EZEQUIEL 2
2
Mandac Dios Ezequielta cayashcamanta
1Chashna rimashpaca: «Huañunalla runa, jatarishpa shayari. Canhuanmi parlasha nini» nirca.
2Shina nicucpimi, Diospac Espirituca ñuca shunguman shamurca. Chaitaca ñucata sinchiyachishpa jatarichicpimi uyarcani. 3Chaipi rimarishpaca: «Huañunalla runa, ñucami cantaca israelcunapacman cachani. Paicunaca ñucata mana cazushpami cariyarcacuna. Paicunapish, paicunapac taitacunapish cunan punzhacamanmi mana cazushpa causancuna. 4Ñucami cantaca piña ñahui, sinchi shungu runacunapacman cachani. Paicunataca: «Mandac Diosca cashnami nin» ningui. 5Paicunaca mana cazuc gentecunami. Shina cacpipish, tucui causaipi ñucamanta shuc huillac tiyashcata yachachunca, uyachunpish, mana uyachunpish paicunaman huillanguilla. 6Huañunalla runa, paicunaca mana cazuccunami. Shina cacpipish, ama manchanguichu. Paicuna rimashcatapish ama manchanguichu. Zarza casha chaupipi cashpapish, alacrancunapac chaupipi causacushpapish ama manchanguichu. 7Paicunaca mana cazuccunami, chaimanta uyachunpish, mana uyachunpish ñuca nishcataca huillacunguilla. 8Huañunalla runa, canca ñuca ima nishcata uyai. Canpish ama chai mana cazuccuna shina caichu. Ñuca imata carashcataca shimita pascashpa micuilla» nirca.
9Shinallatac pillushca quillcata maquipi japishpa ñucaman ricuchicuctami ricurcani. 10Chai quillcataca ñuca ñaupapimi pascarca. Chai quillcaca ñaupamanpish, huashamanpish quillcashcami carca. Chaipica yallita llaquipi cantana cantota quillcashcami carca.
Currently Selected:
EZEQUIEL 2: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.