ESDRAS 10
10
Mana Israel huarmicunata llucchishpa cachashcamanta
1Esdras Diospac huasi ñaupapi cungurishpa huacashpa, juchacunata huillashpa mañacucpimi, achca israelcuna caricunapish, huarmicunapish, huahuacunapish Esdraspacman cuchuyamurca. Chaipica achca gentecunami yallita huacacurca. 2Shina huacacucpimi, Elampac huahua huahuapuramanta Yehielpac churi Secaniasca Esdrastaca: «Ñucanchicca shuctac llacta huarmicunahuan cazarashpami, ñucanchic Diosta mana cazushpa juchata ruhuashcanchic. Chashna cashpapish israelcunapica alli tucuna yuyai tiyanracmi. 3Chaimanta cunanca, Dios mandashcata manchaccuna yuyashca shina, mandashcapi nishca shina tucui mana Israel huarmicunatapish, paicunapac huahuacunatapish llucchishpa cachangapac ñucanchic Dios-huan ari ninacushun. 4Jatari, canmi caita ruhuana cangui. Ñucanchicca canhuanmi cashun. Shina cashcamanta sinchiyai, caitaca utca ruhuailla» nirca.
5Shina nicpimi, Esdrasca jatarishpa curacunatapish, levitacunatapish, mandaccunatapish, tucui israelcunatapish, yuyarishca shina paicuna pactachichun ari nichirca. 6Chai quipami, Esdrasca Diospac huasi ñaupamanta Eliasib curapac churi Johanán curapac ucuman yaicurca. Chaiman yaicushpapish prezumanta cutimushcacuna juchata ruhuashcamantami mana micushpa, yacuta mana ubiashpa yallita llaquirishpa tiyacurca.
7Chai quipami prezumanta cutimushcacunataca Jerusalenman tandanacuchun nishpa, Jerusalenpipish, Judá llactapipish huillachirca. 8Mandaccuna, pushaccuna nishca shina quimsa punzhacaman mana tandanacucpica, paipac tucui allpacunata quichuchun, shinallatac prezumanta cutimushcapura tandanacuimanta llucchishpa cachachun nishpami huillachirca. 9Chaimantami manarac quimsa punzhapi Judapac, Benjaminpac aillucunaca iscun quilla ishcai chunga punzhapi Jerusalenpi tandanacurca. Tucui gentecunami Diospac huasi canzha pambapi paicuna mana allita ruhuashcamantapish, tamyamantapish chucchushpa tiyacurcacuna. 10Shina tiyacucpimi, Esdras cura shayarishpaca:
—Cancunaca shuc llactamanta huarmicunahuan cazarashpami, israelcunapac ashtahuan juchata ruhuashcanguichic. 11Cunanca, cancunapac ñaupa taitacunata Mandac Diosmanmi juchata huillana canguichic. Dios munashcata ruhuangapacmi cai llactapi causac gentecunamanta anchurishpa, shuctac llactamanta huarmicunamanta anchurina canguichic— nirca.
12Shina nicpimi, tucui tandanacushcacuna sinchita caparishpaca:
—Can nishca shinami ruhuashun. 13Ashtahuanpish gentecunaca achcami, punzhapish tamyami, maipi tiyarinatapish mana pudinchicchu. Achcacunami cai juchata ruhuashcanchic. Chaimanta chai ruhuanataca shuc punzhapi, ishcai punzhapica mana tucuchi pudishunchu. 14Caipi tucui tandanacushca canapac randica, ñucanchicta pushaccuna ñucanchicpac randi caipi saquirichun. Cutin ñucanchic pueblomanta, shuc llactamanta huarmicunahuan cazarashcacunaca ñucanchic pueblocunata pushac yuyaccunahuan, juezcunahuan cancuna cayashca punzhapi shamuchun. Ñucanchic mana allita ruhuashcamanta Dios ñucanchic-huan nina japiric shina piñarishca anchuringacamanmi chashna ruhuana— nircacuna.
