Juan 11
11
Eta máepenira ema Lázaro
1Matiari'i ema achane tikaijare Lázaro, ema, máemunakasare'i ema Jesús. Tikawasa'i taye'e eta awasarechicha tikaijare Betania, náwasa'iware ena maparapenaveana, esu María ésupa esu Marta. Te jena sácheana, tikajuma'i muraka ema achane. 2Esu suka María, ésu'i esu tisipapewacha'i ema Jesús taye'e eta táijiyekene'i perfumeama, suájapewacha'iware te suchutimaka. 3Taka'e, ena nani apinana esenana tikaparapekakana náimiwanerekapa,
–Tata, ema pemunakasare tikajuma'i puiticha.
4Te máechapa ema Jesús, maka'epa:
–Eta juka jumare, wa'i taítaima'i ema Lázaro, matupara'aichusera me Viya, mawaraira'i nímereka eta majaraiwa eta maitupajijiasirawa ema Viya, nímeresirayarewa eta nítupajijiasirawa'i nuti Machichanu ema Viya.
5Jé'esare, ema Jesús yátupi'i eta máemunasira'i ema Lázaro, énapa ena esenana maparapenaveana, 6Wá'isera mayanawane'ini máima'apana'íni ema máemunakasare, manasicha'a apina'i sache. 7Tási'a, te apanapa sache, ema Jesús máichawakapa ena máimitureana:
–Viyana víchawa te Judea.
8Ena maimitureana naichapa:
–Tata maestro, kapeicha'a ena tikatianakaviana'i nawara'a'i tikapakaviana te marija'i, ¿tási'a, puiti piwara'aicha'a piyanayare ánaki naye'e?
9Ema Jesús máechejisi'a'i eta mawanekasiwa'i máichawakapa:
–Wa'i táeñamawakare'ini, yátupi eta sache tikaye'e duce ura, te vipaika te sachemu'u, wa'i vikáyutetuima'i taicha vímairirika'i taye'e eta tijara'i; 10nákanisera tipaikana'i te yátimu'u, tikayuteterejianayare'i taicha wa'i náimairirika'ini, taicha nakamunu'i eta tijara'i.
11Taka'e, te táekenepa, maka'ewarepa:
–Ema vémunakasare Lázaro máena'i tímaka'i, nuyanayaresera nukajamipanayare.
12Ena maimitureana naichapa:
–Tata, te tímaka'ipuka ema, étapa táikutiara'i eta matiwareraya tinarakainapa.
13Etasera ema Jesús eta maka'era'i taicha tepenaipa'i ema Lazaro, enasera maimitureana naimijachaichucha yátupi'i tímaka. 14Taka'e ema Jesús matupiruwapa mametakawaka:
–Tépenaipa ema Lázaro. 15Núrisamuresera eta májinanuira'i eta ánaki, tiúripanaya eta eye'e taicha íma'aya eta níchakeneyare apaesa esuapanu. Puiti viyanaya víma'apanayare.
16Taka'e, ema Tomás ema naimijareru chame, maichapa ena machamuriana maimitureana ema Jesús:
–Viyana víti apanaware te nakapakapuka ema, nakapaka'avirinewa víti apanawa.
Ema Jesús, kaechepukara'i taicha ema kaitarekara'i
17Te titekapapa, ema Jesús waipa machimapa'ini, kuatruipa sache eta maepenira'i naekaraipa'i ema Lazaro. 18Eta tayere'iwa'i eta awasarechicha Betania tachakaya'i eta Jerusalén, mapana kilómetru'i; 19kamuriana'isera ena achaneana te napena ena maparapenaveana, esu Marta ésupa esu María. Nakamitisiripana'i apaesa wa'i nakuiya'arakawa'ini ena apinana, eta maepenira'i ema naparape. 20Taka'e, te suéchapa esu Marta eta máitekapirayare'i ema Jesús, tiyanapa suákapa'i, esusera esu María sunasirichu'i te taju'e eta peti. 21Taka'e esu Marta suichapa ema Jesús:
–Tátachicha, te pitiari'ina'ini eta ani, wa'i ñikuepena'ini eñi nuparapeni. 22Wá'isera néñamawa, taicha necha'i puiti eñi Viya tijarakaviyare'i tamutu eta piyasearuya.
