Luka 1
1
1Onumnyampʋ Tiofilo:
Aha tsɔtsɔɔtsɔ babɔ mbɔdɩ wanlɩn tɔá ɩlɛba anɩtɔ tswɩ. 2Bɔwanlɩn tɔá aha amʋʋ bʋbʋ ɩnʋ tsu mʋ́ nfiasɩ, bʋgyi mʋ́ asumpʋ amʋ bowun da mʋ́ ɔkan amʋ bɛbla anɩ pɛpɛɛpɛ. 3Onumnyampʋ Tiofilo, mɩ ɛ nabɔ mbɔdɩ kwi mʋ́tɔ wanklaan tsu mʋ́ nfiasɩ. Mʋ́ sʋ ndekleá nɔ́wanlɩn mʋ́ pɛpɛɛpɛ ha fʋ, 4mɛnɩ fɛ́bɩá atɔ amʋʋ basuna fʋ amʋ igyi ɔnɔkwalɩ.
Asu Ɔbɔpʋ Yohane Kwɩɩ Asʋn
5Brɛá Herode dɛ iwie gyi Yudea ɔmátɔ a, Bulu igyi ɔhapʋ ɔkʋ letsia, bʋtɛtɩ mʋ Sakaria. Otsu Bulu igyi ahapʋ ɔpasua kʋá bʋtɛtɩ mʋ́ Abiatɔ. Mʋ ka gyi Elisabet, otsu Bulu igyi ɔhapʋ Aaron abi-anátɔ. 6Mʋa mʋ ka asʋn da ɔkpa Bulu ansɩtɔ. Bʋtegyi anɩ Wie Bulu mbla pʋ́ mʋ nhɩhɩɛ fɛ́ɛ́sʋ pɛpɛɛpɛ. 7Bʋma obi, tsufɛ Elisabet megyi ɔtsɩ kwɩɩpʋ. Mʋa mʋ klu fɛ́ɛ́ ɛ bahɩɛ dan.
8Ɛkɛ ɔkʋ ɩlɔtʋ Sakaria aná ɔpasua ánɩ́ amʋ́ ɔbɛ́ha Bulu igyi. Sakaria lɔyɔ ɔbʋ Bulu ansɩtɔ ɔdɛ mʋ agyʋma yɔ. 9Abi bʋtɔtswɩ pʋlɛ ɔha ánɩ́ obébitiwie Ɔwankɩkpa ɩnʋ yɛwa ɔhɩɛn ogya, igyi ahapʋ amʋ amandɩɛ ɔnɔ. Bɔtswɩ a, ileyi Sakariasʋ. 10Brɛá ɔdɛ ɔhɩɛn amʋ ogya wa a, ɔdɔm ánɩ́ bɔyɔ ɔtswɛkpa ɩnʋ fɛ́ɛ́ bʋlɩɩ kpankpa bʋdɛ mpaɩ bɔ.
11 Bulu-ɔbɔpʋ ɔkʋ lɛbɛlɩɩ afɔdɩɛ-ɔswɩ amʋ gyɔpɩsʋ, lɛ ɩwɩ ɔwan suna Sakaria. 12Brɛá olowun Bulu-ɔbɔpʋ amʋ a, ɔlɔwan, ifu lowie mʋ ayetɔ. 13Ɩnʋ Bulu-ɔbɔpʋ amʋ lɛbla mʋ ɔbɛɛ, “Sakaria, mánya ifu! Bulu lanu fʋ isu. Fʋ ka obénya ɔmɛ́ kwɩɩ obi yinhɛ ha fʋ. Dɩnka mʋ ɩda ‘Yohane.> 14Obi anfɩ kwɩɩ bɔ́wa mlɩ ɔdwɛ, wa mlɩ ansigyi. Ɩbɔ́wa aha tsɔtsɔɔtsɔ ɛ ansigyi. 15Tsufɛ kebi amʋ ɔbɔ́bwɛ ɔha kpɔnkpɔntɩ Bulu ansɩtɔ. Nta bʋhɛ kʋkʋ máda mʋ ɔnɔ ɛkɛkɛɛkɛ. Ɔŋɛ Wankɩhɛ ɔbɔ́bʋla mʋtɔ tsu brɛá ɔbʋ mʋ yin ɩwɩtɔ. 16Ɔbɛ́ha Israelfɔ tsɔtsɔɔtsɔ bɛ́damli klʋntɔ ba amʋ́ Wie Bulu wa. 17Bulu ɔnɔsʋ ɔtɔɩpʋ Elia tumi pʋ́ mʋ ɔŋɛ bétsia mʋtɔ. Obégya anɩ Wie nkpa ba. Ɔbɛ́ha abi-asɩ bɔ́dwɛ amʋ́ abi. Ɔbɛ́damli aha ánɩ́ bʋtɔkʋsʋ lɩɩ Bulusʋ agywɩɩn, bwɛ fɛ yile abwɛpʋ klɛ, mɛnɩ ɔbɛ́la aha yaɩ wanklaan ha anɩ Wie.”
