Maleachi 3
3
De Norecht vom Jerechtsdach un de Opproop Busse to doonen
1Kjikj, ekj schekj mienen Boote, daut hee däm Wajch ver mie reedmoakt. Un plazlich woat de Har no sienem Tempel komen, däm jie sieekjen; un de Enjel vom Bunt, nodäm jie luaren: Kjikj, hee kjemt, sajcht Gott de Häaschoa. 2Oba wäa kaun däm Dach von sienem Komen vedroagen, un wäa woat bestonen bie sienem Erschienen? Dan hee woat aus daut Schmeltfia sennen un aus de Wauschluag. 3Un hee woat setten un daut Selwa schmelten un reinjen; un hee woat de Kjinja Levi reinjen un an rein moaken aus daut Golt un aus daut Selwa, soo daut see Opfagowen däm Harn brinjen woaren en Jerajchtichkjeit. 4Dan woat de Opfagow Juda un Jerusalem däm Harn aunjenäm sennen aus en de oole Doag un aus en de lenjst vegonen Joaren. 5Un ekj woa junt nodakomen toom Jerecht un woa een iewaja Zeij sennen jäajen de Zaubra un jäajen de Ehebräakja un jäajen de faulsch Schwierende; un jäajen dee, dee de Doagesleena em Loon, de Wätfrues un de Weise bedrekjen un daut Rajcht vom Framdlinkj bieejen, un mie nich ferchten, sajcht Gott de Häaschoa. 6Dan ekj, de Har, ekj veenda mie nich; un jie, Kjinja von Jakob, jie woaren nich venicht woaren.
7Von de Doag june Vodasch sent jie von miene Sazungen aufjegonen un ha dee nich bewoat. Dreit no mie om, soo well ekj mie no junt trigjdreien, sajcht Gott de Häaschoa. Un jie sajen: Met waut sell wie omdreien? 8Doaf een Mensch Gott beroowen, daut jie mie beroowen? Un jie sajen: Met waut ha wie die berooft? En däm 10-den un en däm Häwopfa {2Mo.29,27-29}; (Priestagow). 9Met däm Fluch sent jie veflucht, un doch beroow jie mie, jie, de gaunze Nazion! 10Brinjt dän gaunzen Tieenden en daut Väarotshus, om daut Speise en mienem Hus es; un prooft mie doch doaderch, sajcht Gott de Häaschoa, auf ekj junt nich de Fensta vom Himmel opmoak un junt Säajen bat toom Äwamoot utjeeten wudd. 11Un ekj woa om junen wellen däm Fräta schellen, daut hee junt de Frucht vom Ieedboddem nich vedoaft; un de Wienstock opp däm Flekj woat junt nich mea onfruchtboa sennen, sajcht Gott de Häaschoa. 12Un aule Nazionen woaren junt jlekjlich spräakjen, dan jie woaren een goodet Launt sennen, sajcht Gott de Häaschoa.
Daut Uadeel äwa de Jerajchte un de Ojjerajchte aum komenden Jerechtsdach
13June Wieed sent driest jäajen mie jewast, sajcht de Har. Un jie säden: Waut ha wie unjarenaunda jäajen die jerät? 14Jie säden: Vejäfs es daut, Gott to deenen, un waut fa Jewenst, daut wie siene Aunwiesungen hilden, un daut wie en Trua omhäa jinjen ver Gott de Häaschoa? 15Un soo low wie nu de Äwamootje jlekjlich: Dee Gottloosichkjeit doonende sent nich blooss oppjebut worden, sonda see ha uk Gott vesocht un sent doavon jekomen. -
16Doa beräden sikj metenaunda, dee däm Harn enjsten, un de Har moakjt opp un hieed; un een Jedenkjbuak wort ver am jeschräwen fa dee, dee däm Harn ferchten un dee sien Nomen achten. 17Un see woaren mie, sajcht Gott de Häaschoa, toom Ieejentum sennen aun däm Dach, däm ekj moaken woa; un ekj woa an schoonen, aus een Maun sienen Sän schoont, dee am deent. 18Un jie woaren wadamol däm Unjascheet seenen tweschen däm Jerajchten un däm Gottloosen, tweschen däm, dee Gott deent, un däm, dee am nich deent.
19Dan kjikj, de Dach kjemt, aus een brennenda Owen; un daut woaren aule Äwamootje un jiedra Doonenda de Gottloosichkjeit too Stoppel woaren; un dee komenda Dach woat an vebrennen, sajcht Gott de Häaschoa, soo daut hee an wäda Wartel noch Aust loten woat. 20Oba junt, dee jie mienen Nomen ferchten, woat de Sonn de Jerajchtichkjeit oppgonen met Heelunk en äare Flichten. Un jie woaren utgonen un aus Mastkjalwa hupsen; 21un jie woaren de Gottloose veklunjen, dan see woaren aun janem Dach Ausch unja june Footsohle sennen, däm ekj moaken woa, sajcht Gott de Häaschoa.
22Denkjt aun daut Jesaz Moses, mienem Kjnajcht, daut ekj am opp Horeb aun gaunz Israel befoolen ha - Sazungen un Rajchte. 23Kjikj, ekj schekj junt Elia, däm Profeet, ea de Dach Gottes kjemt, de groota un ferchtboara. 24Un hee woat daut Hoat de Vodasch no de Kjinja, un daut Hoat de Kjinja no äare Vodasch dreien, doamet ekj nich kom un daut Launt met däm Baun schlo.
Currently Selected:
Maleachi 3: PBJHF
Highlight
Share
Copy
Want to have your highlights saved across all your devices? Sign up or sign in
© SW-Radio e.V.