१ कोरन्थि 7
7
ते़न्धाम्गे़न् मेःक्खिम्मिल्ले़ कुयाःम्बेओ
1आल्ल खिनिॽ के़साप्तुम्बा पाःन्निल्ले़ कुयाःम्बेओग इङ्गाॽ अक्खे पाःत्तुङ्लो—ये़म्बित्छाॽइल्ले़ मेःक्खिम् मे़जोगुन्निल्ले़ए नुबा पोङ्लो॥ 2कर चाराम्मा याःम्बक्किन् साॽरिक् पोङ्बाल्ले़ चोगुल्ले़ मनाःल्ले़ आबाङे मे़ल्लिङ्गे़न् मेःत् कत्तुनिरो हे़क्क्याङ् मे़न्छुमाॽइल्ले़आङ् आबाङे इत्थुङ्गे़न् ये़म्बाॽ कत्तुनिरो॥ 3हे़क्क्याङ् ये़म्बाॽइन् आबाङे कुमेःत्तिन्नु इम्मा पोङ्, हे़क्केलॽरिक्के मेःत्तिन्नाङ् आबाङे कुये़म्बाॽइन्नु इम्मा पोङ्लो॥ हे़क्केलॽरिक् मेःक्खिम्ले़न् लक्पे़न्नो अत्छिङ्मा मेःन्लो॥ 4मेःत्तिल्ले़ कुधक् सम्दाङ् आबाङे युक् मे़गत्तुन् कर कुये़म्बाःल्ले़ कत्तुॽरो॥ हे़क्केलॽरिक्के ये़म्बाःल्ले़आङ् कुधक् सम्दाङ् आबाङे युक् मे़गत्तुन् कर कुमेःत्तिल्ले़ कत्तुॽरो॥ 5मेःत् ये़म्बाॽग मे़न्नाॽसिङ्ङे मे़न्अत्छिङ्ङे सोरिक् इम्मा पोङ्लो॥ तुवा चोःक्मा फाॽआङ् कुभा ये़म्ले़ लागिरक् निङ्वाॽ तङ्माआङ् वेॽ वाॽमा पोङ्लो॥ हे़क्क्याङ् याम्मो खिनिॽग सोरिक् वये़म्मे़ॽओ मेःन्ने फाॽग्र याम्थक्निङ्वाॽ थम्मा मे़न्छुक्मना निङ्वाॽबाल्ले़ चोगुल्ले़ माफे़न्साम्मिल्ले़ लायो चोःक्मा के़बाङ्घिॽरो॥ 6कङ्ग इङ्जाङ् कुइसिःक्क मेःन्, कर हे़क्के चोःक्मा सुजा पिनिङ्बारो॥ 7काक् मनाहाॽरे़ इङ्गाॽ कुइसिक् मेःक्खिम् मे़न्जोःक्के मे़वाॽनि के़लॽबा निङ्वाॽ चोगुङ्लो॥ कर काक् मनाहाॽरे़ग निङ्वाॽफुमाङ्लाम् मेःक्खिम् चोःक्माआङ् वाॽमा इग्र मेःक्खिम् मे़न्जोःक्के वाॽमा पर्धाःम् मे़घोसुआङ् वाॽरो॥
8आल्ल मेःक्खिम् मे़न्जोःक्के के़वाॽबाहाॽ नु मेमेदुमाहाॽ अक्खे मे़त्तुङ्सिङ्लो—खे़ङ्हाॽग इङ्गाॽ कुइसिःक्के मेःक्खिम् मे़न्जोःक्के मे़वाॽइल्ले़ नुबा पोङ्लो॥ 9कर खे़ङ्हाॽरे़ आबाङे याम्सोःप्मान् युक्मा मे़न्छुक्तुन्ने़ फाॽग्र खे़ङ्हाॽरे़ मेःक्खिम् मे़जोगुरए पोङ्, थेआङ्भे़ल्ले़ खे़ङ्हाॽ चाराम्मा निङ्वाॽइल्ले़ ये़ःङ्सिङ्मार वाॽमानुःल्ले़ मेःक्खिम् चोःक्माए नुबा पोङ्लो॥
