Énkjínkón 12
12
Nda ti̱ꞌin ji, kó nda ku̱i̱ndyin
1Xota̱ xi tsja maa̱ nga niꞌánchji̱ni̱e̱,
kjo̱a̱a̱ nga tjórií kjo̱a̱kjínkoón,
¡ta̱nga kui xi tsjajín maá nga niꞌánxchánjoo̱,
xota̱ xi chi̱ni boá!
2Néná tsjá maá kjo̱a̱a̱ xota̱ xi ndaxotaa̱,
ta̱nga tsꞌénjérií xota̱ xi ndajín tsꞌénkjoó.
3Ngojín xota̱ xi ꞌniú kꞌuijñá, kjo̱a̱a̱ ni xi ndajín xi tsꞌén,
ta̱nga xota̱ xi kixi̱i̱ jmíjín xi sa̱ꞌíntíyaá.
4Chjo̱on xí ndaxotaa̱ achichí ndatsꞌèn tsꞌénkꞌijñá xi̱ꞌii̱n,
xikó maá tsi kui xi ma ngo korona̱ xi ꞌbíꞌá toko,
ta̱nga kui chjo̱on xí ndajiín, kuí boá xi tsꞌenkjié kjin kjo̱a̱ xi̱ꞌii̱n,
xikó maá chiꞌindíꞌyó xí tsꞌenkjié ńdaná.
5Ni xi tsꞌénkjó xota̱ xi kixi̱, kjo̱a̱kixi̱i̱ boá,
ta̱nga ni xi tsꞌénkjó xota̱ xi ndajiín, kjo̱a̱chꞌáṉcha̱ boá.
6Kjiꞌanga chji̱a̱ xota̱ xi ꞌniú ndajiín,
chja̱ya̱ xi tsꞌenkꞌiénná boá xi ꞌbíndoo̱ xotaa̱,
ta̱nga kjiꞌanga chji̱a̱ xota̱ xi kixi̱i̱,
kuí nii̱ xi ꞌboxiéꞌá kui xotaa̱.
7Xota̱ xi ꞌniú ndajiín bixó, kó ta̱ ki̱a̱ tji̱e̱n fe ni xi tsꞌén,
ta̱nga xota̱ ndiꞌaa̱ xota̱ xi kixi̱i̱, ꞌniú ꞌbíndo.
8Ndikón niꞌánjo̱ xotaa̱,
ta̱ xikó kjiꞌi nga kjínkón,
ta̱nga xota̱ xi ni xi ndajín
tjíjin ngi̱jin ini̱ma̱a̱, niꞌánchꞌó.
9Chjí ngasenii̱ nga si̱ꞌanchꞌo ngo xota̱ xi tjiín xota̱ xi tsꞌenseén,
ta̱bo̱a̱jiín ngo xota̱ xi nkꞌakon xi nde nichinie jmíjiín.
10Xota̱ xi kixi̱i̱ makjiín nga kjo̱a̱ni̱ma̱ foaꞌatio cho̱o̱,
ta̱nga xota̱ xi ꞌniú ndajiín
achichí nga ndajín ini̱ma̱a̱.
11Xota̱ xi tsꞌénxájin tꞌanangii̱, tsie nichinie kꞌuieé,
ta̱nga xota̱ xi tsꞌénkámajo̱ xota̱ xi tjimásoón, xota̱ chi̱ni boá.
12Ni xi ndajín xi mejeén sa̱ꞌín, xota̱ xi ꞌniú ndajiín,
kuí nii̱ xi chja̱ya̱a̱ ka̱ma,
ta̱nga xota̱ xi kixi̱i̱,
kuí boá xi xikónií ngo yá xí achichí to boajaá.
13Xota̱ xi ndajiín ti̱kuíní xi ꞌbókayá
chja̱ya̱a̱ kjo̱a̱ndiso xi chji̱a̱,
ta̱nga xota̱ xi kixi̱i̱ kjo̱tjongírií yojoo̱ kjo̱a̱a̱ ni xi ndajiín.
14Kuí ni nda xi chji̱a̱ xotaa̱ xi sa̱ꞌíntsiee̱,
kó bo̱a̱ tsꞌén ka̱machjií, kjo̱a̱a̱ xikótsꞌèn sa̱ꞌínxá.
15Xota̱ xi kitikjo̱a̱a̱ sꞌijin maá
nga nda boá ngayeje ni xi tsꞌén,
ta̱nga xota̱ xi kjínkoón ntꞌiéꞌeén kjo̱a̱botíxomaa̱.
16Xota̱ xi kitikjo̱a̱a̱, ta̱tra bokó nga tsꞌénxchán,
ta̱nga xota̱ xi kjínkoón tsꞌénjétakón ni xi ndajín xi ꞌmií.
17Xota̱ xi kixi̱i̱, kjo̱a̱kixi̱ boá chji̱a̱,
ta̱nga chistiko̱ ndisoo̱, kjo̱a̱ndiso boá xi chji̱a̱.
18Xota̱ xi ta̱xkiya chji̱a̱a̱,
tsꞌénꞌónná eén xikoó tsi ngo kichiro̱,
ta̱nga ni xi chji̱a̱ xota̱ xi kjínkoón,
xikónií tsi ndiki xi tsꞌéndàyà nínga onná.
19Xota̱ xi chji̱a̱ ni xi kixi̱i̱, ngatsjéni̱xtjin nga ꞌbíjñá,
ta̱nga xi chji̱a̱ éndísoó, tsiejín ꞌbondíyaá.
20Kjo̱a̱ndiso boá xi tjíjin ngi̱jin ini̱ma̱a̱ xota̱ xi ni xi ndajín tsꞌénkjó,
ta̱nga kjo̱a̱tsja boá xi tjíjii̱n xota̱ xi ni xi ndaa̱ tsꞌénkjó.
21Nde ngojín ni xi ndajín xi ka̱maa̱ xota̱ xi kixi̱i̱,
ta̱nga xota̱ xi ꞌniú ndajiín, ta̱ ngo ndi̱yà kji̱ndi̱bánié ngayeje ni xi ndajiín.
22Achichí chꞌoó Néná xota̱ xi ꞌbindísoó,
ta̱nga achichí tsjá maá kjo̱a̱a̱ xota̱ xi ni xi kixi̱ chji̱a̱a̱.
23Xota̱ xi kjínkoón, nde bokójín ni xi be,
ta̱nga xota̱ xi kitikjo̱a̱a̱, ngayeje xi tsóyaà ni chi̱ni xi tsꞌén.
24Xota̱ xi tsꞌénxaá, kuí boá xi ko̱tíxomaa̱ kje̱ꞌe xota̱,
ta̱nga xota̱ xi tsiꞌeé ngatsjéni̱xtjin nga mosoo̱ kje̱ꞌe xota̱ ka̱ma.
25Ndasen maá ini̱ma̱a̱ xotaa̱ kjiꞌanga nda̱ maa̱,
ta̱nga achichí kjo̱a̱tsja tsjaá ngo én xí nda.
26Xota̱ xi kixi̱i̱ nda botixómaá xota̱ xkjín,
ta̱nga xota̱ xi ꞌniú ndajiín, ki̱a̱ chajajin ngi̱jii̱n ni xi ndajiín.
27Xota̱ xi tsiꞌeé nde cho̱ xi tsꞌenkꞌién ꞌbítsjójín,
ta̱nga xota̱ xi tsꞌénxaá, tjoninkꞌaa̱ yojoo̱.
28Ni xi kixi̱i̱ ki̱a̱ fíjo̱ná kjo̱a̱mindyioo̱n,
kó kui ndi̱ya̱à jmíjiín kjo̱a̱bo̱ya.
Currently Selected:
Énkjínkón 12: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014