2 Timoteo 2
2
Ɩsa Ɔkɔpʋ Wanklaan
1Ɩnɩ sʋ mɩ bi, ha Bulu awɩtɔlɛ amʋʋ ɔlɔpʋtsʋn Kristo Yesusʋ amʋ ɩwa fʋ ɔwʋnlɩn. 2Pʋ asʋn amʋʋ nɛblɩ, fonu aha tsɔtsɔɔtsɔ ansɩtɔ amʋ wa aha ánɩ́ bʋbʋ ɔnɔkwalɩ ɩbɩtɔ, mɛnɩ amʋ́ ɛ bɛ́talɩ suna aha bamba.
3Tomi afʋwun ɩwɩɔsɩn amʋʋ anɩdewun amʋ, fɛ Kristo Yesu ɩsa ɔkɔpʋ wanklaan. 4Ɩsa ɔkɔpʋ ɔkʋkʋ tamatra kɩ ɔma, tsufɛ odekleá obégyi mʋ ɔhandɛ ansɩ. 5Alɩ kɛn ɔsrɩ otsiipʋ ɔkʋkʋ tamanya ɩsʋgyi atokiehɛ, nkɛtɩ alagyi ɔsrɩ amʋ mblasʋ nɩ. 6Ɔdɔtɔpʋá ɔbʋ nsi tegyankpa da atɔ pɔpwɛ ɔnɔ. 7Gywɩɩn asʋn anfɩ nabla fʋ anfɩ ɩwɩ. Anɩ Wie ɛ ɔbɛ́ha fónu mʋ́ fɛ́ɛ́ asɩ.
8Kaɩn Yesu Kristo, Owie Dawid mʋ na amʋsʋ. Mʋ Bulu lɔkʋsʋa tsu afulitɔ. Mʋ́gyi asʋn wanklaan amʋʋ ndɛblɩ amʋ nɩ. 9Asʋn anfɩ sʋ ndɛ ɩwɩɔsɩn wun, bawa mɩ ɩkan fɛ lalahɛ ɔbwɛpʋ nɩ. Tamɛ bʋmɔkʋwa Bulu asʋn amʋ mʋ́ ɩkan. 10Aha amʋʋ Bulu lalɛ amʋ sʋ natomi ɔkpagyiɔkpasʋ ndɛ ɩwɩɔsɩn wun, mɛnɩ Bulu ɔbɔ́tsʋn Kristo Yesusʋ hɔ amʋ́ nkpa, amʋ́ ɩbɩ bɛ́da numnyam amʋʋ ɩtamata amʋ. 11Asʋn anfɩ bʋ mʋ́tɔ.
“Nɩ anɩa mʋnyɔ awu a,
anɩa mʋnyɔ obétsia nkpa.
12Nɩ atomi wun ɩwɩɔsɩn a,
anɩa mʋnyɔ abégyi iwie.
Nɩ akina mʋ a,
mʋ ɛ obékina anɩ.
13Nɩ anɩmá ɔnɔkwalɩ a,
mʋ mʋ́ a, ɔnɔkwalɩpʋ ogyi.
Tsufɛ ɔtamatu atsʋnɔ tswɩ, lapʋ mʋ ɔdandʋ tsu mʋ́ ɛkɛkɛɛkɛ.”