10आल्ल मेःक्खिम् के़जोःक्पाहाॽग इङ्गाॽ अक्खेलॽरिक् इङ्जाङ् पिरुङ्सिङ्लो (इङ्गाॽग मेःन्, कर दाङ्बाल्ले़रो) मे़ल्लिङ्गे़न् मेःत्तिन् इत्थुङ्गे़न् कुये़म्बाःन्नु से़म्माआङ् वाॽमा मे़नुॽने़न्लो॥ 11कर खे़न् वेॽ से़न्नाङ् वाॽने़ फाॽग्र हाराॽ मेःक्खिम् मे़न्जोःक्के वाॽनिरो, मेःन्ने फाॽग्र इत्थुङ्गे़न् कुये़म्बाःन्नु नादङ् चोःक्मा पोङ्लो॥ हे़क्केलॽरिक् इत्थुङ्गे़न् ये़म्बाःल्ले़आङ् मे़ल्लिङ्गे़न् कुमेःत्तिन् मे़नाॽरुन्लरो॥
12आल्ल खिनिॽ वेॽहाॽ अक्खे मे़त्निङ्लो (कङ्ग इङ्गाॽ आबाःन्लो, दाङ्बाल्ले़न् मेःन्लो) नसान् के़जोःक्पा नुसाॽइल्ले़ नसान् मे़न्जोःक्मनामा मे़ल्लिङ्गे़न् मेःत् कत्तुॽ हे़क्क्याङ् खे़ल्ले़ कुये़म्बाॽइन्नुए वाॽमा निङ्वाॽ चोगुॽने़ फाॽग्र, खे़न् नाॽमा मे़नुॽने़न्लो॥ 13हे़क्केलॽरिक्के नसान् के़जोःक्मा मे़न्छुमाॽइल्ले़ नसान् मे़न्जोःक्मनाबा ये़म्बाॽ कत्तुॽ हे़क्क्याङ् खे़न् कुमेःत्तिन्नुए वाॽमा निङ्वाॽ चोगुॽने़ फाॽग्र, खे़ल्ले़आङ् कुये़म्बाॽइन् लाप्फुमा मे़नुॽने़न्लो॥ 14थेआङ्भे़ल्ले़ नसान् मे़न्जोःक्मनाबा इत्थुङ्गे़न् ये़म्बाॽइन् नसान् के़जोःक्मा मे़ल्लिङ्गे़न् मेःत्तिन्नु वाॽबाल्ले़ चोगुल्ले़ निङ्वाॽफुमाङ्ङो खे़न् सेसे चोक्लो॥ हे़क्केलॽरिक्के नसान् के़जोःक्पा इत्थुङ्गे़न् ये़म्बाःन्नु वाॽबाल्ले़ चोगुल्ले़ खे़न् नसान् मे़न्जोःक्मनामा मे़ल्लिङ्गे़न् मेःत्तिन् निङ्वाॽफुमाङ्ङो सेसे चोक्लो॥ मेःन्ने फाॽग्र खे़ङ्हाॽरे़ खुनिॽ साहाॽ आसुत्थो मे़बोङ्बा वये़, कर हे़क्के मे़म्बोङ्ने़न्लो, खे़ङ्हाॽग निङ्वाॽफुमाङ्ङिल्लो सेसे मे़जोक्लो॥ 15हे़क्केसाङ् नसान् मे़न्जोःक्मनामा मे़ल्लिङ्गे़न् मेःत्तिल्ले़ इग्र इत्थुङ्गे़न् ये़म्बाॽइल्ले़ से़म्माआङ् पेःक्माए निङ्वाॽ चोगुॽने़ फाॽग्र हाराॽ पेःक्निरो॥ अक्तङ्बा याक्नाम्मो नसान् के़जोःक्मा मेःत् इग्र ये़म्बाॽ आत्तिन्नाङ् इभुत्तो मे़न्वाॽने़न्लो, थेआङ्भे़ल्ले़ निङ्वाॽफुमाङ्ङिल्ले़ आनिॽ सनारुङ्ङो वाॽसे़ने़ आउःत्ते़आङ् आवाॽरो॥ 16नसान् के़जोःक्मा मेःत्हाॽरे़ नसान् मे़न्जोःक्मनाबा खिनिॽ ये़म्बाहाॽ खिनिॽ के़जोगुम्मिल्ले़ निङ्वाॽफुमाङ्ङो मे़दाबि के़लॽबान् निङ्वाॽ मे़भेःत्छे़म्मिन्ने़ॽओ॥ हे़क्केलॽरिक्के ये़म्बाहाॽरे़आङ् नसान् मे़न्जोःक्मनामा खिनिॽ मेःत्हाॽ खिनिॽ के़जोगुम्मिल्ले़ निङ्वाॽफुमाङ्ङो मे़दाबि के़लॽबा पाःन्निन् निङ्वाॽ मे़भेःत्छे़म्मिन्ने़ॽओ॥