23Ema Jesús majikapapa:
–Ema piparape, tichawayare títareka te pimira'u.
24Esu Marta suíchawarepa:
–Yátupi, Tata, nécha'i eta ñichavirayare títareka te táitekapapa eta sácheyare náechepusiraya ena náepenakeneana.
25Taka'e ema Jesús máichawarepa:
–Jé'eware nuti, nukaitarera'i nákani nukaechepureanaya. Táitusiawa numetakavi, nákani tisuapanuanayare, tayanapanepuka náepena, nukaitarekayaresera núti; 26Namutu nákani titarekanaicha'a'i tisuapanuana'i nuti, wa'i tepenanaima'i maichekuarakirenapa eta naitaresira. ¿Pisuapanu eta juka numetaruvi'i?
27Esu sujikapapa:
–Yatupi nusuapavi, Tata, pítira yátupikenevi'i Cristo, ñichichavi eñi Viya, pítiripa piti vikuchapakenévi'i píteruyare'i te juka apake'e.
Ema Jesús tíya'a te tachakaya eta máekari ema Lázaro
28Te títapirikapa eta suéchejisira'i esu Marta maye'e ema Jesús, tiyanapa suíchu'apana'i esu suparape María, sujajaikapanapa, ánipa suícha'i:
–Eñi Maestro ñirari'i eta ani, ñikawanairipi piyanayaréji.
29Te susamapa esu María eta matiari'ira'i ema Jesús, téchepurukawanepa. Tiyanawarepa suákapa'i. 30Taicha ema Jesús wicha'a máitekapa'ini te napena. Manasirichu'i eta te suákapine'i esu Marta. 31Eta náimaira'i ena suchimarana eta suéchepusira'i súchusira'i esu María, tiyananapa náe'iekene'a'i. Náimijacha'i ena tiyanayare'i esu te máekari ema suparapeini, tíya'apanayare'i.
32Taka'e, te suítekapauchapa ema Jesús, esu María sutupirupa tépuyuka'i te máiwapechakaya tási'a, suíchapa:
–Tátachicha, te pitiari'ina'ini eta ani wa'i ñikuepena'ini eñi nuparapeni.
33Taka'e ema Jesús eta maimaira'i esu María eta suiyaira'i enapa ena juriyuana te'ikanapa'i esu, tikatisamurewapa ema apanaware, 34Tási'a, mayaserekapa:
–¿Távi'a ékari'a'i? –Máichapa.
Ena najikapapa:
–Yare, Tata, píma'a.
35Ema Jesús tiya'apa. 36Taka'e, ena juriyuana naka'epa:
–¡Íma'a, tétavikawa'i eta maemunasira'i!
37Ena apamuriana, ániware naka'e:
–Ema maka tikaimairirika'i ema púchuki, ¿tája'apuka takayema wa'i makanaraka'ini ema Lázaruinisami, apaesa wa'i makuepena'ini?
Eta máechepusira ema Lázaro te máekari
38Taka'e, ichape eta makatisamurewaira'i ema Jesús. Mapauchapa eta ekari nasekajueru'i te mari. Tatiari'iware eta márime taji'ajaka'i eta tapajakura eta ekari. 39Taka'e, ema Jesús mawanekawakapa:
–Ekaerajika eta jara tachuji'i eta máekari.
Ésusera esu Marta maparape'i eta tepena'i suichapa:
–Tata, németeaka tijecheipa jákani taicha kuatruipa'i sache eta ñépenira'i.
40Ema Jesús majikapawarepa:
–Kápachi numetakavipa, te pisuapanu yátupina, píma'ayare eta makunachakarewa'i ema Viya.
41Nakaerajikapa eta márime. Tási'a, ema Jesús máesenikapa te anuma, tiyujarakanumapa:
–Tata, nu'asulupayachavi eta pisamiranu'i. 42Wá'ikene péñauchanu eta jákani nuyasearuviana. Puiti nuyaseakavi eta pítupaijiásirawa, apaesa náima'a ena nani achaneana natiari'ikeneana'i, apaesa nakunachavi. Náechaware eta pítira'i piwanekanu.
