JONA 4
4
Jona thinurna leh Pathian khawngaih theihzia
1Amaherawhchu, chu chuan Jona a tilungni lo ta êm êm a, a thinrim a. 2Lalpa hnênah chuan a ṭawngṭai a, “Aw Lalpa, ka ngên a che, hei hi kan rama ka la awm laia ka sawi kha a ni lo vem ni? Hei vâng hian Tarsis lamah ka tlân bo thuai a nih kha: nang zawng khawngaihna leh lainatnaa khat, thinnel, zahngai thei leh thil ṭha lo thlen lo tûra inlamlêt ṭhîn Pathian i ni tih ka hre si a.#Ex 34.6 3Chuvâng chuan, aw Lalpa, tûnah ka nunna hi mi lâksak tûrin ka ngên a che; keia tân hian dam aiin thih a ṭha zâwk si a,” a ti a.#1 Lal 19.4 4Tin, Lalpa chuan, “I thinrim hi i tidik em ni?” a ti a. 5Tichuan, Jona chu khawpui ata chu a kal chhuak a, khawpui chhak lampangah chuan a ṭhu a, chutah chuan chhâwl bûk a sa a, khawpui chunga thil lo thleng tûr chu hmuh tumin a hnuai hlimah chuan a ṭhu ta reng a. 6Tin, Lalpa Pathian chuan ûm a lo ruat a, chu chu Jona chungah a zâmtîr a, a hrehawmna ata chhan chhuak tûra a lû zâr hliahtu atân. Chutichuan, Jona chu ûm avâng chuan a lâwm ta êm êm a. 7Amaherawhchu, Pathianin a tûk khawfîng chah laiin sûlrûl a lo ruat a, chu chuan ûm chu a kher a, a lo vuai ta a. 8Tin, heti hi a ni a, ni a lo chhuah chuan Pathianin khawchhak thli lum a lo ruat a; tin, ni chuan Jona lû chu a em a, a thidang a, a tân chuan thih a dîl ta a, “Keia tân hian dam aiin thih a ṭha zâwk e,” a ti a. 9Tin, Pathian chuan Jona hnênah, “Ûm chungchâng thûa i thinrim hi i tidik em ni?” a ti a. Ani chuan, “Thih phah khawp hiala ka thinrim hi ka tidik a ni,” a ti a. 10Tin, Lalpa chuan, “I hahpui loh, i ṭhantîr pawh ni hek lo, zan khat thila lo awma, zan khat thila boral leh ûm hi i lainat a. 11Ninevi khua, khawpui ropui tak, a chhûnga mi nuai khat leh sînghnih aia tam, an ding leh vei pawh thliar thei lote leh ran rual tam tak awmna hi ka khawngaih lo vang em ni?” a ti a.
Currently Selected:
JONA 4: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.