2 Timoteo 3
3
Nkɛ Trahɛ Amʋtɔ Asʋn
1Tamɛ mɩ bi Timoteo, bɩá ɔyɩtɔ ɩbɔ́wa ɔnlɩn nkɛ trahɛ amʋtɔ. 2Tsufɛ aha bɔ́bwɛ awʋnsɩpʋ, bɔ́bwɛ kɔba adwɛpʋ. Bɔ́hɔ amʋ́ ɩwɩsʋ gyi, bótsu ɩwɩ, bésia aha, bʋmóonu amʋ́ akwɩɩpʋ asʋn, bʋméeyi aha ayɛ, amʋ́ ɩwɩ mɛ́ɛtɩn, 3bʋmɔ́ɔdwɛ aha, bʋméesi asʋn kie, bɔ́bwɛ aha ɩwɩ asʋn ablɩpʋ, bʋmɛ́ɛtalɩ gyi ɩwɩsʋ, bɔ́bwɛ awuntɔlɩnpʋ, bʋmɔ́ɔdwɛ ɩtɔ wanklaan kʋkʋ. 4Bɛ́lɛ aha ha, bʋmóosusu asʋn ɩwɩ, bɛ́kɩ amʋ́ ɩwɩá bʋdʋn ɔhagyiɔha, bɔ́dwɛ ɔyɩtɔ ansigyi si Bulu. 5Bɔ́bwɛ ɩwɩ fɛ Bulu bʋdesum, tamɛ békina mʋ tumi. Lɛ ɩwɩ lɛ aha anfɩ odutɔ. 6Amʋ́ odu bʋtebitiwie aha woyitɔ, damli atsɩá amʋ́ ansɩtɔ ma ɔnlɩn agywɩɩn. Atsɩ amʋ odu a, lakpan lamli amʋ́ atɔ sʋrahɛ, ɔwɔlɩ lalahɛ labʋla amʋ́tɔ. 7Bʋtekleá bónu ɔhagyiɔha atosunahɛ, tamɛ bʋmɛ́ɛtalɩ bɩ ɔnɔkwalɩ amʋ ɛkɛkɛɛkɛ. 8Alɩ amʋʋ Yane mʋa Yambre bɔkʋsʋ lɩɩ anɩ nain Mosesʋ amʋ a, alɩ aha anfɩ ɛ bakʋsʋ lɩɩ ɔnɔkwalɩ asʋn amʋsʋ nɩ. Amʋ́ agywɩɩn lawu. Hogyitɔ ɛ a, bʋma ɔlɩɩkpa. 9Tamɛ bʋmɔ́ɔyɔ nkpa dʋn alɩ, tsufɛ amʋ́ mimla bɛ́lɩn ɔwan, ɔhagyiɔha obówun. Alɩ ɩlɛba Yane mʋa Yambresʋ nɩ.
Paulo Asʋn Trahɛ
10Timoteo, fʋ mʋ́ fʋyin mɩ atosunahɛ fɛ́ɛ́, mɩ tsiatɔ, tɔá ɔkpa ngya, mɩ hogyi, mɩ ɩklʋnya, mɩ aha ɩwɩ ɔdwɛ pʋ́ alɩá notomi wun ipian, 11alɩá aha bɛdɩnka mɩsʋ pʋ́ mɩ asʋn wunhɛ. Mʋ́a ɩlɛba mɩsʋ Antiokia, Ikonion pʋ́ Listra ɔmátɔ. Notomi, anɩ Wie lɛlɛ mɩ tsu mʋ́ fɛ́ɛ́tɔ. 12Lɛlɛ mʋ́ a, ɔhagyiɔha ánɩ́ odekleá obóbuo anɩ Wie Kristo Yesu, ɔbwɛ Bulu apɛ a, aha bʋtɛdɩnka mʋsʋ. 13Tamɛ aha lalahɛ pʋ́ aha asisipʋ mʋ́ a, bɔ́yɔ amʋ́ lalahɛbwɛsʋ dʋn alɩ. Bɛ́natɩ mlɛ aha, aha ɛ bɛ́mlɛ amʋ́. 14Tamɛ fʋ mʋ́ a, kɩta fʋ ɔnɔkwalɩ amʋʋ fakasɩ, fʋ onuto fahɔ mʋ́sʋ gyi amʋtɔ kinkiinkin, tsufɛ fʋyin aha amʋʋ bosuna fʋ atɔ amʋ wanklaan. 15Tsu fʋ nyebitɔ ɔpá fɛbɩ Bulu asʋn wanlɩnhɛ amʋ. Mʋ́ ɔbɛ́talɩ ha fʋ nyansa fɔ́pʋhɔ Kristo Yesu gyi nɩ. Mʋ́ sʋ Bulu ɔbɔ́hɔ fʋ nkpa ɛ nɩ. 16Bulu asʋn wanlɩnhɛ amʋ fɛ́ɛ́ itsu Bulu onuto wa. Ɩbʋ alɛá bɔ́pʋsuna ɔha, pʋkina asʋn ha ɔha, pʋtswii ɔha, pʋbʋla ɔha, ɩbɛ́ha yilebwɛ bɛ́manta mʋ, 17mɛnɩ ɩbɛ́la Bulu ɔha bwɛ wanklaan, ɔbɔ́fʋn ha gyumagyihɛ wanklaan kugyikʋ.
Currently Selected:
2 Timoteo 3: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation