MALAKAƖ 3
3
1La TƖƖNA doluŋ kala Tɩɩna sɩ, “Mɩ jaŋ tɩŋ mɩ tɩndaara dɩ ʋ kʋ wasɛ wombiiŋ a bil mɩ lɛ. Ŋɩɩ harɩŋ nɛ ma Tɩɩna-la ma sɩ bee chɩchɛ jaŋ guu kʋ jʋʋ ʋ dɩɩ-balɩŋ. Tɩndaarʋ-la ma sɩɩ yɩɛlʋ nɛ jaŋ kɛŋ nii-la sɩ hɛ mɩ dɩ ma pɛgɛ wɩaa polli.”
2Ama ma tʋɔŋ kʋbɛɛ nɛ jaŋ wuo nyalɩma gbɛrɛ tapʋlɩɩ-la ʋ sɩ jaŋ kɔ? Dɩ ʋ nɩɩ kɔ, kʋbɛɛ nɛ jaŋ wuo chɩŋ ʋ sɩpaaŋ? Ʋ jaŋ nagɛ libire sɩ lɩɩsɛ hɔɔŋ sɩ fɩɛsa nyiniŋ lɛ koo chɛnfɛnnɩŋ sɩ kɛŋ niiŋ ba kaa chɩchɛsɛ kɩaa. 3Tɩndaarʋ-la jaŋ kʋ chɛsɛ Levi doho nɩaa dɩ ba lɩɩ a nagɛ sɛlɩmɛ koo hɔpʋla ba sɩ joŋo hɛ nyiniŋ lɛ a lɩɩsɛ hɔɔ-bɩnɩŋ. Ŋɩɩ lɛ nɛ La TƖƖNA jaŋ kɛŋ tʋɔpʋl tɩŋŋaa dɩ ba kɛŋ kɩaa kʋ ŋaa Wɩɩsʋlʋŋ a pʋ, 4dɩ Juda arɩ Jerusalɛm nɩaa Wɩɩsʋlʋŋ kɩaa tɔrɛ La TƖƖNA tʋɔŋ, arɩ ba fa sɩɩ tɔrɛ ʋ tʋɔŋ ŋɩɩ bumbuŋ-la.
5La TƖƖNA doluŋ kala Tɩɩna sɩ, “Mɩ jaŋ kɔ a guu dii ma sarɩya. Mɩ jaŋ guu dagɛ nɩaa deemba wʋcheelee. Nɩalɩŋ sɩɩ ŋaa chichiribi wɩaa, nɩalɩŋ sɩɩ ŋaa wʋlɩɩlɩŋ, nɩalɩŋ sɩɩ nyɩɛ wɩaa sarɩya dɩ-diiliŋ arɩ nɩalɩŋ sɩɩ gʋrɛ ba tɩntɩnnaa, nɩalɩŋ sɩɩ dɔgɩsɛ yo-haalaa arɩ biisinsiŋ koo a gʋgʋrɛ nɩwogusuŋ. Nɩaa deemba kala bɩ mɩ ka fá.
Nɩalɩŋ sɩɩ gaa Wɩa kɩaa
6Jekɔb doho nɩaa, mɩ-na nɛ ŋaa ma TƖƖNA doluŋ kala Tɩɩna, mɩ bɩ bɩrɩmɛ, ŋɩɩ nɛ tɩɩ mɩ bɩ ma cheye ŋɩɩ. 7Ma naabalɩmaba bʋa lɛ nɛ ma suomo vɩa mɩ niiŋ wɩaa a bɩ wombie-la mɩ sɩ dagɛma ka to. Dɩ ma nɛ mɩɩra kɔ mɩ teeŋ, mɩ ma jaŋ kɔ ma teeŋ. Ama ma yie pɩɛsɛ, ‘Ɛɛ nɛ la jaŋ ŋaa a mɩɩra kɔ ŋ teeŋ?’