15Shina nishcataca Asaelpac churi Jonatanhuan, Ticvapac churi Jahaziasllahuanmi mana allichu nircacuna. Paicunataca levitapuramanta Mesulam, shinallatac Sabetaimi alli nircacuna. 16Prezumanta cutimushcacunaca ima shina nishca shinallatacmi ruhuarcacuna. Chaimantami Esdras curaca ñaupa taitacunapac huasi ucupurata mandaccunata paicuna ima shina cashca shinallatac shutipi cayashpa acllarca. Paicunaca chunga quilla callari punzhapimi chai huarmicunata llucchishpa cachangapac taripai callarircacuna. 17Israelcuna shuctac llactamanta huarmicunahuan cazarashcata taripanataca caishuc huata callari quilla punta punzhapimi tucuchirca.
18Shuctac llacta huarmicunahuan cazarashca curacunapac churicunaca:
Josadacpac churi Jesuapac huahuacuna, paipac huauquicunamanta huahuamantaca Maasías, Eliezer, Jarib, shinallatac Gedaliasmi carca. 19Paicunami, paicunapac huarmicunata llucchishpa cachashun nishpa maquita cushpa, paicunapac manadamanta shuc cari ovejata juchamanta Diosman curcacuna. 20Imerpac huahua huahuamantaca Hanani, shinallatac Zebadiasmi carca. 21Harimpac huahua huahuamantaca Maasías, Elías, Semaías, Yehiel, shinallatac Uziasmi carca. 22Pasurpac huahua huahuamantaca Elioenai, Maasías, Ismael, Natanael, Jozabad, shinallatac Elasami carca.
23Levitacunamantaca Jozabad, Simei, Kelita nishca Kelaías, Petaías, Judá, shinallatac Eliezermi carca.
24Diospac huasipi cantaccunamantaca Eliasib, cutin Diospac huasi pungupi cuidaccunamantaca Salum, Telem, shinallatac Urimi carca.
25Shinallatac caishuc israelcunamanta Parospac huahua huahuacunamantaca Ramía, Jezías, Malquías, Mijamín, Eleazar, Malquías, shinallatac Benaiasmi carca. 26Elampac huahua huahuacunamantaca Matanías, Zacarías, Jehiel, Abdi, Jeremot, shinallatac Eliasmi carca. 27Zatupac huahua huahuacunamantaca Elioenai, Eliasib, Matanías, Jeremot, Zabad, shinallatac Azizami carca. 28Bebaipac huahua huahuacunamantaca Johanán, Hanaías, Zabai, shinallatac Atlaimi carca. 29Banipac huahua huahuacunamantaca Mesulam, Maluc, Adaía, Jasub, Seal, shinallatac Ramotmi carca. 30Pahat-moabpac huahua huahuacunamantaca Adna, Quelal, Benaía, Maasías, Matanías, Bezaleel, Binúi, shinallatac Manasesmi carca. 31Harimpac huahua huahuacunamantaca Eliezer, Isías, Malquías, Semaías, Simeón, 32Benjamín, Maluc, shinallatac Semariasmi carca. 33Hasumpac huahua huahuacunamantaca Matenai, Matatá, Zabad, Elifelet, Jeremai, Manasés, shinallatac Simeimi carca. 34Banipac huahua huahuacunamantaca Madai, Amram, Uel, 35Benaía, Bedías, Quelúhi, 36Vanías, Meremot, Eliasib, 37Matanías, Matenai, Jaasai, 38Bani, Binúi, Simei, 39Selemías, Natán, Adaía, 40Macnadebai, Sasai, Sarai, 41Azareel, Selemías, Semarías, 42Salum, Amarías, shinallatac Josemi carca. 43Nebopac huahua huahuacunamantaca Jeiel, Matatías, Zabad, Zebina, Jadau, Joel, shinallatac Benaiami carca.
44Tucui caicunami shuctac llactamanta huarmicunahuan cazarashca carca. Maijan huarmicunaca ñami huahuacunata charishca carca.
Currently Selected:
ESDRAS 10: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.