pircai callarishpa cancunapac shungupi allita yuyarichic. 16¿Imatac tucurcanguichic? Maijan ishcai chunga quintal caipac montonman shamushpaca, chunga quintal-llatami tarirca. Pichca chunga puñu vino llucshic uvasta cutana pushtuman apashpaca, ishcai chunga puñullatami llucchirca. 17Ñuca, cancuna tarpushca chagracunata rupac huairahuan, shuctac ungüihuan, runduhuan chingachicpipish, mana ñucapacman cutirircanguichicchu. 18Cunan punzhamanta pacha cancunapac shungupica allita yuyarichic. Cai iscun quilla, ishcai chunga chuscu punzhapi Mandac Dios ñucapac huasita ruhuashpa, rumicunata churai callarishca punzhamanta pacha cancunapac shungupi allita yuyarichic. 19¿Cancunapac tarpuna muyucunaca tiyanchu? Uvaspish, higopish, granadillapish, olivos yurapish manarac sisanchu. Ashtahuanpish cunan punzhamanta pachami bendiciasha» ninmi.
Mandac Dios Zorobabelmanallita ruhuasha nishcamanta
20Iscun quilla, ishcai chunga chuscu punzhapi Mandac Diosca cutinllatac Hageoman huillashpaca: 21«Judá llactata mandac Zorobabelta: Ñucaca jahua pachatapish, cai pachatapish chucchuchishami. 22Jatun mandaccuna mandashpa tiyanatapish urmachishami. Tucui jatun mandaccuna mandana llactacunatapish tucuchishami. Carretacunatapish, chai carretapi puriccunatapish urmachishami. Shina urmachicpimi, caballocunapish, caballopi ric soldadocunapish huañunga. Paicunapac espadallahuantacmi caishuc, chaishuc huañunacunga. 23Salatielpac churi ñucata servic Zorobabel-lla, chai punzhapimi ñucaca sellota churana sortejasta shina allichisha. Ñucami cantaca acllarcani. Chaitaca tucuita Mandac Dios ñucami nini ninmi ningui» nirca.
Currently Selected:
HAGEO 2: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.