Markoo̱ 6
6
Bi̱ tsꞌén kijíndikoón xotaa̱ kjo̱a̱a̱ Kjisoo̱
(Mat 13:53-58; Rka 4:16-30)
1Kó Kjisoo̱ jatjo kui ngi̱ndiee̱, sꞌe̱ kijí nangii̱, kó nijan kijíjo̱ xota̱ tsi̱ꞌe̱. 2Kó nga jachó ni̱xtjin ndikoón, Kjisoo̱ ítsꞌi̱yanii̱ nga akóyá ngi̱ya ndiꞌa nínga ndokjo̱a̱ eén Néná. Kó achichí má xota̱ xi kijíndikoón nga tsintꞌieé, kó bi̱ katsó nga asíyaá xkjín:
–Ñá tsꞌaxiéni kui nda̱a̱ ngayeje kui nii̱. Ñá kijíkjaꞌání kui kjo̱a̱kjínkoón, ko̱jo kui kjo̱a̱ndikón xí tsꞌénní ngi̱ya tsja. 3A kuijín xí nda̱a̱ nda̱ chji̱ni̱e̱ya̱á, ndií na̱ Riyaa̱, ntsꞌi̱e̱ Sandiyaá, ko̱jo Kosiee̱, ko̱jo Jundaa̱, ko̱jo Ximoo̱. A kꞌi̱e̱jín síndojo̱na ínchjín ndichja.
Kó kui xotaa̱ katsꞌénjo̱ꞌojín Kjisoo̱. 4Ta̱nga Kjisoo̱, bi̱ katsoó:
–Ta̱jñàní nga yandikón ngo nda̱chji̱ni̱e̱ꞌe̱én Néná, ngototo ki̱a̱ nangii̱, ko̱jo ngi̱jii̱n xkjín, ko̱jo ndiꞌaa̱ nínga yandikónjín.
5Kó Kjisoo̱ nde ngo kjo̱a̱ndikón katsꞌénjín nangii̱, ta̱ chiboa tsí xota̱ xi oo̱n xi katsꞌéndaya nga yejénnié tsja. 6Kó Kjisoo̱ achichí kijíndikoón kjo̱a̱a̱ nga kisꞌijinjiín kui xotaa̱. Kó kijí ndí nangi xi síndotꞌa kui ngi̱ndiee̱ nga akóyá.
Kjisoo̱ bi̱ tsꞌén katsjáxaá nga tiejó xota̱a̱
(Mat 10:5-15; Rka 9:1-6)
7Kó Kjisoo̱ ngije tsíchji̱a̱a̱ nga tiejó xota̱a̱, ítsꞌi̱yanii̱ nga katsangiya xki̱ jó jó, kó katsjaá xá tsi̱ꞌe̱ nga ka̱maa̱ kꞌo̱xié a̱siénni̱xtjin xi ndajín. 8Ko̱jo atíxomaa̱ nga jmí ni ko̱a̱ꞌa̱jín tsi̱ꞌe̱ ndi̱ya̱à, ti̱nde pan, ti̱nde stsa, ti̱nde to̱n ko̱a̱ꞌa̱jín tꞌa tji̱xi̱ín, ta̱ ngo tsí yánísié xi ko̱a̱ꞌa̱. 9Ko̱jo ngo tsí ꞌniú tji̱xíndié xí ko̱óyá, ta̱nga ka̱májín jó chi̱nga ko̱a̱ꞌa̱. 10Kó bi̱ katsoó:
–Ta̱ nínga ku̱i̱tjásꞌi̱e̱njnú ngo ndiꞌa, ki̱a̱ ti̱ndyiónjnú ngaskande nga kjo̱tjo nginíjnú kui ngi̱ndiee̱. 11Kó tsi ngo ngi̱ndie xi ndajín si̱ꞌanjo̱jnú, ko̱jo tsi ko̱nda̱ꞌyájín én xí ko̱ndókjo̱a̱jnú, tja̱tjójnú ki̱a̱a̱, kó tꞌítsaniejnú xa̱ xi ko̱a̱ꞌa̱ tji̱xíndiéjnú, tsi̱ꞌe̱ nga sku̱i̱e̱ kui xotaa̱ nga ndajínkjiꞌi ni xi katsꞌén. Ja̱koxi̱ ni xi xiánjnúꞌun nga ni̱xtjin nga ka̱majeé xotaa̱, chiboa ngase ka̱ma jé xí sa̱ko̱ó xota̱ na̱xi̱ńdáꞌniú Sondoma̱ ko̱jo na̱xi̱ńdáꞌniú Ngomorra̱ ta̱bo̱a̱jiín xikó kjiꞌi ni xi ka̱maa̱ kui xota̱ xi bo̱a̱ sa̱ꞌínjo̱jnú.