Agyʋma Ɔyɔpʋá Olegyi Bulu Ansɩ
14Tsia kaɩn amʋ́ asʋn anfɩ. Tɔɩ kpla amʋ́ Bulu ansɩtɔ fɛɛ, bʋmátsia trɛ asʋnsʋ. Labi kʋkʋ ɩma mʋ́tɔ, tsufɛ mʋ́ odu abwɛpʋ bʋtɛhɩ. 15Bɔ mbɔdɩ afʋhɔ ɩda Bulu ansɩtɔ, fɛ agyʋma ɔyɔpʋá mʋ agyʋma ma mʋ pɛlɩ, otosuna ɔnɔkwalɩ asʋn amʋ wanklaan. 16Asʋn ánɩ́ ɩma asɩ, imosuna Bulusum ɩmádalɩ fʋ ɔnɔ, tsufɛ ɩtɛha ɔha mʋa Bulunyɔ nsɩnɛ tɔwa ɩfɔ. 17Alɩ amʋʋ ɔlɔ tɛklɛɩ amʋ a, alɩ asʋn anfɩ ablɩpʋ asʋn ɛ tɛklɛɩ nɩ. Amʋ́ akʋ gyi Himeneo mʋa Fileto. 18Bafwɩ dalɩ ɔnɔkwalɩ ɔkpa amʋsʋ yɔ bʋdɛblɩ bɛɛ, kʋsʋ tsu afulitɔ laba bɔtsʋn, bʋdɛ akʋ hogyi yinta. 19Tamɛ ntswɩasɩ amʋʋ Bulu lɔwa ha hogyi amʋ ɩlɩɩ kinkiinkin. Asʋn ánɩ́ bɔwanlɩn dɩnka ntswɩasɩ amʋsʋ gyi, “Anɩ Wie yin aha ánɩ́ bʋgyi mʋ klɛ.” Nyɔsɩ ɛ gyi, “Ɔhagyiɔha ánɩ́ ɔtɛtɩ mʋ ɩwɩ ɔbɛɛ Okristoyin a, osi lalahɛ bwɛ.”
20Megyi sika pɛpɛ mʋ́a sika fututu atɔ pɛ tetsia woyi yiletɔ. Oyi mʋ́a ɩsɩ atɔ ɛ tetsia ɩnʋ. Bʋtobu ɩkʋ dʋn kʋ. 21Nɩ ɔkʋ ɔlɛ mʋ ɩwɩ lɛ lalahɛbwɛtɔ a, Bulu tɛlɛ mʋ yaɩ. Alabwɛ ɔha ánɩ́ alasi ɩwɩ ha, ɔbʋ labi. Mʋ Wie Bulu ɔbɔ́pʋ mʋ gyi gyʋma wanklaan kugyikʋ. 22Ɩnɩ sʋ lɛ fʋ ɩwɩ tsu nyasubi mʋ́a mbitebi mbagyitɔ. Fówun fʋa aha amʋʋ bʋtɔpʋ ɩklʋn wankɩhɛ kpoli Bulu amʋ ansɩ bɛ́dɩnka yilebwɛ, hogyi, ɔdwɛ pʋ́ iwilwiisʋ. 23Lɛ fʋ ɩwɩ tsu nwɛngyiá ɩma labi, ɩtɔ wanklaan kʋkʋ mɛ́ɛdalɩ tsu mʋ́tɔtɔ, tsufɛ fʋyin ánɩ́ ɩtrɛ pɛ ɩtɛtɩ. 24Ɩma alɛá anɩ Wie osumpʋ ɔbɔ́bwɛ ɔtrɛpʋ. Mboun ilehian ánɩ́ ɔbɔ́wa awɩtɔlɛ ha ɔhagyiɔha, ɔbɔ́bwɛ osunapʋ wanklaan, otenya klʋn ha aha ánɩ́ amʋ́ asʋn bʋ ɔnlɩn. 25Ilehian ánɩ́ obénya klʋn tɔɩ kpla aha ánɩ́ bʋtɔkʋsʋ lɩɩ Bulu asʋn amʋsʋ. Fialɩ Bulu obówun amʋ́ nwɛ, ha amʋ́ bɛ́damli klʋntɔ, bɩ ɔnɔkwalɩ amʋ, 26ɩha amʋ́ ansɩ ɩba asɩ. Fialɩ ɩbɛ́ha amʋ́ bɛ́dalɩ tsu Ɔbʋnsam amʋʋ ɔbɛɛ bʋgyi mʋ asʋnsʋ, abʋbwɛ mʋ apɛ amʋ ayibitɔ.
Currently Selected:
2 Timoteo 2: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation