1 PEDRO 2
2
1Chaimanta tucuilaya millaicunatapish, llullashpa crichinatapish, shuccuna shina casha ninatapish, mishqui shimi canatapish, shinallatac tucuilaya mana allita parlanacunatapish saquishpa, 2cunanlla huacharishca huahuacuna lechellata munac shina, imahuanpish mana chapushca, Dios rimashca shimillata yachanata munaichic. Chashna yachacushpami allita huiñashpa quishpiringuichic. 3Apunchic Jesús mai cuyac cashcata ña yachashcamantami, chaita ruhuana canguichic.
Cristoca causac rumi shina cashcamanta
4Apunchic Jesusman chayarichic, paica causac rumi shinami. Paitami gentecunaca mana valichishpa shitashca. Shina cacpipish, Diosmanca achca valic acllashca rumimi can. 5Chashna chayaricpimi, Dios causana huasipica causac rumicuna shinata, shinallatac Diospaclla cac curacunata Diosca ruhuanga. Jesucristomantami Diospac Espíritu yuyaita cucpi cancuna cushcaca, mishquilla ashnacuc shina cachun chashnaca ruhuanga. 6Shina cashcamantami Dios quillcachishcapica:
«Tucuimanta yalli
huasita callaringapac acllashca,
mai valishca Rumitami
Sión pueblopi churani.
Maijanpish chai Rumipi shunguta churacca,
mana pingaichishcachu canga» ninmi.
7Cancuna Cristota criccunamanca, paica mai valishcami can. Ashtahuanpish chaita mana criccunamanca, Dios quillcachishcapi nishca shinami pactashca. Chaipica:
«Huasita ruhuaccuna
mana nishca,
shitashca rumillatacmi,
huasita callaringapac
tucuimanta yalli
alli Rumica tucushca» ninmi.
8Shinallatac:
«Cai rumipimi
mitcarishpa urmangacuna» ninmi.
Paicunaca Dios rimashcata mana cazushcamantami mitcarincuna. Paicunaca chashna tucuchun nishcami cancuna.
Dios acllashcacuna cashcamanta
9Ashtahuanpish cancunaca Dios acllashpa chicanyachishcacuna, Jatun Mandacpacta ruhuac curacuna, Diospaclla cac gentecuna, shinallatac Dios munashpa paipacllatac ruhuashcacunami canguichic. Amsamanta sumac achic luz shina causaiman llucchic Dios ruhuashca sumaimanacunata huillachunmi, chashnaca ruhuashca. 10Cancunaca ñaupaca Diospac acllashcacunaca mana carcanguichicchu. Ashtahuanpish cunanca Diospac huahuacunami tucushcanguichic. Ñaupaca Dios mana llaquishcami carcanguichic. Cunanca Dios llaquishcami canguichic.
Diospacta ruhuaccuna shina causanamanta
11Cuyashca criccuna, cancunaca caru llactamanta shamushpa, causac shinallami cai pachapica canguichic. Shina cashcamanta cancunapac almahuan macanacucuc jucha munaicunamantaca huacaichiringuichic ninimi. 12Diosta mana cazuccunapac ñaupapica allita ruhuashpa causaichic. Shina causacpimi, cancunataca millaita ruhuaccuna nishpa juchanchishpapish, cancuna allita ruhuacushcata ricushpa Dios taripana punzhapica Diosta “allimari cangui” ningacuna.
13Apunchic Jesucristomanta cai pacha tucui mandaccunatapish cazuichic. Llactacunata jatun mandactapish tucuita yalli jatun mandac cashcamanta, 14shinallatac pai churashca mandaccunatapish cazuichic. Paicunatami mana allita ruhuaccunataca llaquichichun, shinallatac allita ruhuaccunataca “allimi cangui” nichun churarca. 15Imata mana yachac upacuna cancunata ama juchanchichunca, allita ruhuachunmi Diosca munan.
16Huatashcamanta cacharichishca shina caichic. Shina cashpapish chaipi achacarishpalla ama ima millaitapish ruhuaichicchu. Chaipac randica Diospacta ruhuaccuna shina causaichic. 17Tucuihuan alli caichic, criccunata cuyaichic, Diostaca manchaichic, shinallatac llactacunata jatun mandac-huanpish alli caichic.
Serviccuna imata ruhuana cashcamanta
18Serviccunaca, cancunapac amocunata tucui imapipish cazuichic. Ama cuyac, llaquic amocunallata cazuichicchu, ashtahuanpish mana alli amocunatapish cazunami canguichic. 19Dios munashca shina causacushpa, manapish llaquichina cacpi llaquichishca cashpaca, Diospac ñaupapica allitami ruhuanguichic. 20Cancuna ima mana allita ruhuashcamanta llaquichicpi, mana piñarishpa, llaquita apashpaca, ¿ima allitatac japinguichicyari? Allita ruhuashcamanta llaquichicpi, mana piñarishpa, llaquita apashpami, Diostaca cushichinguichic. 21Chai shina causachunmi Diosca cayarca. Cristoca pai llaquita apashca shinallatac cancunapish llaquita apachunmi, cancunamanta llaquita aparca. 22Cristoca ima juchata jaicapi mana ruhuarcachu, shinallatac pitapish mana umarcachu. 23Paita camicpipish, paica mana camircachu. Llaquichicpipish, paica mana llaquichircachu. Chaipac randica cashcata ricushpa, taripac Diosllatac llaquichichunmi saquirca. 24Ñucanchic juchata mana ruhuangapac huañushca shina tucushpa, cashcata ruhuashpa causachunmi, Cristollatac paipac cuerpopi ñucanchic juchacunata apashpa, cruzpi huañurca. Cancuna alliyachunmi, Cristoca chugririshca carca. 25Cancunaca chingarishca ovejacuna shinami ñaupaca puricurcanguichic. Shina cashpapish cunanca cancunata cuidashpa Michic Cristopacmanmi tigrarishcanguichic.
Currently Selected:
1 PEDRO 2: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.