18Sakaria lɛfɩtɛ Bulu-ɔbɔpʋ amʋ ɔbɛɛ, “Ntɔ nɔ́pʋbɩá asʋn anfɩ ɩbɛ́ba mʋ́tɔ? Tsufɛ mɩa mɩ ka anɩlapɔn.”
19Ɩnʋ Bulu-ɔbɔpʋ amʋ lɛbla mʋ ɔbɛɛ, “Mɩ ɩda gyi Gabriel. Bulu ansɩtɔ ɔlɩɩpʋ ngyi. Mʋlawa mɩ ɔbɛɛ, mbɛbla fʋ asʋn wanklaan anfɩ. 20Tsu ndɛ pʋya ɛkɛá asʋn anfɩ ɩbɛ́ba mʋ́tɔ a, fɔ́tɔ omumu, tsufɛ fʋmɔhɔ mɩ asʋn blɩhɛ anfɩ ɩbɛ́ba mʋ́ brɛtɔ anfɩsʋ gyi.”
21Ɩlɔbwɛ alɩ a, ɩmɔwankɩ aha amʋʋ bʋlɩɩ bʋgyo Sakaria amʋ tɔá sʋá alawa ɔpá ɔtswɛkpa obutotɔ ɩnʋ alɩ. 22Brɛá ɔlɛdalɩ ba a, alatɔ omumu. Mʋ́ sʋ bowun ánɩ́ alawun tɔkʋ obutotɔ ɩnʋ. Ɩnɩá ɔmɛtalɩ tɔɩ sʋ a, ɔlɔpʋ mʋ ɩbɩ mʋ́a mʋ nwun bla amʋ́ asʋn.
23Sakaria letsia ɔtswɛkpa ɩnʋ yɔfʋn ɛkɛá ɔlɛha Bulu igyi ta, oleyinki yɔ woyi. 24Nkɛ amʋ ɔma a, Elisabet lenya ɔmɛ́, tsia ŋain ɩwɩ alɩɩ tsra anu kɛkɛ. 25Elisabet lɛblɩ ɔbɛɛ, “Ɩnɩ mɩ Wie Bulu labwɛ ha mɩ nɩ. Alawun mɩ nwɛ, dɩnkɩ nsʋpa lɛ mɩsʋ ahatɔ.”
Yesu Kwɩɩ Ɩwɩ Asʋn
26Brɛá Elisabet ɔmɛ lɔhɔ tsra asie a, Bulu lɔwa mʋ ɔbɔpʋ Gabriel wulu kʋá ɩbʋ Galilea ɔmátɔ, bʋtɛtɩ mʋ́ Nasaret. 27Ɔlɔwa mʋ obitebi ɔkʋá ɔmɔkʋdɩ oyin wa kɩ, bʋtɛtɩ mʋ Maria wa. Alɩ brɛ amʋtɔ a, bʋdɛpʋ obitebi amʋ ha oyin ɔkʋá bʋtɛtɩ mʋ Yosef, ogyi owie Dawid mʋ na bɛɛ otsia. 28Bulu-ɔbɔpʋ amʋ lɛba Maria woyitɔ bɛha mʋ itsia, bla mʋ ɔbɛɛ, “Bulu lagyi fʋ bʋalɛ. Alahɩɛ yula fʋ!”
