Mateo 3
3
Ntu Ɔkpilane Yohane Ɔ́kɔ Lɛsa
1Uwi ɔmmɔ kama ni, Ntu Ɔkpilane Yohane úsie ketele kani nkya Yudea kalɔ lɛlɔ, na úse kalɔ ɔɔkɔ́ lɛsa 2ɔnini, “Binwini kama bɛkya bina ekpidi, ɔsika uwi ɔni na Katɔti ɔdi lɛga na bula kɔyi kemmo úude.” 3Yohane ɔmɛni ndi ukyuli ɔni lɛlɔ na Katɔti Kenye Udiene Yesaia ɔ́su úse ɔnini,
“Ukyuli ɔdi ɔɔva na ketele kemmo ɔnii,
‘Binye kagyumana bite Blɔti.
Bɛklibi bina lɛlɔ bise kaduɛ bite nwuna bubo.’ ”
4Na awu ɔni na Yohane ɔkya ni, ɔƒlumu linwini na béti bédi-nwu. Na ebuo ɔku kabuli kada-nwu kavobi. Na nwuna adila ani na ɔɔdi ndi uwɔ ku baalɔlɔ bani muubile edula. 5Na bekyuli bási Yerusalem ku Yudea kalɛkɛ ku Yordan Ketu amadɔ ƒui bébo-nwu kudɔ. 6Bédie bana ala ekpidi kalɔ na Yohane ɔ́kpila-ma ntu na Yordan Ketu kemmo.
7Uwi ɔni na Yohane ɔ́nu Ƒarisiƒuɔ ku Sadukiƒuɔ pii ka badubo na ɔkpila-ma ntu ni, ɔ́su-ma ɔnii, “Amii bani mbo likyulikpi aani balakpi! Bitatɔlɔ lɛlɔ bɛnii si bákpila-mii ntu kani ni, ɔ́sa na bɛ́lɛ Katɔti kɔtu kɔni na ɔdubɔni bekyuli bekpidi kemmo. 8Bɛtina na bina ɔbladu kemmo ka bínwini kama bɛ́kya bina alaekpidi. 9Na bitakali ka Abraham kaba kemmo bebi bɛdi ɔsu ni, Katɔti ɔɔɔdubo-mii kɔtu bɔni. Mɔɔsu-mii nnii Katɔti ɔkana udie kaba ɔsiku atakpɛ amɛni kemmo ute Abraham. 10Bɛɛnu ka bada kadadi benye kugyii lɛlɔ na bada-ku ku ligyiitu. Kugyii biala naaanwu ebi buni ni, badubɔmɛnɛ-ku bakya lɛgyavonku kemmo.
11“Ami mɔɔkpila-mii ntu taatina ka bínwini kayi na bɛ́da ekpidi bɔbla bɛ́ya. Nsu ukyuli ɔni nkpɛ-mi kama ɔdubo ni, anwu ndubuti Katɔti Kɔyu ku ogya ɔkpila-mii. Ukyuli ɔmmɔ utulo-mi, na ńtamanku ka lɛbla kabla lite-nwu muedi. 12Ɔda nwuna kɔɔlɛ kɔni na ɔdubɔƒɛ nwuna edula udie na uti uwi unwu kemmo. Nsu ɔdubɔkyula aƒaƒa ku lɛmuyɔ lɛkladi na ogya ɔni naaadubo buni kudii kemmo!”
Yohane Ɔ́kpila Yesu Ntu
13Na uwi ɔmmɔ kemmo ni, Yesu ɔ́si Galilea úbo Yohane kudɔ na Yordan Ketu kɔtu ɔnii Yohane ɔkpila-nwu ntu. 14Nsu ka Yohane ɔ́yɔ ka Yesu ɔvumana nwuna kasusu kammɔ ɔsu ni, ɔ́su Yesu ɔnini, “Ami mmomu na ɔlɛka libo-ɔ kudɔ, na ɔɔɔdi awɔ na ɔlɛka ebo-mi kudɔ anii nkpila-a ntu!”
15Nsu Yesu údie kenye ɔnini, “Awɔ nu kalɔ na bɔbla-nwu lɛni ɔƒɛni asa. Ɔsika ɔmɛni ndubɔya na bɔbla Katɔti lɛƒɔyɔ.” Anwuɔsu Yohane únu kalɔ.
16Amu ka Yohane ɔ́kpila Yesu ntu na ɔ́nya ɔ́lɛ ntu bɔmmɔ kemmo kani na katɔ kálɛmi na Katɔti Kɔyu kɔ́si kɔɔyu aani abloduma kalɛ, na kúbelie-nwu lɛlɔ. 17Na bénu Katɔti lɛdi ka lɛ́si katɔ lɛnini, “Ɔmɛni ndi mina Ubi Ɔyɔne ɔni mɔɔƒɔ́-mi anu geen.”
Currently Selected:
Mateo 3: lef
Highlight
Share
Copy
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.