निङ्वाॽफुमाङ्ङिल्ले़ कुनिङ्वाॽ हे़क्के वाॽमा
17निङ्वाॽफुमाङ्ङिल्ले़ के़उःत्ते़ल्ले़ आक्खेलॽरिक् के़वये़, हाबा हे़क्केलॽरिक्के दाङ्बाल्ले़ सेःक्युक् के़जोगे़बाओ के़वाॽर पोङ्लो॥ काक् सेसेहुप्लक्को बा कन्ने इङ्गाॽ आजोःक्थिम्लो॥ 18हे़क्केसाङ् हर्दो के़हे़क्पाल्ले़ नसान् चोगुने़ फाॽग्र, खे़न् हर्दो मे़न्हे़क्मना कुइसिक् पोङ्मा मे़नुॽने़न्लो॥ हे़क्क्याङ् हर्दो मे़न्हे़क्मनाबाल्ले़ नसान् चोगुने़ फाॽग्र, खे़ल्ले़ हर्दो हे़क्मा मे़बोङ्ने़ल्लो॥ 19हर्दो हे़क्मान्#७:१९ हर्दो हे़क्मान्—यहुदि ये़म्बित्छाॽ साः के़रे़क्ले़न् खुनिॽ चुचुबाल्ले़ कुसम्मोबा होरिक्किन् मे़हे़गु मे़बिरुसिरो॥ नु मे़न्हे़क्माङ्ग यम्बा पान् मेःन्लो, कर निङ्वाॽफुमाङ्ङिल्ले़ कुसाम्योथिम् इङ्जाङ् के़इःप्पा के़नाःप्पा पोङ्माए के़ये़क्पा पाःन्लो॥ 20निङ्वाॽफुमाङ्ङिल्ले़ मनान् उःत्तुल्ले़ खे़न् आक्तङ्बा याक्नाम्मो वये़ हाबा हे़क्केलॽरिक्के खे़न् वाॽर पोङ्लो॥ 21दाङ्बाल्ले़ खे़ने़ॽ के़उःत्ते़ल्ले़ योक्#७:२१ योक्—कुभा मनाहाॽरे़ वेॽ मनान् नाम्याक् मे़म्बिए याःम्बक् चोःक्मे़बाङ्घुॽ॥ खे़न् योक् मे़मे़त्तुरो॥ के़वये़बि? हे़क्केने़ फाॽग्र निङ्साम्मो मे़ध्ये़न्ने़ॽओ, कर के़सुक्तुने़ फाॽग्र चोःक्युम्भोबा पोङ्मा तम्सिङ् चोगे़ॽओ॥ 22थेआङ्भे़ल्ले़ दाङ्बाल्ले़ उःत्तुल्ले़ योक् के़वाॽबा मनान् दाङ्बाल्ले़ चोःक्युम्भोबा कुमना पोःक्खे़आङ् वाॽरो॥ हे़क्केलॽरिक्के दाङ्बाल्ले़ उःत्तुल्ले़ चोःक्युम्भोओ के़वाॽबा मनाःङ्ग ख्रिस्तरे़ कुयोक् पोःक्खे़आङ् वाॽरो॥ 23निङ्वाॽफुमाङ्ङिल्ले़ यरिक् कुमे़ल्लुङ् हुङुआङ् खिनिॽ के़धे़ॽरिआङ् के़वयिॽरो॥ खे़ल्ले़चोगुल्ले़ मे़न्छाम् योक् मे़बोःक्खे़म्मिन्ने़ॽओ॥ 24आमिःम् फुॽनुसाॽ नु ने़ॽनुसाॽसे, मनान् उःत्ते़ल्ले़ खे़न् आक्तङ्बा याक्नाम्मो वये़, हाबा हे़क्केलॽरिक्के निङ्वाॽफुमाङ्ङिन्नु वाॽर पोङ्लो॥
मेःक्खिम्मिल्ले़ कुयाःम्बेओ सेःन्दोहाॽ