29Asʋn anfɩ lɛha Maria legyigya. Ɔlɛfɩtɛ mʋ ɩwɩ ɔbɛɛ, “Ngya ntɔ itsia odu ɔha anfɩ laha mɩ alɩ?” 30Bulu-ɔbɔpʋ amʋ lɛbla mʋ ɔbɛɛ, “Maria, mánya ifu. Bulu lahɩɛ yula fʋ! 31Kɩ, fénya ɔmɛ kwɩɩ obi yinhɛ. Dɩnka mʋ ɩda ‘Yesu.> 32Ɔbɔ́bwɛ ɔha yile. Bɛtɩ mʋ Ɔsʋsʋʋsʋ mʋ wie mʋ Bi. Anɩ Wie Bulu ɔbɛ́yaɩ mʋ mʋ nain Owie Dawid obiasʋ. 33Obégyi iwie Yakob#1:33 Israelfɔ gyi Yakob abi-aná. woyisʋ brɛ fɛ́ɛ́. Mʋ iwiegyi mɔ́ɔmɔ ɔnɔ ɛkɛkɛɛkɛ.”
34Maria lɛfɩtɛ Bulu-ɔbɔpʋ amʋ ɔbɛɛ, “Nkalɩ ɩbɔ́bwɛ asa ɩnɩ ɩbɛ́ba mʋ́tɔ, tsufɛ mmeyin oyin.”
35Bulu-ɔbɔpʋ amʋ lɛlɛ mʋ́ ɔnɔ ɔbɛɛ, “Ɔŋɛ Wankɩhɛ ɔbɛ́ba fʋsʋ. Ɔsʋsʋʋsʋ Bulu amʋ tumi bóbun fʋsʋ. Ɩnɩ sʋ aha bɛ́tɩ Obi wankɩhɛ amʋʋ fɔ́kwɩɩ amʋ bɛɛ, ‘Bulu mʋ Bi.> 36Kɩ, fʋ obusuanyin Elisabet kʋraa ɔba bɔkwɩɩ obi yinhɛ mʋ tsɩdɛhɛn anfɩtɔ. Aha bɛɛ, megyi ɔtsɩ kwɩɩpʋ ogyi, tamɛ mʋ ɔmɛ́ lahɔ tsra asie dodo. 37Tsufɛ tɔtɔ mɔdʋn Bulu bwɛ!”
38Ɩnʋ Maria lɛbla Bulu-ɔbɔpʋ amʋ ɔbɛɛ, “Bulu osumbi ngyi. Ɩba mʋ́tɔ ha mɩ fɛ alɩá fablɩ.” Ɩnʋ a, Bulu-ɔbɔpʋ amʋ lɛnatɩ si mʋ.
Maria Elisabet Sɩna
39Nkɛ amʋtɔ a, Maria lɔkʋla atɔ, wa ɔsa yɔ Yudea abʋsʋ wulu kʋsʋ. 40Mʋʋ olowie Sakaria woyitɔ ha Elisabet itsia. 41Elisabet lenya nu itsia amʋ alɩ kebi amʋ lɛkan ɩwɩ mʋ ɩwɩtɔ, Ɔŋɛ Wankɩhɛ lɔbʋla mʋtɔ. 42Ɩnʋ ɔlɔkplʋn blɩ ɔbɛɛ, “Bulu layula fʋ atsɩ fɛ́ɛ́tɔ. Alayula fʋ ɩwɩtɔ obi amʋ ɛ. 43Iye! Mɩ Wie mʋ yin onuto laba mɩ wa a? Ntogyi sʋ Bulu lawa mɩ numnyam anfɩ odu? 44Kɩ, nenyanu fʋ itsia amʋ alɩ obi amʋʋ ɔbʋ mɩ ɩwɩtɔ amʋ lɛkan ɩwɩ ansigyisʋ. 45Bulu layula fʋ, tsufɛ fahogyiá tɔá alahɩɛ ha fʋ ɩbɛ́ba mʋ́tɔ.”
