१ तिमोथि 6
6
नसानिबा से़वारोबाहाॽरे़ लागि खाहुन्
1काक् से़वारोबाहाॽरे़ खुनिॽ दाङ्बाहाॽ मिङ्सो इङ्धाङ् पिमा लाॽरुसि फाॽआङ् मे़इःत्तुररो॥ हे़क्केलॽरिक् निङ्वाॽफुमाङ्ङिन् नु आनिॽ निसाम्मिल्ले़ कुदक्ले़ङ्वाओ आत्तिन्हाॽरे़आङ् थेआङ् पाःप्मा मे़न्छुक्तुन्लरो॥ 2नसानिबा दाङ्बा के़गप्पा से़वारोबाहाॽरे़ खुनिॽ दाङ्बाहाॽ हाराॽ इङ्धाङ् खोमा सुम्बोधाबा मे़जोक् फाॽआङ् मे़इःत्तुररो॥ खे़ङ्हाॽग नसाःन्नो खुनिॽ फुॽनुसाॽसिरो॥ खे़ल्ले़चोगुल्ले़ खे़ङ्हाॽरे़ग नुःरिक्काङ् खुनिॽ नसानिबा दाङ्बाहाॽरे़न् से़वा मे़जोगुररो, थेआङ्भे़ल्ले़ खुनिॽ याःम्बक्कोलाम् इन्धा के़घोबाहाॽग लुङ्माॽ तुक्सिङ्मनाबा नसानिबा फुॽनुसाॽसिएरो॥ कन् पाःन्हाॽ खे़ने़ॽ खे़न् से़वारोबाहाॽ हुॽमासि पोङ् हे़क्क्याङ् खे़न् पाःन्हाॽ चोक् पाङ्मासि पोङ्लो॥
याङ्साकुन्धे मिःम्जि
3आत्तिल्ले़ इङ्ले़क्के निसाम् हुॽरुसिॽ हे़क्क्याङ् आनिॽ दाङ्बा ये़सु ख्रिस्तरे़ से़क्खाबा कुनिसाम् नु से़क्खाबा कुसाम्योबा निसाम्मो मे़बत्ने़न्, 4खे़ङ्ग आङ्दिङ् लॽमारे़ यम्बा ले़ङ्सिङ्ङाङ् वाॽ, हे़क्क्याङ् खे़ल्ले़ थेआङ् मे़ले़स्सुन्लो॥ कर कुबुङ्ना कुसम्बा पाःन्सुत्लाओ पाःन्थक्काङ् खे़माॽ चोगुरो॥ हे़क्क्याङ् खे़न् पाःन्निल्ले़ नाहे़म्मा, खे़माॽ, चाःत्थि पेःक्मा नु ताप्फे़ःम्बा चप्चिहाॽरक् तारुरो॥ 5खे़ल्ले़ फे़न्निङ्वाॽ के़गप्पाहाॽ नु से़क्खा पाःन्नो मे़म्बप्मनाबाहाॽरे़ खुनिॽ लुम्मो खे़माॽ फोःक्खुॽरो॥ खे़ङ्हाॽरे़ग साम्यो इःप्मा नाःप्मा फाॽइन् याङ्साकुन्धे थक्मा लाम् फाॽआङ् मे़इःत्तुॽरो॥
6कर निङ्वाॽ तामानुबा साम्निमान्ने यम्बा इन्धाःङ् वाॽरो॥ 7आनिॽ कन् इक्सादिङ् खाम्बेःक्मो थे़माआङ् मे़न्दाःत्ते आद्ये़, हे़क्क्याङ् आल्ल आबेःक्किल्ले़आङ् थेआङ् मे़न्देॽए आबेःक्लो॥ 8हे़क्केःल्ले़ चामा थुङ्मा नु चाङ्मा आघोसुम्ने़ फाॽग्र आनिॽ निङ्वाॽ तामा पोङ्लो॥ 9कर याङ्साकुन्धेसाबा पोङ्मा निङ्वाॽ के़जोःक्पाहाॽ यरिक् याङ् थक्मा हङ्साॽमाओ नु यरिक् परिक्पा मे़क्माओ के़देॽबा इओ मे़धारो॥ खे़ल्ले़ग खे़ङ्हाॽ तुक्खेओ नु मे़क्माओ थासुसिॽरो॥ 10थेआङ्भे़ल्ले़ याङ्ङिन् मिःम्जि मे़प्माङ्ग काक् परिक्ले़न् ताप्फे़ःम्बा निङ्वाॽरे़ कुबुङ्लो॥ कुभारे़ग याङ्साकुन्धेन् मिःम्जि मे़मे़त्तुर खुनिॽ नसाःन्लाम् ताप्मे़बेॽरे़ मे़बेआङ् मे़वाॽ हे़क्क्याङ् काक् परिक्ले़न् तुक्खेःल्ले़ ते़त्तुसिआङ् मे़वाॽरो॥
पावलरे़ तिमोथिन् साम्दिङ् पिरुॽ
