Romanos 16
16
Ema Pablo máemechajirisi'a te majure namutu ena máimatikeneana machamuriana
1Nutuparaka'e emutu échapajirisinanu eta suítekapauchira'eyare esu apana vichamuri Febe. Taicha esu, tétavikawa'i eta suítatirawaka'i ena vichamuriana te awasare Cencreas. 2Tauri eta ejakapiraina esu, ewapinawayare te máijare ema Viákenu Jesucristo. Ímerekayare eta yátupira'i eparape'iware esu eta echamurira'i taye'e eta vé'iru'i. Ímikatakayare te jákani sukamunuirawana. Taicha esu, kamuriana'i ena suímikataruana'i. Nútiipa, tétavikawa'iware eta suímikatasiranu'i.
3Échejisinanuyare ema Áquila esupa esu mayena Priscila. Wa'i némitisikawaka ena eta nukachanemurira'i taye'e eta vikaemataneasira'i ema Jesucristo. 4Ena, wa'i nakatiekene'a'ini eta náitaresirana eta nakatiuchiranu'i. Nu'asulupayachawaka ena. Énerichuware na'asulupayachaware namutu ena apamuriana vichamuriana apawasana. 5Échejisinanuware ena apamuriana vichamuriana tiúrujikawara'iana'i te napena ema Áquila ésupa esu Priscila. Échejisinanuware ema némunarukene'i nítunakasare Epéneto. Ema tínapuka'i majakapa'i ema Cristo apaikape te nuyanapa te Acaya. 6Échejisinanuware esu María. Nusamairirika'i eta ichapemurira'i eta suímikatasira'e'i eti. 7Échejisinanuware ena nujaneanana Andrónico émapa ema Junias. Ena, nuchamurianaini'i eta vikaerataira'i. Tétavikawa'i vémunasira'i ena viti apústuleana. Ena, tínapukana'i nuye'e eta náe'isira'i ema Cristo.
8Échejisinanuware ema Ampliato, émaichuware némunarukene'i eta vé'isira'i ema Viákenu. 9Échejisinanuware ema Urbano, ema vichamuri'i taye'e eta vikaemataneasira'i ema Viákenu Jesucristo. Échejisinanuware ema némunarukene Estaquis. 10Échejisinanuware ema Apeles. Yátupi'i ema eta máimeresira'i tiúri'i eta máe'isira'i ema Cristo. Échejisinanuware ena machichanaveana ema víyara'aini Aristóbulo. 11Échejisinanuware ema apanaware nujaneana Heredión. Énapa ena machichanaveana ema víyara'aini Narciso, tétavikawa'i eta nasuapajiraiwa'i ena me Viákenu Jesucristo. 12Échejisinanuware esu Trifena ésupa esu Trifosa. Énaichuware tikaemataneakana'i ema Viákenu. Échejisinanuware esu vémunarukene vichamuri Pérsida. Tétavikawa'iware eta sukaemataneasira'i ema Viákenu. 13Échejisinanuware ema Rufo. Ema, tétavikawa'iware eta masuapira'i ema Viákenu. Échajisinanuware esu maena. Esu, tímikutijirikawa'i memena'ini eta nuye'e esu. 14Échejisinanu ema Asíncrito, ema Flegonte, ema Hermas, ema Patrobas, ema Hermes. Échajisinanu ena vichamuriana tiúrujikawara'iana te napena. 15Échejisinanu ena Filólogo, ésupa esu Julia, ésupa esu Olimpas émapa ema Nereo, ésupa esu maparape. Échejisinanuware ena vichamuriana tiúrujikawara'iana te napena.
16Puiti eta néchejisira'e'i emutu eti nuchamuriana, nuwara'a nétserareka'e emutu te máijare ema Cristo. Ani te juka, téchejika'eana namutu ena apamuriana vichamuriana te tamutu awasareana.
17Nuparapenaveana, nuwara'a ekuneuchaware naye'e ena tipanerechana'i típutsimuri'a'eana taicha nawara'a'i ti'apapika'eana eta te é'iru'i. Ena nani nakatianaka'i eta juka vímiturapi'i iárawa'u'i. 18Érajikawayare eta naye'e, taicha ena wa'i émaina'ini nakaemataneaka'ini ema Viákenu Jesucristo. Énajiwachucha nawara'a tiúrichawana. Tétavikawa'iware eta náitusira'i téchejirikawana. Títive'i eta náechajirisirawa. Étachuchasera nawara'a'i tiwayuarekana te nasamureana ena achaneana tijimuyapanereruana. 19Namutu'i tímati'eana eti, náecha'iware eta esuapajiraiwa'i. Eta taka'e, tétavikawa'i eta núrisamurewa'i ícha. Ekajurukaseraini eta íchira'i eta táurikeneana. Wa'i ekukicha eta tamaurikeneana. 20Nuti nukasiñawa'i me Viya, máimikatasira'eya íputsikawaneya ena machanerana ema Wínaraji. Tási'a, tiúriyare eta íchararakawa'i máicha ema Viya. Nuyaseakaparakaware ema Viákenu Jesucristo táetaviucha'ini eta iúrikakarewaya máicha.
21Téchejika'e ema Timoteo, ema nuchamuri'i eta vikaemataneasira'i ema Viákenu. Énapa ena nujaneanana, ema Lucio, ema Jasón, émapa ema Sosípater.
22Nuti Tercio, nuti nimiajurekavi'i eta néchejika'e nuti apana te máijare ema Viákenu Jesucristo.
23Téchejika'eware ema Gayo, ema nítekapaure'i te mapena. Etaichu'iware viúrujisirarewa'i te viyujarasirana. Téchejika'eware ema Erasto, ema tésorero'i taye'e eta awasare. Téchejika'eware ema viparape Cuarto.
24Nuyaseucha'eparaka emutu eti me Viákenu Jesucristo, táetaviucha'ini eta iúrikakarewa máicha. Amén.
Eta táichekuaraki eta majure ema Pablo
25Vijirauchira ema Viya. Ema, mawara'a'i tétumecha'eya taye'e eta é'isira'i ema Viákenu Jesucristo. Eta taka'e'i eta nukametarairuira'i, nímitukawaka'i namutu ena achaneana eta majakapirawaka'i ema Viya eta nakasiñawaira'i me Machicha. Akane eta táepanirawa'i eta apake'e, ema Viya Eterno mapanerechapa eta majakapirayare namutu ena achaneana tikasiñawanaya eta maye'e. 26Ena israelítana énapa ena apánapanenejikeneana achaneana, namutu tijakapakareanayare'i. Étaipa eta náechejisi'akeneana'i ena víyara'anaini profetana taye'e eta Takapika'ukene Ajureka. Nájinasera nákaikutiara'ini.
27¡Ema Viya, tétavikawa'i eta máitupajijiasirawa makarichu'i tijirauchakare'i tikunachakareware taye'e tamutu máitawakakayare'i eta vi'asulupayachirayare ema tiwaneka'avi'i ema Jesucristo eta makuchukuira'aviyare'i! Amén.
Currently Selected:
Romanos 16: IGB
Highlight
Share
Copy
Want to have your highlights saved across all your devices? Sign up or sign in
Nuevo Testamento Ignaciano © Sociedad Bíblica Boliviana, 2004.