Maria Bulu Kanfʋ Ɩlʋ
46Ɩnʋ Maria lɔwa ɩlʋ ɔbɛɛ,
“Mɩ ɔkla dɛ mɩ Wie Bulu kanfʋ.
47Mɩ Nkpa Ɔhɔpʋ Bulu laha ansɩ dɛ mɩ gyi.
48Tsufɛ alakaɩn mɩ mʋ osumbi ánɩ́ ɔma tɔtɔ bwɛtɔsʋ, wun mɩ nwɛ.
Tsu sei pʋya a, abi-aná fɛ́ɛ́ bɛ́blɩ bɛɛ, Bulu layula mɩ.
49Bulu Otumipʋ amʋ labwɛ atɔ kpɔnkpɔntɩ ha mɩ.
Ɔlɔwankɩ.
50Otowun ɩlɩn kugyikʋtɔ
aha ánɩ́ bʋtenya mʋ ifu nwɛ.
51Alapʋ mʋ tumi bwɛ atɔ akpɔnkpɔntɩ,
pʋda ɩwɩ atsupʋ nwuntɔ asʋn saɩn.
52Alakplɩ awie mbiasʋ,
tsu aha ánɩ́ bʋma tɔtɔ bwɛtɔ fʋa.
53Alaha ahianfɔ bamli ɩwɩ anyapʋ,
ɩwɩ anyapʋ banatɩ ɩbɩkpan.
54-55Alakpa mʋ asumpʋ Israelfɔ.
Ɔmɛtan ánɩ́ ɔlɛblɩ ɔbɛɛ, mówun anɩ anain Abraham
mʋa mʋ abi-aná nwɛ brɛ fɛ́ɛ́,
fɛ alɩá ɔlɛbla amʋ́.”
Alɩ Maria lɔmɔ mʋ ɩlʋ amʋ ɔnɔ nɩ. 56Oletsia Elisabet wa fɛ tsra asa asa oleyinki yɔ woyi.
Asu Ɔbɔpʋ Yohane Kwɩɩ
57Brɛá Elisabet lɔbɔkwɩɩ a, ɔlɔkwɩɩ obi yinhɛ. 58Mʋ abusuanfɔ pʋ́ mʋ aba bonuá anɩ Wie Bulu lahɩɛ wun mʋ nwɛ. Mʋ́ sʋ ansɩ legyi amʋ́ fɛ́ɛ́.
59Obi amʋ lenya ndawɔtswɩ a, mʋ ɩwɩsʋ aha bɛba mʋ obuto ɔlɛkpa, abʋtɩn mʋ kete, dɩnka mʋ ɩda. Tɛkɩ bɛɛ abʋpʋ mʋ sɩ ɩda Sakaria dɩnka mʋ, 60tamɛ mʋ yin lɛbla amʋ́ ɔbɛɛ, “O-o! Mlɩdɩnka mʋ Yohane.”
61Aha amʋ bɛbla mʋ bɛɛ, “Anɩmɔkʋnu abʋtɩ fʋ obusuanyin ɔkʋkʋ alɩ kɩ.” 62Ɩnʋ bɔbwɛ mʋ sɩ ɩbɩ, fɩtɛ mʋ alɩá bʋtɩ kebi amʋ.