8Ʋ maga dɩ nʋʋ gaa Wɩa nɛɛ? Ama maa gaa mɩ nɛ aŋ yie pɩɛsɛ, ‘Ɛɛ nɛ laa gaaŋ?’ Maa gaa mɩ kɩalɩŋ ma sɩ yie kaa kʋ ŋaa Wɩɩsʋlʋŋ pɩmɛ arɩ kpaalɩŋ fii tʋɔŋ kʋbala-la sɩ ŋaa mɩ kʋa nɛ. 9Ŋmɩaŋ ka dii ma Iziral tɩŋŋaa kala nɛ, bɛɛ wɩaa maa gaa mɩ nɛ. 10Má kɛŋ kpaalɩŋ fii tʋɔŋ kʋbala-la sɩ ŋaa mɩ kʋa kaa kɔ mɩ dɩa, dɩ kʋdiilee pʋrɩgɛ nɩmɛ. Má magɩsɛmɛ wɩɩŋ deeŋ lɛ a na. Dɩ ma nɛ ŋaa ŋɩɩ, mɩ jaŋ kɛŋ Wɩa-jaŋ suri a pɛ ma lɛ arɩ kʋzɔŋŋɔɔ ma sɩ bɩ jaŋ wuo na dɩ-biliŋ a bilba.
Mɩ-na ma TƖƖNA doluŋ kala Tɩɩna nɛ bʋla.
11Mɩ bɩ jaŋ leŋ dɩ diiree chei ma baga kɩaa, ma girep tɩɩsɩŋ jaŋ chaasa nɛŋ woruŋ. 12Ŋɩɩ jaŋ leŋ dɩ tinteyee kala yɩyɩrɛma nyu-sɩŋ tɩmma, bɛɛ wɩaa ma tinteeŋ jaŋ chaasa ŋaa dɩ-zɔŋ.
Mɩ-na ma TƖƖNA doluŋ kala Tɩɩna nɛ bʋla.”
13La TƖƖNA sɩ, “Ma bʋl wʋlɔrʋnʋŋ nɛ a tɩgɛ mɩ lɛ, aŋ yie pɩɛsɛ, ‘Wʋbɛɛ nɛ la bʋl a tɩgɛ ŋ lɛ?’
14Wɩɩ-la ma sɩ bʋla nɛ ŋ-la: ‘Ʋ ŋaa wʋpɛɩ nɛ dɩ la nɩɩ to Wɩa. Wʋzɔŋ bɛɛba nɛ la na bʋa-la lɛ la sɩ to wɩalɩŋ ʋ sɩ dagɛla a kɛŋ la tɩtɩa muuri La TƖƖNA doluŋ kala Tɩɩna sɩpaaŋ a dagɛ arɩ la tʋɔŋ chei la wʋbɔŋŋɔɔ wɩaa nɛ? 15La-na sɩ bene, nɩalɩŋ sɩɩ bigisi ba tɩtɩa lɛ tʋɔŋ nɛ tɔrɔ. Nɩalɩŋ sɩɩ ŋaa wʋbɔŋŋɔɔ nɛ kɛŋ kɩaa, nɩalɩŋ ma sɩ paala magɩsɛ Wɩa yie lɩɩ nɛ suo.’ ”
16Ŋɩɩ nɛ nɩalɩŋ kala sɩɩ fá La TƖƖNA bʋl wɩaa dɔŋɔba teeŋ, La TƖƖNA jegile nɩɩ, aŋ leŋ ba ŋmʋnsɛ nɩalɩŋ kala sɩɩ fáʋ a zizilu yɩraa hɛ teniŋ tʋɔŋ dɩ ʋ liliisi ba wɩaa.
17Ŋɩɩ nɛ La TƖƖNA doluŋ kala Tɩɩna bʋl, “Ma nɛ jaŋ ŋaa nɩalɩŋ mɩ sɩ tɩɩ a choma woruŋ dɩ mɩ nɛ kɔ dɩ mɩ dii nɩaa sarɩya. Mɩ jaŋ fá ma nenige a nagɛ nyɩmma sɩ yie fá ʋ bie sɩɩ to ʋ niiŋ nenige ŋɩɩ. 18Ŋɩɩ nɛ nʋʋkala jaŋ na dabaŋ-la sɩ hɛ tʋɔpʋl tɩŋŋaa arɩ nɩbɔŋŋɔɔ pɛgɛ, nɩalɩŋ sɩɩ to mɩ-na Wɩa arɩ nɩalɩŋ sɩ bɩ mɩ ka to.”
Currently Selected:
MALAKAƖ 3: SIS
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014