43Te títapirikapa eta mayujarasira'i, tipiaraikapa muraka:
–Lázaro, péchepuka eta te jara piávi'a'i. Yare, piúchuka.
44Taka'e, ema máepenakeneni'i tiúchukapa. Mámapaichu'i eta máyuru'ana'i eta liensome, étapa eta máepakamira'i. Tási'a, ema Jesús maichawakapa:
–Evejapuaka eta máyuru'ana'i, apaesa mayana te mapena.
Ena tuparairukana napanerechapa nakaratakayare'i ema Jesús
(Mt 26.1-5; Mc 14.1-2; Lc 22.1-2)
45Taka'e, ena suchimarana'i esu María, eta náimaira'i eta juka máichakene'i ema Jesús, kamurianaine'i ena tisuapana'i ema. 46Natiari'isera ena apamuriana, tiyananapa naye'e ena fariseona, tikatianakana'i ema Jesús. Nametakapa eta maichakeneana'i. 47Taka'e, ena tuparairukana náimichu'apa namutu ena juéseana, tikurujikakanapa. Naka'epa:
–¿Tája'a vícharakawayare, tátanaveana? Ema maena achane, tétavikawa'i eta máitupaijiasirawa'i máicha'i eta tiáramikareana. 48Wa'i táurika'ini vísapa'ini máimiyanawa'ini, machu námuturiana náe'ika ena achaneana, masapi'ainapapuka nasuapayare ema. Nárajapainapapuka ena akenukana rumanuana eta ani. Nákipaisina'avinapapuka eta viáwasa. Nasapi'ainapapuka tiverejika'avianayare eta viáwakureana'i.
49Matiari'i ema achane tikaijare'i Caifás. Ema'i ema ichapekene'i tiyujarakara'i te jena añu'i. Taka'e, máichawakapa ena:
–Eti wa'i ímatiekene'a eta víchararakawayare, 50Németeaka nuti tiúripana máepena ema émanaina achane mawachareka eta náitaresiraina namutu ena apamuriana achaneana.
51Eta juka máechejiriruwa'i ema Caifás, wá'ineni étaina'ini táicha'ini eta máechemaraiwa'ini ema. Eta'i eta émaira'i ema ichapekene'i tiyujarakara'i te jena añu'i. Manakasamureruichu'i ema Viya eta máechejisi'a'i eta máepenirayare ema Jesús náichavene ena israelítana, 52étasera juka máepenirayare'i ema Jesús, mawacharekainapa eta naviurewa'i namutu nákani machaneranayare'i ema Viya, te apánapanenejikeneana awasareana. Wa'i tákarichu'ini eta naviurewana ena israelítana. Taicha te táekenenapa, mawara'a'i makurujimuri'ayare'i, étamurianayare'i namutu ena.
53Taka'e, takutipa eta napanereru'i ena tuparairukana eta nakapasirayare ema Jesús. 54Eta taka'e, ema Jesús waipa máimerekawa'ini eta te Jerusalén. Majunijikapa eta Judea. Tiyanapa eta te máwapa'i apake'e tachakaya eta awasare tikaijare Efraín. Manasipanapa ánaki, enapa ena máimitureana. 55Taka'e, semanayare eta Pascua, napiestara ena israelítana. Namutu ena achaneana tiávi'ana te apanana awasareana tiyanarakanapa taye'e eta Jerusalén, tisipa'akawanayare'i. 56Taka'e, ena achaneana nakunepaipa'i ema Jesús. Eta návi'aira'i te templo, téchejirikakanaipa:
–¿Tája'a ekayema? ¿Títekayarepukaji ema Jesús puiti juka piéstaya? Wa'ipuka.
57Enaipa ena tuparairukana tiwanerekanapa ena tikuneanayare ema Jesús. Te matiari'inapuka, nametapanayarepa ena tuparairukana. Tási'a, ena náimikaratakayarepa.
Currently Selected:
Juan 11: IGB
Highlight
Share
Copy
Want to have your highlights saved across all your devices? Sign up or sign in
Nuevo Testamento Ignaciano © Sociedad Bíblica Boliviana, 2004.