Mateo 2
2
Benengu Badi Bási Ɔƒɛ Katukɔ Bébo
1Uwi ɔni na Herode ɔɔdi lɛga ni, báwɔ Yesu na ɔma ɔni baalɔ Betlehem na Yudea kalɔ lɛlɔ. Na uwi ɔmmɔ kani kemmo ni, benengu bani mɔɔtɛya ala ani mɔɔlɛ́ na ayabi lɛlɔ taati badi bási ɔƒɛ katukɔ bébo Yerusalem. 2Na béye banini, “Wɛ na báwɔ ubi ɔni ndubɔdi lɛga na Yudaƒuɔ kalɔ lɛlɔ? Bɔ́nu nwuna lɛyabi na ɔƒɛ katukɔ. Na búbo bɔnii bubemwi-nwu.” 3Uwi ɔni na Ɔga Herode únu litemi lɛmɛni ni, ɔƒɛ ɔ́da anwu ku bekyuli bani nkya Yerusalem mmɔ ƒui geen. 4Anwuɔsu ɔ́lɔ Katɔti bakpane benengu bammɔ ƒui ku ɔda bubo ala batinane ɔ́sala na úye-ma ɔnini, “Wɛ na badubɔwɔ Ukyuli Ɔƒunadi ɔmmɔ?” 5Amu na básu-nwu banini, “Betlehem na badubɔwɔ-nwu na Yudea kalɔ lɛlɔ, ɔsika lɛni na Katɔti kenye udiene ɔdi únweni ɔnii,
6“ ‘Awɔ Betlehem,
bekyuli baasu ka
adi ɔma ubliidi na Yuda
kalɔ lɛlɔ.
Nsu uuuse lɛni!
Ɔsika ƒula kemmo na
ɔtɔnkune ubendi ɔdi ɔdubɔlɛ ɔsi
na watɔnku mina kadi
bekyuli Israelƒuɔ.’ ”
7Anwuɔsu Herode ɔ́lɔ baƒɔ bani nási ɔƒɛ katukɔ mmɔ úsienku kɔƒɛlɛ, na úye-ma únu uwi ɔni geen bánu ka lɛyabi lɛmmɔ lɛ́lɛ. 8Amu na údie-ma ulu ɔnii beteesie Betlehem. Na ɔ́su-ma ɔnini, “Bisie na bitáwia ɔnamu ɔmmɔ kaduɛ. Na si bɛnu-nwu ni, bɛsɔ binwini bibasu-mi na ami lɛnɔ ntémwi-nwu.”
9-10Amu na baƒɔ bammɔ báyu ulu. Na ka bésela ni, básɔ bánu lɛyabi lɛni kani na bánu na ɔƒɛ katukɔ mmɔ. Na ka bánu-ni ni, ebiti áda-ma geen. Ɔsika lɛyabi lɛmmɔ lɛ́tɔnku-ma lítédi línye kesii kani na ubi ɔmmɔ ɔtɛ. 11Na ka béduo ɔtɔ ɔmmɔ kemmo na bánu ubi ɔmmɔ ku uni Maria ni, bálɛ akɔnkɔ na bémwi-nwu. Na báƒɛnimi bana kɔvumi na béte-nwu ala abuni adi ani ndi sika ugyiedi ku oloƒui ku klobo.
12Nwuna kama ni, Katɔti ɔ́lɛ-ma na kɔna kemmo ɔnii basɔ batasia Herode kudɔ. Anwuɔsu básia ulu ɔbambadi lɛlɔ bésie bana kalɔ lɛlɔ.
Yoseƒ Úkeliku Maria Ku Yesu Úsienku Egyipte Kalɔ Lɛlɔ
13Ka baƒɔ bammɔ bátɔlɔ kama ni, Katɔti ɔtu ɔdi údie lɛlɔ ɔ́tina Yoseƒ na kɔna kemmo. Na ɔ́su-nwu ɔnini, “Herode ɔdubɔya na bawia ubi ɔmmɔ kama ulu na badu-nwu. Anwuɔsu ta, na eti ubi ɔmmɔ ku uni na bikeli bisie Egyipte kalɔ lɛlɔ. Na bitélie mmɔ utédu uwi ɔni na masu-ɔ nnii, ‘Sɔ nwini bo.’ ”
14Usien ɔmmɔ kani na Yoseƒ útiku ubi ɔmmɔ ku uni na békeli bésie Egyipte. 15Na bélie mmɔ útédu uwi ɔni na Herode úkpi. Kalɛ na bákya mmɔ ɔ́ya na ala ani na Katɔti ɔ́su úse ɔkɛ nwuna kenye bediene lɛlɔ ébo éte lɛni ɔnii, “Lɛ́lɔ mina ubi lɛ́siku Egyipte.”
Herode Ɔ́ya Na Bádu Bebi Bananabi Ƒui Na Betlehem
16Uwi ɔni na Herode úti-nwu ka baƒɔ bani nási ɔƒɛ katukɔ mmɔ bátɔlɔ-nwu ni, úti kɔnyi geen. Anwuɔsu ɔ́ya na nwuna bekpone bésie Betlehem ku amadɔ mmɔ ƒui. Na bátádu bebi bananabi bani náaƒɔ akwa anyɔ ku bani nétedu tɔ lɛni aani kalɛ na baƒɔ bammɔ béti bátina ka lɛyabi lɛmmɔ lɛ́lɛ kenye. 17Banamu bamɛni bɔdu bɔ́ya na lɛla lɛni na Katɔti Kenye Udiene Yeremia ɔ́su úse líbo líte lɛni sɔsɔ ɔnii,
18“Bekyuli bénu kɔku kɔdi
na Rama
ka beewulo momoomo.
Rahel bawɔ beewulo bana bebi.
Na belenu kɔnu bɔsia,
ɔsika bebi bammɔ békpi.”
Yoseƒ Ku Maria Ku Yesu Bénwini Bási Egyipte
19Ka Herode úkpi ni, Katɔti ɔtu ɔdi údie lɛlɔ ɔ́tina Yoseƒ na kɔna kemmo na Egyipte. 20Na ɔ́su-nwu ɔnini, “Ta, na eti ubi ɔmmɔ ku uni na asɔ enwini esie Israel kalɔ lɛlɔ. Bekyuli bani náwia ka badu ubi ɔmmɔ béekpi.”
21Anwuɔsu Yoseƒ ɔ́ta na úti ubi ɔmmɔ ku uni na bátɔlɔ bésie Israel kalɔ lɛlɔ. 22Nsu uwi ɔni na Yoseƒ únu ɔnii Arkelao ɔni ndi Herode ubidi nébo úbelie ɔti kenye aani Yudea ɔga ni, ɔ́yia mmɔ busie. Na ka Katɔti ɔtu ɔdi úbo-nwu ɔda na kɔna kemmo ɔnii utesie mmɔ ni, údeyi úsie Galilea kalɔ lɛlɔ. 23Na ka úduo mmɔ ni, útélie ɔma ɔni baalɔ banii Nasaret. Na bana mmɔ bulie ɔ́ya na Katɔti kenye udiene litemi lɛni na ɔ́su úse ɔnii, “Bekyuli badubɔlɔ-nwu banii Nasareni,” úbo úte lɛni sɔsɔ.
Currently Selected:
Mateo 2: lef
Highlight
Share
Copy
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.