12Kó kijí xota̱ tsi̱ꞌe̱ Kjisoo̱ nga kijíkꞌini̱jmi̱ì xotaa̱ nga sa̱ꞌínkꞌoyà yojoo̱ kjo̱a̱a̱ jé xí ndyi̱tsꞌèn. 13Kó kjín xindajín tsꞌaxié, ko̱jo kjín xota̱ xi oo̱n katsꞌéndaya nga katsangijon isti̱.
Bi̱ tsꞌén kꞌien Jua̱ xi botíndaá
(Mat 14:1-12; Rka 9:7-9)
14Kó nga tsintꞌié nda̱ re Erondee̱ kjo̱a̱a̱ ni xi katsꞌén Kjisoo̱, ngatꞌa̱ ꞌniú ton ton kandaꞌyá jaꞌeén, bi̱ katsó:
–Jua̱ xi botíndaá boá xi jaꞌáꞌyaá ngi̱jii̱n xota̱ xi jesoón, kuíni nga tjiín ngaꞌniú nga tsꞌén kjo̱a̱ndikón.
15Kje̱ꞌe xota̱ xi bi̱ katsó:
–Eliyaa̱ boá.
Kó kje̱ꞌe xí bi̱ katsó:
–Nda̱chji̱ni̱e̱ꞌe̱én Néná boá, ko̱jo tsi kuí boá xi ngo nda̱chji̱ni̱e̱ꞌén xchaá Néná.
16Ta̱nga nga tsintꞌié kuí nii̱ nda̱ re Erondee̱, bi̱ katsó:
–Juaa̱ boá. Kui nda̱ xi an katsja an kjo̱a̱ nga ikichásén to̱ko̱, kó ngotꞌe̱ ꞌne̱ jè jaꞌáꞌyaá ngi̱jii̱n xota̱ xi je jesoón.
17Ngatꞌa̱ ti̱kuíní Erondee̱ xi katsangiya jájuún nga katsangisꞌien ndo̱bo̱a̱yà Juaa̱, kó ítaꞌniú ńꞌniúki̱cha̱ ngi̱ya ndo̱bo̱a̱yà jàn ta̱ngatꞌanii̱ na̱ Erondíaa̱, chjo̱ón ntsꞌi̱e̱ Erondee̱ xi ꞌmí Ngiripee̱, kjo̱a̱a̱ nga Erondee̱ kisꞌijñajo̱ na̱ Erondíaa̱. 18Ngatꞌa̱ Juaa̱, bi̱ katsoó Erondee̱:
–Kjo̱a̱kitii̱ tsjandièjín nga chjóo̱n ka̱ma chjo̱ón nda̱ ntsꞌie.
