Marko 16
16
Yesu Kʋsʋ Tsu Afulitɔ
(Mateo 28:1-8; Luka 24:1-12; Yohane 20:1-10)
1Yudafɔ ɔkpʋnʋ ɔdakɛ amʋ ɩlɔtsʋn a, Magdalayintse Maria mʋa Yakobo mʋ yin Maria pʋ́ Salome bɔhɔ ofobi fanfan kʋ bɛɛ, bɛyɛkpa Yesu fuli amʋ. 2Kwasieda nyankɩ, brɛá owi lopwie a, bɔyɔ Yesu opulakpa ɩnʋ. 3Brɛá bʋna ɔkpatɔ a, amʋ́ wʋlɛwʋlɛ bʋdɛ aba fɩtɛ bɛɛ, “Ma abénya obémina ibwi amʋ lɛ ɔbɔ amʋ ɔnɔ ha anɩ?” 4Botsu ansɩ kɩ a, bamina ibwi amʋ lɛ ɔbɔ amʋ ɔnɔ dodo. Ibwi amʋ lɛhɩɛ moni. 5Brɛá bebitiwie ɔbɔ amʋtɔ a, bowun ánɩ́ ɔyasubi ɔkʋ lɔwa liga fututuutu, otsie ɔbɔ amʋ gyɔpɩsʋ. Ifu lɛkɩta amʋ́.
6Ɔyasubi amʋ lɛbla amʋ́ ɔbɛɛ, “Mlɩmánya ifu. Nawun ánɩ́ Yesu Nasaretyin amʋʋ bɛda manta oyikpalihɛsʋ amʋ mlɩdedunka. Bulu lakʋsʋa mʋ, ɔma nfɩ. Mlɩkɩ ɔtɩnɛ amʋʋ bopula mʋ amʋ. 7Mlɩyɛbla mʋ akasɩpʋ amʋ pʋ́ Petro mlɩaa, alagya mlɩ nkpa ɔyɔ Galilea ɔmátɔ. Ɩnʋ mlówun mʋ fɛ alɩ amʋʋ ɔlɛbla mlɩ amʋ nɩ.”
8Ɩnʋ bɛsrɩ dalɩ ɔbɔ amʋtɔ, tsufɛ opuni letsi amʋ́, ɔnɔ ɛ lobwie amʋ́. Mʋ́ sʋ brɛá bɔyɔ a, bʋmɛbla ɔhaa, tsufɛ ifu dɛ amʋ́, bʋdɛkpɩnkɩ kpakpakpakpa.
Yesu Ɩwɩɔwanlɛ Suna Magdalayintse Maria
(Mateo 28:9-10; Yohane 20:11-18)
9[Kwasieda bakɛ, brɛá Yesu lɔkʋsʋ tsu afulitɔ a, olegyankpa lɛ ɩwɩ ɔwan suna Magdalayintse Maria amʋʋ olegya ɔŋɛ lalahɛ asienɔ lɛ mʋtɔ amʋ. 10Mʋ ɛ ɔlɛyɛbla Yesu abuopʋ amʋʋ bʋdɛ mʋ su, bʋdɛ awɩrɛhɔ gyi amʋ. 11Tamɛ brɛá ɔlɛbla amʋ́ ɔbɛɛ, Yesu lakʋsʋ, mawun mʋ a, bʋmohogyi.
Yesu Ɩwɩɔwanlɛ Suna Mʋ Abuopʋ Abanyɔ
(Luka 24:13-35)
12Ɩnɩ ɔma a, Yesu lɛlɛ ɩwɩ ɔwan ɔkpa bambasʋ suna mʋ abuopʋ abanyɔ brɛá bʋna bɔyɔ akuda, tamɛ bʋmɔkɔsɩ bɩ mʋ. 13Amʋ́ ɛ beyinki yɛbla atrahɛ amʋ, tamɛ amʋ́ ɛ bʋmohogyi.
Yesu Ɩwɩɔwanlɛ Suna Mʋ Akasɩpʋ
(Mateo 28:16-20; Luka 24:36-49; Yohane 20:19-23; Gyumagyihɛ 1:6-8)
14Ɩnɩ fɛ́ɛ́ ɔma a, Yesu lɛlɛ ɩwɩ ɔwan suna mʋ akasɩpʋ duɔkʋn amʋ brɛá bʋdɛ atɔ gyi. Amʋ́ klʋntɔ-odwin pʋ́ amʋ́ máhogyi sʋ ɔlɔwa ɩyɩn wa amʋ́. Tsufɛ bʋmɔhɔ aha amʋʋ bowun mʋ mʋ kʋsʋ tsu afulitɔ ɔma amʋ gyi. 15Mʋʋ ɔlɛbla amʋ́ ɔbɛɛ, “Mlɩyɔ ɔyɩtɔ fɛ́ɛ́, amlɩyɛda Bulu asʋn wanklaan amʋ ɔkan ha aha fɛ́ɛ́. 16Ɔha ánɩ́ olohogyi, bɔbɔ mʋ asu a, Bulu ɔbɔ́hɔ mʋ nkpa, tamɛ ɔha ánɩ́ omohogyi obégyi pɔn. 17Osuna anfɩ obóbuo aha ánɩ́ bohogyi nɩ. Bégya ɔŋɛ lalahɛ mɩ ɩdatɔ, bɛ́blɩ ɔblɩ bamba, 18bɛ́kɩta awɔ ɩbɩtɔ, bónun afa ánɩ́ ɩtɔmɔ kugyikʋ, tamɛ ɩmɔ́ɔbwɛ amʋ́ tɔtɔ. Bɔ́pʋ ɩbɩ dɩnka alɔpʋsʋ, ɩwɩ bɔ́wa amʋ́ ɔnlɩn.”
Yesu Ɔsʋsʋ Yɔ
(Luka 24:50-53; Gyumagyihɛ 1:9-11)
19Brɛá anɩ Wie Yesu lɛbla amʋ́ asʋn ta a, Bulu lotsu mʋ ya ɔsʋsʋ, oleyetsia mʋ gyɔpɩsʋ. 20Mʋ akasɩpʋ amʋ befi asɩ bʋdɛ asʋn amʋ ɔkan da ɔtɩnɛgyiɔtɩnɛ. Anɩ Wie Yesu lɛlɩɩ amʋ́ ɔma bɔyɔ agyʋma. Ɔlɔtsʋn osuna ánɩ́ bɔbwɛsʋ, wa asʋn amʋ ɔwʋnlɩn.]#16:9-20 Mʋ́tɔ ye 9-20 ɩma nwʋlʋ dada amʋ akʋtɔ.
Currently Selected:
Marko 16: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation