1 LALTE 3
3
Solomona finna dîlin a ṭawngṭai
(2 Chr 1.3-12)
1Tin, Solomonan Aigupta lal Pharaoa nêna inkûngkaihna a siam a, Pharaoa fanu a nei a; ama in leh Lalpa in a sak hma leh, Jerusalem khua kulha a hung vêl hma loh chuan Davida khawpuiah a awmtîr a. 2Mipuihote chu hmun sângahte an inthawi mai ṭhîn a, chumi hma chuan Lalpa hming atân in sak a la awm rih loh avângin. 3Solomona chuan Lalpa chu a hmangaih a, a pa Davida thuruatte chu a zâwm ṭhîn a; hmun sângahte a inthawi a, rimtuite a hâl mai ṭhîn pawh a.
4Tin, lal chu inthawi tûrin Gibeon khuaah a kal a, chu chu hmun sâng pawimawh taka chu a ni si a; Solomona chuan chumi maichâm chungah chuan hâlral thilhlan sângkhat zet a hlân a.
5Tin, Gibeon khuaah chuan Lalpa chu Solomona hnênah zânah a mumangah a rawn inlâr a; tin, Pathianin, “Dîl teh, eng nge ka pêk ang che?” a ti a. 6Tin, Solomona chuan, “I chhiahhlawh ka pa Davida kha i mit hmuha thutakah leh, felnaah leh, thinlung dik tak pua a awm ang zêl khân nang chuan a hnênah khawngaihna nasa tak i lantîr a; nangin he khawngaihna nasa tak hi a tân i vohsak a, nangin a lalṭhutthlênga ṭhu tûr fapa i pe a, vawiina a lo awm ta ngei ang hian. 7Tichuan, aw Lalpa ka Pathian, nangin i chhiahhlawh hi ka pa Davida aiah chuan lalah i lo siam ta a; kei zawng naupangchhia mai ka ni a, thu haw lam leh kal lam pawh hi ka la hre lo va. 8I chhiahhlawh hi i mite i thlanho, mi tam tak, an tam avânga chhiar sên rual loh leh, a zât hriat sên rual lohte zîngah hian a awm a ni a. 9Chutichuan, i mite rorêlsakna tûrin i chhiahhlawh hi hriatna thinlung pe ang che, a chhia leh a ṭha ka thliar theih nân. I mi heti zozai hi tuin nge rorêlsak thei ang le?” a ti a. 10Tin, Solomonan chu thil chu a dîl avângin, chu thusawi chuan Lalpa a tilâwm hle mai a. 11Tin, Pathianin a hnênah, “Nangin i tân dam reina dîl lova, hetiang hi i dîl zâwk avâng leh, i tân hausaknate pawh dîl lova, i hmêlmate thihna pawh dîl lova, i tân rorêl thiamna i dîl zâwk avângin; 12ngai teh, i dîl ang chuan ka ti ta a; ngai teh, finna leh hriatna thinlung ka pe a che; tichuan, i hmaah nangmah ang rêng rêng tu mah an awm lo va, i hnuah pawh nangmah ang rêng rêng tu mah an awm tawh hek lo vang. 13Tin, i dîl loh, hausakna leh ropuina pawh ka pe bawk a che; tichuan, i dam chhûngin lal zîngah chuan nangmah ang rêng rêng an awm lo vang. 14I pa Davidan a zawh anga ka thuruatte leh ka thupêkte pawm tûra ka kawngte i zawh chuan ka dam reitîr bawk ang che,” a ti a. 15Tin, Solomona chu a han harh a; ngai teh, mumang a lo ni a. Tin, Jerusalem-ah a kal a, Lalpa thuthlunna bâwm hmaah a ding a, hâlral thilhlan leh remna thilhlante a hlân a, a puipa zawng zawngte tân ruai a ṭheh a.
Solomonan thubuai khirh a rem
16Hmeichhe pahnih, nawhchizuar hi lal hnênah chuan an kal a, a hmaah an han ding a. 17Tin, hmeichhe pakhat chuan, “Aw ka pu, he hmeichhia nên hian in khata chêng dûn kan ni a; chumi ina a awm ve lai chuan nau ka hring a. 18Tin, heti hi a ni a, ka nau hrin achin ni thum hnuah chuan he hmeichhia pawh hian a hring ve a. Awm dûn kan ni a; chu ina awm keimahni pahnih ngawt lo chu, chu inah chuan tu mah mikhual awm an awm lo va. 19Tin, he hmeichhe fa hi zânah a lo thi a; a delh hlum a ni. 20Tichuan, zanlaiah a tho va, i bâwihnu hi a muthilh hlânin, ka fapa, ka bula mi chu a la a, a pawm a, a fa thia chu mi pawmtîr a. 21A tûk zînga ka fa hnute pe tûra ka han thawh chuan, ngai teh, a thi a lo ni reng mai a; nimahsela, zînga ka han en chian chuan, ngai teh, ka fapa, ka hrina kha a lo ni hauh lo mai a,” a ti a. 22Tin, hmeichhe dang chuan, “Ni lo, a dam zâwka hi ka fapa a ni a, a thia hi i fapa a ni,” a ti ve a. Pakhat chuan, “Ni lo, a thia hi i fapa a ni a, a dama hi ka fapa a ni zâwk,” a la ti tlat bawk a. Chutiang chuan lal hmaah chuan an sawi ve ve a. 23Tichuan, lal chuan, “Pakhatin, ‘A dam zâwka hi ka fapa a ni a, a thia hi i fapa a ni,’ a ti a; tin, pakhatin, ‘Ni lo, a thia hi i fapa a ni a, a dama hi ka fapa a ni zâwk,’ a ti bawk si a,” a ti a. 24Tin, lal chuan, “Khandaih mi han lâk teh u,” a ti a. Tichuan, khandaih chu lal hmaah chuan an rawn la a. 25Tin, lal chuan, “Naute dama kha bung hnihah chhuah ula, a chanve chu pakhat kha pe ula, a chanve chu pakhat kha pe rawh u,” a ti a. 26Tichuan, naute dama nu chuan a fa chu a lainat êm êm mai si a, lal hnênah chuan, “Aw ka pu, naute dama hi amah pe mai rawh, a thah zawng that lul suh ang che,” a ti a. Pakhat zâwk erawh chuan, “Ka ta ni bîk hek suh, i ta ni bîk hek suh; bung mai rawh,” a ti a. 27Tichuan, lal chuan a chhâng a, “Naute dama kha pe rawh u, that hlek suh u; amah ngei kha a nu a nih kha,” a ti a. 28Tin, Israel-ho zawng zawng chuan chu thûa lal rêl dân chu an lo hria a, lal chu an ṭih ta hle mai a; rorêlna tûrin Pathian finna chu amahah chuan a awm tih an hre ta si a.
Currently Selected:
1 LALTE 3: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.