25आल्ल मेःक्खिम् मे़न्जोःक्के के़वाॽमाहाॽरे़ खुनिॽ लागि दाङ्बालाम् थेआङ् इङ्जाङ् इङ्गाॽ मे़गत्तुङ्ङिन्लो, कर निङ्वाॽफुमाङ्ङिल्ले़ कुलुङ्गुम्लाम्बा नसाःन्साबा मना कुइसिक् सुजा पिनिङ्लो॥ 26कोये़म्बा इनोगे़न् तुक्खेःल्ले़ चोगुल्ले़ आक्खेलॽरिक् खे़ने़ॽ के़वाॽ, हाबा हे़क्केलॽरिक्के के़वाॽइल्ले़ नुबा पोङ्लो के़लॽबा इङ्गाॽ निङ्वाॽ इःत्तुङ्लो॥ 27हे़क्केःल्ले़ खे़ने़ॽ मेःक्खिम् के़जोगुआङ् के़वाॽने़ फाॽग्र से़म्मा निङ्वाॽ मे़जोगे़न्ने़ॽओ॥ खे़ने़ॽ मेःक्खिम् मे़न्जोःक्के के़वाॽने़ फाॽग्र मेःक्खिम् चोःक्मा निङ्वाॽ मे़जोगे़न्ने़ॽओ॥ 28कर मेःक्खिम् के़जोगुॽने़ फाॽग्र लायो मे़बोङ्ने़ल्लो॥ हे़क्क्याङ् मेःक्खिम् मे़न्जोःक्के के़वाॽमाल्ले़आङ् मेःक्खिम् चोगुॽने़ फाॽग्र लायो मे़जोगुन्लो॥ कर मेःक्खिम् के़जोःक्पाहाॽरे़ कन् हिङ्मन्नो इनोगे़न् तुक्खेन् मे़दुमुॽरो॥ हे़क्क्याङ् इङ्गाॽग हे़क्तङ्बा तुक्खेओलाम्बा खिनिॽ ताङ्से़ःप्मानिङ् निङ्वाॽ चोगुङ्लो॥
29आमिःम् फुॽनुसाॽ नु ने़ॽनुसाॽसे, इङ्गाॽ थे पाःप्मा कोःत्तुङ्बा फाॽले़, दाङ्बान् हारा युःर पत्लो॥#७:२९ ग्रिक पाःन्दाङ्ङो “ये़म् ताङ्सा चोक्” पोङ्॥ आल्लआङ्धो मेःत् के़वाॽबाहाॽ मेःत् मेःन्ने के़वाॽबाहाॽ कुइसिक् वाॽमा पोङ्लो, 30हे़क्क्याङ् मे़रिङ् के़धक्पाहाॽ मे़रिङ् मे़न्धक्मना कुइसिक्, ओमु के़लॽबाहाॽ ओमु मे़न्लॽमना कुइसिक् हे़क्क्याङ् चिगक्वा के़गप्पाहाॽ थेआङ् मे़ङ्गप्मनाबा कुइसिक् मे़वाॽनिरो॥ 31हे़क्क्याङ् कन् इक्सादिङ् खाम्बेःक्मोबा चिगक्वाहाॽ ओगप् के़जोःक्पाहाॽ खे़प्मो निङ्वाॽ मे़म्बिमनाबा मना कुइसिक् वाॽमा पोङ्लो, थेआङ्भे़ल्ले़ कन् इक्सादिङ् खाम्बेःक्मोबा पाःन्हाॽ ले़ङ्सिङ्ङाङ् पेःक्ल पत्लो॥
32कन् हिङ्मन्नोबा निङ्साम्मो मे़ध्ये़म्मिन्ने़ॽ के़लॽबा इङ्गाॽ निङ्वाॽ चोगुङ्लो॥ मेःक्खिम् मे़न्जोःक्के के़वाॽबा मनाःल्ले़ आक्खेलॽरिक् दाङ्बाल्ले़ कुनिङ्वाॽ तासुङ्बे फाॽआङ् निङ्साम्मो थाःरो॥ 33कर मेःक्खिम् के़जोःक्पा मनाःल्ले़ग आक्खेलॽरिक् आमेःत्तिन् कुनिङ्वाॽ तासुङ्बे फाॽआङ् कन् इक्सादिङ् खाम्बेःक्मोबा पाःन्हाॽरे़न् निङ्साम्मो थारो, 34हे़क्केलॽरिक् कुनिङ्वाॽ हासिङ्लो॥ मेःक्खिम् मे़न्जोःक्के के़वाॽमा मे़न्छुमाॽ इग्र सिसादिङ् मे़न्छियाॽइल्ले़ थक्किन् नु याम्साम्मिन् सेसे कप्मा फाॽआङ् दाङ्बाल्ले़ कुबाःन्हाॽओ निङ्वाॽ पिरुॽरो॥ कर मेःक्खिम् के़बोङ्मा मे़न्छुमाॽइल्ले़ग आक्खेलॽरिक् आये़म्बान् कुनिङ्वाॽ तासुङ्बे फाॽआङ् इक्सादिङ् खाम्बेःक्मोबा पाःन्हाॽओ निङ्वाॽ पिरुॽरो॥
35इङ्गाॽग खिनिॽए नुबा के़बोःक्खिर फाॽआङ् कन् पाःन्हाॽ मे़त्निङ्बारो॥ खिनिॽ मेःक्खिम् मे़जोगे़म्मिन्ने़ॽ फाॽआङ् साक्निङ्बाग मेःन्लो॥ दाङ्बाल्ले़ कुमिमिदिङ्ङो खिनिॽ निङ्वाॽ मे़न्हासिङ्ङे कुदोःप्मा पाःन्नो वये़म्मे़ॽ फाॽआङ् निङ्वाॽ इःत्तुङ्लो॥ 36आत्तिन् मनाःल्ले़ खुने़ॽनु मेःक्खिम् पान् के़बुॽमा सिसादिङ् मे़न्छियाॽइन्नु नुबा पान् मे़जोगुम्बा कुइसिक् निङ्वाॽ इःत्तुॽआङ् खे़न् सिसादिङ् मे़न्छियाॽइन्नाङ् तुम् मे़न्छियाॽ पोङ्ल पत्ताङ् खे़ल्ले़ खुने़ॽनु मेःक्खिम् चोःक्मा पोङ् के़लॽबा निङ्वाॽ इतुने़ फाॽग्र, खुने़ॽ कुनिङ्वाॽ कुइसिःक्के चोगुररो॥ हे़क्केःल्ले़ खे़ल्ले़ लायो मे़जोगुन्लो॥ खे़ङ्हाॽरे़ मेःक्खिम् चोःक्माए पोङ्लो॥ 37कर आत्तिल्ले़ आबाङे निङ्वाॽओ इगु मे़त्छिङ्ङाङ् मेःक्खिम् चोःक्माए पोङ् के़लॽबा साक्के़ल्ले़क् होःप्पाङ् कुनिङ्वाॽ युक्मा सुक्तुॽने़ फाॽग्र खे़ल्ले़ खे़न् सिसादिङ् मे़न्छियाॽइन्नु मेःक्खिम् मे़न्जोःक्मा निङ्वाॽ चोगुॽने़ फाॽग्र नुबाए चोगुॽरो॥ 38खे़ल्ले़चोगुल्ले़ आत्तिल्ले़ खे़न् सिसादिङ् मे़न्छियाॽइन्नु मेःक्खिम् चोगुॽ, खे़ल्ले़ नुबाए चोगुॽ, कर मेःक्खिम् मे़जोगुन्ने़ फाॽग्र आल्लसाङ् नुबा चोगुॽरो॥
39हे़क्केलॽरिक् ये़म्बाॽइन् हिङ्ल थारिक्लक् मेःत्तिन् कुये़म्बाःल्ले़ कुयुक्को वाॽरो॥ कर कुये़म्बाॽइन् सिआङ्ग खे़ल्ले़ कुनिङ्वाॽ कुइसिक् वेॽनु मेःक्खिम् चोःक्मा सुक्तुॽ, कर खे़न् मनाःङ्ग नसानिबाए पोङ्मा पोङ्लो॥ 40कर आनिङ्वाॽओ खे़ल्ले़ याम्मो मेःक्खिम् मे़जोगुन्ने़ फाॽग्र कुलागि नुबा पोङ्, हे़क्क्याङ् कन् पाःत्तुङ्बाङ्ग निङ्वाॽफुमाङ्ङिल्ले़ कुसेसेमाङ्लाम् सुजा पिनिङ्बा फाॽआङ् इःत्तुङ्लो॥
Currently Selected:
१ कोरन्थि 7: LIF
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.