2 JOHANA 1
1
Chibai bûkna
1-2Upa chuan,
Hmeichhe ṭha thlan leh a fate hnênah:
Thutak, keimahnia awm reng, kumkhua pawha kan hnêna awm tûr avâng hian tihtak zetin ka hmangaih che u a ni; kei chang ka ni lo ve, thutak chu hria apiang pawhin a ni.
3Pa, Pathian leh Pa Fapa, Isua Krista hnên ata khawngaihna te, zahngaihna te, remna te chu, thutak leh hmangaihnain kan hnênah a awm ang.
Thutak leh hmangaihna
4Pa hnên ata thupêk kan hmuh ang khân i fa, tute emaw thutaka awmin ka hmuh avângin ka lâwm hle a ni.
5Hmeichhe ṭha, i hnênah thupêk thar ziak ang ni lovin, a tîr ata kan neih ang kha ziak zâwkin, kan inhmangaih tawnna tûrin ka ngên chiam a che. #Joh 13.34; 15.12,17 6Tin, hei hi hmangaihna a ni, ama thupêk ang zêla kan awm hi. Thupêk, a tîr ata in hriat ang chu hei hi a ni, chumiah chuan in awm tûr chu. 7Bumtu tam tak - Isua Krista chu tisain a lo kal tih ṭan lotute kha - khawvêlah hian an lo chhuak ta si a. Chutiang mi chu a ni, bumtu leh Krista dodâltu chu.
8Kan thawh chhuah sate kha in hloh lohva, a man chu a kima in hmuh theih zâwk nân invêng ṭha rawh u. 9Tu pawh Krista zirtîrna thûa awm reng lova, kal pel chuan Pathian a nei lo ve. Chumi zirtîrna thûa awm reng erawh chuan, chu mi ngei chuan Pa leh Fapa a nei kawp a ni. 10Tu pawh chumi zirtîrna thu chu rawn keng lovin in hnênah lo kal sela, in inah thlentîr suh ula, ṭawngkam ṭha pawhin thlah suh u; 11ṭawngkam ṭhaa thlahtu chu a thil tihsualah chuan a tel ve si a.
Inthlahna chibai
12In hnênah thu tam tak sawi tûr ka neih avângin lehkha leh lehkhatuiin ziak ka duh lo ve; in lâwm a kim theih nân in hnêna lo kala, inhmatawna inbiak ka beisei zâwk a ni.
13I laizâwnnu thlana faten chibai an bûk a che.
Currently Selected:
2 JOHANA 1: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.