1 JUAN 5
5
Cai pachapi millaita mishashcamanta
1Maijanpish Jesusta “Quishpichic Cristomi” nicca Diospac huahuami. Maijanpish Taitata cuyacca paipac huahuacunatapish cuyanmi. 2Diosta cuyashpa paipac mandashcacunatapish pactachishpaca, paipac huahuacunatapish cuyashcatami yachanchic. 3Maijanpish Diosta cuyacca pai mandashcatami pactachin. Pai mandashcacunaca pactachinallami can. 4Diospac tucui huahuacunami cai pachapi tiyac millaicunataca mishan. Apunchic Jesusta crishpami, cai pachapi millaitaca mishanchic. 5Maijanpish Jesusta Diospac Churi cashcata cricllami, cai pachapi tiyac millaicunataca mishan.
Jesucristomanta Diospac Espíritu huillashcamanta
6Apunchic Jesucristo shamushcataca yacupish, yahuarpish ricuchinmi. Mana pai bautizarishca yacullachu ricuchin, ashtahuanpish pai huañushca yahuarpish ricuchinmi. Cashcata nic Diospac Espiritullatacmi caicunataca ricuchin. 7Quimsacunami caicunataca huillan: 8Diospac Espiritupish, yacupish, shinallatac yahuarpish chai quimsacunami shuc yuyailla cancuna. 9Gentecuna huillashcatapish crinchicmi. Shina cacpipish paipac Churimanta Diosllatac huillashcatami, tucuimanta yallica crina canchic. 10Maijanpish Diospac Churita cricca, Diosllatac huillashcatami paipac shungupi charin. Maijanpish Diosta mana cricca, Diosllatac paipac Churimanta huillashcata mana crishcamantami, Diosta llullapi churan. 11Cai huillashcahuanmi Diosca huiñai causaita cushca. Chai huiñai causaitaca paipac Churillamantami charinchic. 12Maijanpish Diospac Churihuan cacmi, chai causaitaca charin. Maijanpish Diospac Churihuan mana cacca, mana chai causaitaca charinchu.
Jesusta criccunaca huiñai causaitapish charishcamanta
13Cancuna Diospac Churita crishpaca, huiñai causaita charishcatapish yachachun nishpami caicunataca quillcani. 14Diospac munaipi imatapish mañacpica, paica uyanmi. Shina cashcamantami paipi shunguta churashpa mañanchic. 15Dios ñucanchic mañashcata uyac cashcata yachashpami, ñucanchic mañashcata cuna cashcataca ña yachanchic.
16Maijanpish shuc huauqui mana huañuiman apacuc juchata ruhuacta ricushpaca, paimanta Diosta mañanami can. Chashna mañacpica, Diosca causaita cungami. Mana huañuiman apacuc juchata ruhuaccunamantami chashnaca mañana can. Huañuiman apacuc juchacunapish tiyanmi. Chaita ruhuaccunamantaca mana mañachun ninichu. 17Tucui mana allita ruhuanacunami jucha. Shina cashpapish huañuiman mana apac juchapish tiyanmi.
18Maijanpish Diospac huahua cashpaca, juchata mana ruhuacushcatami yachanchic. Diospac Churi paicunata huacaichicpimi, diabloca imata mana ruhuanata pudin. 19Ñucanchicca Diospac huahuacuna cashcatami yachanchic, shinallatac cai pachapaclla causaccunataca diablo mandacushcatami yachanchic. 20Diospac Churi shamushpa ñucanchicman yuyaita cushpami, cashcata nic Diostaca ricsichirca. Chaimantami cashcata nic-huan shuclla causanchic. Paica Diospac Churi Jesucristomi. Paillatacmi huiñai causaita cucpish, shinallatac cashcata nic Diospish can. 21Cuyashca huahuacuna, ruhuashcalla dioscunata adoranamantaca huacaichiringuichic. Chashna cachun.
Currently Selected:
1 JUAN 5: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.