19Kó kuíni nga na̱ Erondíaa̱ chꞌo kamaá Juaa̱, kó kamámejeén katsꞌénkꞌién, ta̱nga kamájiín, 20ngatꞌa̱ Erondee̱ katsakjónní Juaa̱, kjo̱a̱a̱ nga ta̱nisién ngo nda̱ xi kixi̱ kamá, ko̱jo tsjie kistsoꞌbájo̱ yojoo̱, kó kuíni nga ta̱sá askoo̱n. Kó kjiꞌanga tsintꞌié ni xi katsóyà Juaa̱, nde bejín mí xí sa̱ꞌínkjó, ta̱nga ti̱ kuí xi tsja kamaá nga tsintꞌieé. 21Kó ta̱ kjiꞌá má kasakondieè nga katsꞌén ngo sꞌué Erondee̱ nga jachónó, kó jachókjiniejo̱ ṉño̱ ngayeje já cho̱n, ko̱jo já ngito̱ko̱o̱ jájún, ko̱jo xota̱ xi yandikón xi síndo nangi Ngalilea̱. 22Kó nga tsꞌasꞌien tsa̱kji̱ín na̱ Erondíaa̱, kitié, kó achichí tsjá kamaá Erondee̱, ko̱jo xota̱ xi síndotꞌajo̱ yámíxa̱. Kó nda̱ ree̱, bi̱ katsoó kui tsa̱kji̱ín:
Ta̱ ni xi mejeénri chji̱e̱ꞌéní, kó an tsjaa.
23Kó bi̱ katsó ngasee̱:
–Ngiboanéná nga ta̱ ni xi chji̱e̱ꞌéní xí tsjaa, ngaskande masien ngi̱ndie nínga botixoma an tsi mejeén.
24Kó nga jatjo kui tsa̱kji̱ín, bi̱ katsoó na̱aa̱n:
–Mí xí kuíꞌáa̱ ree̱.
Kó na̱aa̱n, bi̱ katsoó:
–Chji̱e̱ꞌèe̱ to̱ko̱ Jua̱ xi botíndaá.
25Kósꞌe̱ kui tsa̱kji̱ín tsá kijíkón nginií nda̱ ree̱, kó bi̱ katsoó:
–Mejénna nga kꞌuiyéti̱bo̱a̱ní to̱ko̱ Jua̱ xi botíndaá ngotꞌe̱ má.
26Kó achichí ndasen kisꞌijña nda̱ ree̱, ta̱nga kjo̱a̱a̱ nga jè katsjá tsꞌoa, kó nga ngayeje xota̱ xi síndojo̱ tꞌa yámíxa̱a̱ tsintꞌié kuí nii̱, kuíni nga kjo̱a̱ꞌniútjínnií nga katsꞌénkjatjosoón kui tsa̱kji̱ín. 27Kó tji̱e̱nmá nda̱ ree̱ katsangiya ngo nda̱juu̱n xi katsjaákjo̱a̱ nga kjo̱e̱ꞌéjoo̱ to̱ko̱ Juaa̱. 28Kó kui nda̱juu̱n kijí ngi̱ya ndo̱bo̱a̱yà jàn, kó tsatiesen to̱ko̱ Juaa̱, sꞌe̱ íyá ngo ti̱bo̱a̱, kó katsjaá kui tsa̱kji̱ín, kó kui tsa̱kji̱ín na̱aa̱n katsjaá to̱ko̱ Juaa̱.
29Nga tsintꞌié xota̱ tsi̱ꞌe̱ Juaa̱ kui ni xi kamaá, jachókjaꞌá yojo kꞌiee̱n Juaa̱, sꞌe̱ kijíkanijín.
Bi̱ tsꞌén katsꞌénkjíén Kjisoo̱ ún mi̱ xota̱
(Mat 14:13-21; Rka 9:10-17; Jua 6:1-14)
30Kósꞌe̱ já apostroo̱ kamátikójo̱ Kjisoo̱, kó íni̱jmi̱ì ngayeje ni xi katsꞌén ko̱jo ni xi akóyá kui jaá. 31Kó Kjisoo̱, bi̱ katsoó kui jaá:
–Ja̱bíjnúꞌun ngayejejnú, tjiàn ni̱ꞌankjaꞌyá chií ngo ngi̱ndie xi xió kjiꞌi.