63Sakaria lɔbwɛ ɩbɩ ɔbɛɛ bʋtsu tɔkʋ ha mʋ amʋwanlɩn mʋ́ dɩnka mʋ́sʋ, ɔlɔwanlɩn ɔbɛɛ, “Mʋ ɩda gyi ‘Yohane.> ” Ilofwie amʋ́ fɛ́ɛ́tɔ. 64Ɩnʋnʋ mʋ ɔdandʋ lɛsankɩ, ɔlɔtɔɩ kanfʋ Bulu. 65Ifu lɛkɩta apio aba amʋ fɛ́ɛ́. Alɩ asʋn anfɩ lɛklɛɩ wa Yudea abʋsʋ awulu amʋ fɛ́ɛ́tɔ. 66Ɔhagyiɔha ánɩ́ olonu asʋn anfɩ lɛfɩtɛ mʋ ɩwɩ ɔbɛɛ, “Ntɔ obi kebi anfɩ ɔbɔ́bwɛ ɛkɛkʋ?” Tsufɛ ɩlɔwankɩ amʋ́ ánɩ́ Bulu ɩbɩ dɩn mʋsʋ.
Sakaria Bulu Kanfʋ Ɩlʋ
67Ɩnʋ a, Ɔŋɛ Wankɩhɛ lɔbʋla Sakariatɔ, ɔlɔwa asʋn ánɩ́ Bulu lapʋha mʋ blɩ bɩ.
68Ɔbɛɛ,
“Mlɩha akanfʋ anɩ Wie Israel Bulu.
Tsufɛ alabɛlɛ mʋ aha, ha anɩlagyi ɩwɩ.
69Alalɛ Ɔhɔpʋ Ɔwʋnlɩnpʋ ɔkʋ
tsu mʋ osumpʋ Owie Dawid abusuantɔ ha anɩ.
70(Fɛ alɩá ɔlɛblɩ tsʋn mʋ ɔnɔsʋ atɔɩpʋ wankɩhɛ amʋsʋ tswɩ dodoodo.)
71Ɔbɛɛ, mɛ́lɛ anɩ tsu anɩ alupʋ
pʋ́ aha ánɩ́ bʋtamafia anɩ ɩbɩtɔ.
72-73Ɔbɛɛ, mówun anɩ anain nwɛ.
Ɔmɛ́ɛtan mʋ ntam wankɩhɛ amʋʋ ɔlɛka ha anɩ nain Abraham amʋsʋ.
74Ɔbɛɛ, mɛ́lɛ anɩ tsu anɩ alupʋ ɩbɩtɔ,
mɛnɩ abɛ́talɩ sum mʋ, anɩméenya adʋn ifu.
75Ɔbɛ́ha abɔ́bwɛ mʋ aha,
bwɛ yile mʋ ansɩsʋ anɩ nkpatɔ fɛ́ɛ́.
76Mɩ bi, fʋ mʋ́ a, aha bɛ́tɩ fʋ bɛɛ, ‘Ɔsʋsʋʋsʋ Bulu ɔnɔsʋ ɔtɔɩpʋ.>
Tsufɛ fégya anɩ Wie nkpa,
la ɔkpa ha mʋ.
77Fɛ́bla mʋ aha fɛɛ, Bulu ɔbɛ́talɩ hɔ amʋ́ nkpa
tsʋn lakpansikiesʋ.
78Anɩ Wie Bulu nwewun sʋ
Kristo amʋ ɔbɛ́dalɩ fɛ owi tsu ɔsʋsʋ ba anɩ wa.
79Ɔbɔ́wankɩ wʋlɩ aha amʋʋ bʋtsie okluntɔ pʋ́ lowu ɔkpasʋ amʋ fɛ́ɛ́sʋ.
Ɔbɛ́kpa anɩ tsʋn iwilwii ɔkpasʋ.”
Ɩnɩ Sakaria lɔpʋmɔ mʋ asʋn ɔnɔ nɩ. 80Kebi amʋ lɛdan, nya Ɔŋɛtɔ ɔwʋnlɩn. Oletsia ɔsʋlʋkpansʋ alɩɩ yɔfʋn ɛkɛá ɔlɛlɛ ɩwɩ ɔwan suna Israelfɔ.
Currently Selected:
Luka 1: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation