EZEKIELA 46
46
Kût hmana lal tih tûr
1Heti hian Lalpa Pathian chuan a ti a ni: “Hung chhûngnung zâwk kawngka chhak lam hawi chu hnathawh ni, ni ruk chhûng chu a inkhâr ang a, Chawlhniah leh thla thar nîah erawh chuan a inhawng tûr a ni. 2Lal chu kawngka in sumhmunah a lût ang a, kawngka in bangpêng bulah a ding ang a, puithiamte chuan a hâlral inthawina leh remna thilhlante chu an buatsaihsak ang a, luhna kawngka in pindanah chuan Pathian a bia ang; tichuan, a chhuak ang a, kawng erawh chu tlai lam thlengin khâr loh tûr a ni. 3Vântlâng erawh chuan Chawlhni leh thla tharahte chuan chu kawngka in luhna bulahte chuan Lalpa hmaah Pathian chibai an bûk ang. 4Chawlhnia lalin Lalpa hnêna hâlral inthawina a hlan tûr chu, berâmno hmêlhem lo paruk leh berâmpa hmêlhem lo pakhat a ni ang a; 5tin, berâmpa pakhat zêlah chhang hlan epha khat, berâmnotêah chuan a pêk theih ang ang leh, epha khatah hriak hin khat zêl a ni ang. 6Thla thar nîah chuan bâwngpatuai hmêlhem lo pakhat, berâmno paruk leh berâmpa pakhat a ni ang a, hmêlhem lo an ni vek tûr a ni. 7Chhang hlan a buatsaih ang a, bâwngpatuaiah epha khat, berâmpaah epha khat, berâmnotêah a theih ang ang, leh epha khat zêlah hriak hin khat a ni tûr a ni. 8Tin, lal chu a luh lamin kawngka in sumhmunah a lut ang a, chutah vêk chuan a chhuak leh tûr a ni. 9Vântlângte erawh chu kûtni vângthlaa Lalpa hmaa an lo kal chuan, Pathian chibai bûk tûra hmâr lam kawngka ina lo lût chu chhim lam kawngka inah an chhuak ang a, chhim lam kawngka ina lo lût chu hmâr lam kawngka inah an chhuak thung ang; an luhna kawngka inah chuan an kîr tûr a ni lo va, a hma lamah an kal zêl zâwk tûr a ni. 10Tin, an luh chuan lal chu an zîngah a lût ve tûr a ni. 11Tin, kût nite leh kûtpuiahte chuan chhang hlan chu bâwngpatuai pakhatah epha khat, berâmpa pakhatah epha khat, berâmnotêah a pêk theih ang ang, epha khatah hriak hin khat zêl a ni tûr a ni.
12Tin, lalin duh thûa thilhlan a hlan dâwn chuan hâlral inthawina emaw, remna thilhlan emaw Lalpa hnêna duh thûa thilhlan anga a hlan dâwn chuan, khawchhak lam hawi kawng chu a hawnsak ang a, Chawlhnia tih ang bawkin hâlral inthawinate leh remna thilhlante chu a buatsaih ang; tichuan, a chhuak ang a, a chhuah hnuah kawng chu an khâr ang.
Ni tin thilhlan tûr
13Ni tinin Lalpa hnêna hâlral inthawi nân berâmno kum khat mi, hmêlhem lo i hmang ang a, tûk tinin i hmang tûr a ni. 14Tin, tûk tinin chhang hlan i buatsaih ang a, epha hmun ruka ṭhena hmun khat leh hriak hin khat hmun thuma ṭhena hmun khat, chhangphut dip tak tihhnâwn nân. Chu chu kumkhuaa Lalpa hnêna chhang hlan dân tûr a ni. 15Hetiang hian hâlral thil hlân fo tûrin berâmnotê te, chhang hlan te, hriak te tûk tinin an buatsaih tûr a ni,” tiin.
Lalin ram a pêk
16 Lalpa Pathian chuan heti hian a ti a ni: “Lalin a fapate, tu hnênah pawh, ro chan eng pawh a pêk chuan a fapate ta a ni ang a, an roluah a ni mai. 17Mahse, a ro chana mi chu a rawngbâwltu tu emaw hnêna a pêk chuan, bâwih chhuahna kum thlengin a nei ang a, chutah chuan lal hnênah a pe kîr tûr a ni; ama ro pângngai erawh chu a fapate ta tûr a ni ang.#Lev 25.10 18Chu lovah pawh, lalin mite ro chan a chhuhsak tûr a ni lo va, an in leh lo ata a hnawt chhuak tûr a ni hek lo; ama ta ngeia mi chu a fapate hnênah ro chan a pe tûr a ni, mahni in leh lo ata mite an vah darh loh nân,” a ti a.
Temple chaw chhum in
19Tin, kawngka in sîra puithiamte tâna pindan serh hmâr lam hawiah chuan mi hruai lût a; tin, ngai teh, a kawmchâr khawthlang lampangah chuan hmun a lo awm a. 20Tin, ani chuan ka hnênah, “Hei hi puithiamten thiam loh vânga thilhlan leh sual vânga thilhlan an chhumna hmun, chhang hlan an urna hmun a nih hi; hung chhûng pâwnta zâwkah an ken chhuaha, mite chu mi serha an siam loh nân,” a ti a. 21Tin, hung pâwnta zâwkah chuan mi hruai chhuak a, hung chhûng kil hrûlah chuan mi kaltîr a; tin, ngai teh, a hung chhûng kil ṭheuhvah chuan hung a awm leh a. 22Hung chhûng kil liah chuan hung, bang nei, a dung tawng sawmli, a vâng tawng sawmthum a lo awm a; chûng a kila mi palite chu a intiat vek a ni. 23Chûng hmun li chhûng lamah chuan a vêlin lung an rem tlar a, chumi tlar hnuaiah chuan a vêlin chhumna tûr thuk a awm a. 24Tin, ka hnênah, “Hêngte hi chhumna in, in pui rawngbâwltuten mite inthawina sa an chhumna tûrte chu a nih hi,” a ti a.
Currently Selected:
EZEKIELA 46: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.