Ngatꞌa̱ achichí má xota̱ xi bo̱a̱ fí bo̱a̱ ndibá katsꞌén, kó ngaskande jmí ngi̱ndie kisꞌiejiín nga iskjinie ṉño̱. 32Kó ngo tjotso je kijíyà nga kijí ngo ngi̱ndie kjiꞌitiya. 33Kó kjín xota̱ xi kamábe nga kijí, kó kamákjiín nga Kjisoo̱ ko̱jo xota̱a̱ xi̱ꞌba̱, kó kui xota̱ kjiín kijíyise, kó kui tjón ngase jachó kui ngi̱ndiee̱. 34Kó nga jatjajen Kjisoo̱ tjotso jee̱, kamábe xota̱ kjiín, kó ni̱ma̱ kamaá ngatꞌa̱ kui xotaa̱ tjimá, xikó maá cho̱tsa̱nga̱ xi jmí ndi̱a̱jiín, kó ítsꞌi̱yanii̱ nga kjín ni akóyaá. 35Kó ngije kamángixoón, xota̱ tsi̱ꞌe̱ Kjisoo̱ kijíkóntiñaa̱ Kjisoo̱, kó bi̱ katsoó:
–Kjitiya kuí ngi̱ndiee̱ kó achichí je sájín. 36Ti̱ꞌinkjí kui xotaa̱ ꞌne̱, tsi̱ꞌe̱ nga ko̱e̱je̱ nínga jno̱o̱, ko̱jo ndí nangi xi síndo tiñaa̱ tsi̱ꞌe̱ nga kꞌo̱tsie nichinie.
37Ta̱nga Kjisoo̱, bi̱ katsó:
–Jún te̱ꞌéjnúu̱ ni xi skji̱ni̱e̱.
Kó bi̱ katsó kui jaá:
–A mejeénri nga kongínꞌñátsiéjne̱ jó úchán poxo̱ to̱n ndenario̱ pan, tsi̱ꞌe̱ nga ko̱e̱ꞌeé ni xi skji̱ni̱e̱ kui xota̱ kjiín.
38Kó Kjisoo̱, bi̱ katsó:
–Kótjín má pan xi kichꞌiájnú jún. Tangínkꞌíxki̱jnú.
Ngije kamábe kui jaá kótjín má, bi̱ katsó:
–Ún pan ko̱jo jó tji̱o̱.
39Kó katsangiya xota̱ tsi̱ꞌe̱, tsi̱ꞌe̱ nga ńgó tjín ńgó tjín ku̱i̱ꞌíndotie ngi̱jin ndi̱xcho̱o̱ xotaa̱, 40kó xki̱ ichítié ichítié ko̱jo xki̱ úchán úchán kisꞌińdo. 41Kósꞌe̱ iskjíbé pan xi uún ko̱jo tji̱o̱ xi joó, askotsijen nkꞌa jàn, katsꞌénchikonñé, sꞌe̱ akjángá paa̱n, kó katsjaá xota̱ tsi̱ꞌe̱, tsi̱ꞌe̱ nga kui jaá sa̱ꞌínkjaꞌasoón ngayeje xota̱ xi ngasee̱, kó tji̱o̱ xi joó ti̱ sa̱ꞌínkjaꞌasoón ngayeje xotaa̱ nga. 42Kó ngayeje xotaa̱ iskjinie, ko̱jo kitsie cha̱n cha̱a̱n. 43Kó ngi tiejó ni̱se̱nyá tjikítsie kamá pan ko̱jo tji̱o̱ xi tsꞌangi xi katjoꞌóꞌyaá. 44Ún mi̱ ma jáxíꞌín xi iskjinie kui paa̱n ko̱jo kui tji̱o̱o̱.