11कर खे़ने़ॽ, निङ्वाॽफुमाङ्ङिल्ले़ कुमनाए, कन् पाःन्हाॽलाम् लाःत्लाःत् वये़ॽओ, हे़क्क्याङ् साम्योबा, साप्चुवाबा, नसाःन्साबा, मिःम्जिसाबा, नासि के़धःप्पा, हे़क्क्याङ् चुङ्जिगे़न् नःम्माल्ले़ कुधिम् पोङ्मा तम्सिङ् चोगे़ॽओ॥ 12मे़न्नुप्मनाबा हिङ्मन्ले़न् थुम्घो खोमा फाॽआङ् नसाःन्ले़न् थङ्ङिन् नुरिक्काङ् थक्ते़ॽओ॥ यरिक् तोःन्दिहाॽ तगि खे़ने़ॽ नसाःन्निन् नुरिक्काङ् ते़न्दिङ् के़जोगुल्ले़ निङ्वाॽफुमाङ्ङिल्ले़ खे़न् मे़न्नुप्मनाबा हिङ्मन्निन् के़बिरे़आङ् के़वये़रो॥ 13काक् पाःन्हाॽ हिङ्मन् के़बिबा निङ्वाॽफुमाङ् नु पन्तियस पिलातसरे़ कुदगि नुबा तोःन्दि के़बिबा ख्रिस्त ये़सुरे़ कुदगि कन् इङ्जाङ्ङिन् पिने़रो, 14आनिॽ दाङ्बा ये़सु ख्रिस्ते़न् याम्मो ओसेःन् मे़न्धाक्सिङ्ङे थारिक् के़घोसुबा खे़न् इङ्जाङ्ङिन् इःत्ते़ नाःत्ते़र सेसे नु आप्तिक् मेःन्ने कत्ते़ॽओ॥ 15खुने़ॽए मुॽइसाम्दाङ्बा नु हाङ्युक् दाङ्बा हे़क्क्याङ् हाङ्हाॽरे़ खुनिॽ पयम् हाङ् नु दाङ्बाहाॽरे़आङ् खुनिॽ पयम् दाङ्बाल्ले़ए सुये़म्मो ये़सु ख्रिस्तरे़ कुओसेःन्धाक्सिङ्मान् तारुॽरो॥ 16खुने़ॽओरक् आजुनि वाॽरो, खुने़ॽ सुमा नु के़प्मा सुक्मे़न्दे़प्मना ओःत्तिओ युङ्लो॥ खुने़ॽग आत्तिल्ले़आङ् मे़न्निए वाॽरो, हे़क्क्याङ् निमाआङ् मे़न्छुक्तुन्लो॥ खुने़ॽइन्ने सदादिङ् मुक्साम् नु मिङ्सो इङ्धाङ् पोङ्लरो॥ आमे़न्॥
17कन् इक्सादिङ् खाम्बेःक्मोबा याङ्साकुन्धेसाबाहाॽ अक्खेलॽरिक् इङ्जाङ् पिरे़से़ॽ—खे़ङ्हाॽ आङ्दिङ् मे़न्लॽने़न्लरो, हे़क्क्याङ् खुनिॽ निङ्साङ्ङिन् चप्ले़क्वा याङ्साकुन्धेओ मेःन्, कर निङ्वाॽफुमाङ्ङो मे़युक्खुररो॥ खुने़ॽए आनिॽ निङ्वाॽ तार फाॽआङ् कुनिङ्वाॽ हन्दुआङ् काक् आबिॽरो॥ 18हे़क्क्याङ् खे़ङ्हाॽ हाराॽ नुबा याःम्बक् के़जोःक्पा मे़बोङ्ल हे़क्केलॽरिक् वेॽहाॽनु हामा चामा खुनिॽ निङ्वाॽ मे़हन्दुर, सुयाःम्बक् मे़जोगुर लॽरिक् इङ्जाङ् पिरे़से़ॽओ॥ 19अक्खेलॽरिक् खे़ङ्हाॽरे़ ताये़म्मिल्ले़न् ने़म्भोगे़न् पाङ्यक् मे़युक्खुररो॥ हे़क्क्याङ् खे़ङ्हाॽरे़ से़क्खाबा हिङ्मन्निन् मे़दे़म्सु मे़युक्खुररो॥
20तिमोथिए, निङ्वाॽफुमाङ्ङिल्ले़ के़बिरे़बा पाःन्हाॽ नुरिक्काङ् कत्ते़ॽओ॥ कुबुङ्ना कुसम्बा अदङ् ताॽजे़ङ् नु तक्ले़ङ्वा पाःन्हाॽग इङ्ले़क्पा साम्जिःक्लो, खे़न्लाम् लाःत्लाःत् वये़ॽओ॥ 21कुभारे़ खे़न् मे़इःत्तु मे़नाःत्तुआङ् नसाःन्निल्ले़ निङ्वाॽसोक्लाम् मे़नुःक्खे़ मे़बेआङ् मे़वाॽरो॥ निङ्वाॽफुमाङ्ङिल्ले़ कुलुङ्गुम्मिन् खे़ने़ॽओ वाॽररो॥
Currently Selected:
१ तिमोथि 6: LIF
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.