Bi̱ tsꞌén kistsoꞌbá Kjisoo̱ nga̱són ndáfoaa̱
(Mat 14:22-27; Jua 6:15-21)
45Kó Kjisoo̱ tji̱e̱nmá katsꞌeén kjo̱a̱ꞌniú xota̱ tsi̱ꞌe̱, tsi̱ꞌe̱ nga ko̱e̱je̱ya ngo tjotso je, nga ko̱e̱je̱tjón ki̱a̱ na̱xi̱ńdáꞌniú Betsainda̱ ngándá xi ingoboá jàn, tji̱e̱nga katsꞌénkixotꞌa xota̱ kjiín. 46Kó ngije kijí xotaa̱, Kjisoo̱ kijínijíngí tji̱ngi̱i̱ nga tsíchji̱a̱a̱ Néná. 47Kó ngije kjimaꞌñaa̱, tjotso je xi tjimáyà xota̱ tsi̱ꞌe̱ je kjochó ngamasiee̱n ngi̱ndi̱o̱ò. Kjisoo̱ kisꞌijña soboá tꞌa chji̱ndi̱e̱e̱. 48Kó nga kamábe nga achichí ngaꞌniú ndyi̱tsꞌèn kuí jaá nga ndyi̱kjindaá tjotso jee̱, ngatꞌa̱ tjo̱o̱ xtji̱e̱e̱n to̱ko̱ tjotso jee̱ yeꞌeé, kó ngije ndibáꞌásie̱én, Kjisoo̱ kijíkoón kui jaá nga kistsoꞌbásón ndáfoaa̱, kjo̱a̱ꞌatꞌarií xota̱a̱ katsaki. 49Kó kui jaá nga kamábe nga tsoꞌbá són nga̱soón ndáfoaa̱, si̱e̱n boá, katsó, kó askjandáyà ndikón, 50ngatꞌa̱ ngayejee̱ nga kamábe, kó achichí katsakjónní. Ta̱nga Kjisoo̱ tji̱e̱nmá tsíchji̱a̱jo kui jaá, nga bi̱ katsoó:
¡Te̱ꞌéngaꞌniújnúu̱ yojojnú, án boá, ngata̱ ndakonjínmájnú!
51Kó ngije tsꞌasꞌien Kjisoo̱ ngi̱ya tjotso jee̱, kixixió tjo̱o̱, kó achichí kijíndikoón kui jaá, 52ngatꞌa̱ kji̱e̱ ndajín makjiín kjo̱a̱ndikón xí katsꞌén Kjisoo̱, kjiꞌanga katsꞌénkjín paa̱n ko̱jo tji̱o̱o̱, ngatꞌa̱ ta̱kó tajá síndo ngase ini̱ma̱a̱.
Bi̱ tsꞌén katsꞌéndaya Kjisoo̱ xota̱ xi oo̱n xi tjín nangi Jenesaree̱t
(Mat 14:34-36)
53Ngije jaꞌatio ngi̱ndi̱o̱ò, Kjisoo̱ ko̱jo xota̱a̱ jachó nangi Jenesaree̱t, kó ítaꞌniú tjotso jee̱ tꞌa chji̱ndi̱e̱e̱. 54Nga jataxiejo̱ Kjisoo̱ xota̱a̱ ngi̱ya tjotso jee̱, xota̱ xi ngasee̱ tji̱e̱nmá kamábe nga Kjisoo̱. 55Kijí ngayeje nangi xi tjín tꞌa kui ngi̱ndiee̱, kó ítsꞌi̱yanii̱ nga tsangínjoo̱ xota̱ xi oo̱n xi ṉchan má kjiyojosoón xkjín, ta̱ nínga tsintꞌié nga tikón Kjisoo̱. 56Kó ngayeje ngi̱ndie nínga jachó Kjisoo̱, tsi ndí nangi xi̱xi̱, tsi na̱xi̱ńdáꞌniú ko̱jo tsi nínga jno̱, nínga síndo xi oo̱n, ngi̱ya ndi̱yàtié askoyaá, kó ꞌniú kichjiáꞌaá tsi̱ꞌe̱ nga ndeta̱ ńjñoo̱ xí si̱ꞌanjo̱, kó ngayeje xota̱ xi oo̱n xi katsꞌénjo̱ ńjñoo̱ Kjisoo̱ kamándaya.
Currently Selected:
Markoo̱ 6: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014