Matioo̱ 28

Bi̱ tsꞌén jaꞌáꞌyaá Kjisoo̱

(Mar 16:1-8; Rka 24:1-12; Jua 20:1-10)

1Ngije jaꞌa ni̱xtjin ndikoón, nga kisisie̱èn nga ni̱xtjin tjoón xomanaa̱, kijíkatsijen nga̱tsjo̱ó Kjisoo̱ na̱ Riya̱ Lenaa̱, ko̱jo na̱ Riya̱ xi ingoo̱. 2Kó ngo kjo̱a̱ndi̱ko̱n ꞌniú jaꞌa, ngatꞌa̱ ngo ndítsjiee̱ Néná jatjajenni ndiꞌakꞌajmii̱ kó nga jeꞌe, katsꞌéntíyaá ndi̱jo̱ xi kjiꞌixtio nga̱tsjo̱ó, sꞌe̱ kisꞌijñasón nga̱soón. 3Kó kui ndítsjiee̱ ꞌna̱ kamá xikoó nga foaꞌatꞌe, kó ńjño xi yajá tiboa xó xó kamá. 4Kó jatsié má jájún xi ndyi̱kondaa̱, kó tiboaꞌandá má kamá xikoó xota̱ xi je jesón. 5Kó kui ndítsjiee̱, bi̱ katsoó ínchjiín:

–Ngata̱ ndakonjínmájnú jún, ngatꞌa̱ jè be an nga Kjisoo̱ xí ndyi̱mindyiséjnú, nda̱ xi akjatꞌa kroo̱, 6kꞌi̱e̱jín tikón, ngatꞌa̱ jè jaꞌáꞌyaá, xikó katsó kuí. Ja̱bíjnúꞌun, kó tsitsíjenjnúu̱ ngi̱ndie nínga ikꞌíjñá yojoo̱. 7Tsá tangínjnú, kó tꞌíyájnúu̱ xota̱ tsi̱ꞌe̱ nga jè jaꞌáꞌyaá ngi̱jii̱n xota̱ xi je jesoón, kó bo̱a̱ tꞌínjnúu̱ nga ki̱a̱ ko̱e̱je̱tjónjnú nga kongínjnú nangi Ngalilea̱, ki̱a̱ xcha̱jnú kuí, ja̱ jè kixiyajnúꞌun.

8Kósꞌe̱ kui ínchjiín tsá jatjo nga̱tsjo̱ó, kó katsakjónní ko̱jo ꞌniú tsjá kamaá, tsanga má nga kijítsóyaà kui eén xota̱ tsi̱ꞌe̱ Kjisoo̱. Kó tji̱e̱nga ndyi̱fítsóyaà xota̱ tsi̱ꞌe̱ Kjisoo̱, 9Kjisoo̱ jachó nínga síndo kui ínchjiín, katsꞌéntinde, kó kui ínchjiín kijíkóntiñaa̱, janíkjá se Kjisoo̱, sꞌe̱ katsꞌéndikón. 10Kósꞌe̱ Kjisoo̱, bi̱ katsó:

–Ngata̱ ndakonjínmájnú, tangínjnú, kó tꞌíyájnúu̱ ntsꞌié án, tsi̱ꞌe̱ nga ko̱e̱je̱ nangi Ngalilea̱, kó ki̱a̱ sku̱i̱e̱na.

Bi̱ tsꞌén katsóyà jájuún ni xi kamá

11Kó tji̱e̱nga ndyi̱fí ínchjiín, chiboa jájuún kijí na̱xi̱ńdáꞌniuú, kó katsóyaà já ngito̱ko̱o̱ chináꞌmii̱ ngayeje ni xi kamaá. 12Kó kamátikó kuí jaá ko̱jo já xchá ngito̱ko̱o̱ na̱xi̱ńdaá, sꞌe̱ índa tsi̱ꞌe̱ nga tsie to̱n ko̱e̱ꞌeé jájuún, 13nga bi̱ katsoó:

–Bi̱ tꞌínjnú: Xota̱ tsi̱ꞌe̱ Kjisoo̱ jeꞌe nga jñoó, kó katsꞌénchejé yojoo̱ Kjisoo̱ tji̱e̱nga ndyi̱tsjayojoféjne̱. 14Kó tsi ku̱i̱ntꞌiè kuí nii̱ nda̱ xtitjoón, ji̱n xí yàjne̱ kó kꞌuínjne̱, kó jmí kjo̱a̱xti kꞌuiéjínjnú.

15Kó kui jájuún iskjíbé to̱o̱n, sꞌe̱ katsꞌén ngayeje ni xi kiꞌmií. Kuí én xi̱ꞌbi̱ xi kiꞌmíyaà já jundíoo̱ ngaskande kui ni̱xtjin xi̱ꞌbi̱.

Kjisoo̱ bi̱ tsꞌén katsjáxaá xota̱a̱

(Mar 16:14-18; Rka 24:36-49; Jua 20:19-23)

16Kó bo̱a̱ tsꞌén nga tiengo xota̱ tsi̱ꞌe̱ Kjisoo̱ kijí nangi Ngalilea̱, nínga tikón tji̱ngi̱ xi katsoó Kjisoo̱, 17kó kui jaá nga kamábe Kjisoo̱ katsꞌéndikón, ta̱nga tjín káꞌá xi jó xi ján íjñaá ini̱ma̱a̱. 18Kó Kjisoo̱ kijíkóntiñaa̱, sꞌe̱ bi̱ katsoó:

–Jè katseꞌéna xá nga kotixomáa̱ ngayeje ni xi tjín ndiꞌakꞌajmi jàn ko̱jo ni xi tjín tꞌanangii̱. 19Kó kuíni nga, tangínjnú kó xota̱ tsa̱ꞌa̱n ti̱ꞌánjnú ngayeje xota̱ na̱xi̱ńdá, tatíndánijnú nga si̱ꞌankaxomájnú jaꞌeén Na̱ꞌmii̱, ko̱jo jaꞌeén ndií, ko̱jo jaꞌeén A̱si̱énni̱xtjii̱n, 20kó takoyajnúu̱ nga sa̱ꞌínkjatjosón ngayeje ni xi akoyájnúꞌun, kó an ngatsjéni̱xtjin kotíjña̱jojnúꞌun, ngaskande nga kju̱i̱e̱ nga̱sondiee̱. Bo̱a̱ kjiꞌi.

Currently Selected:

Matioo̱ 28: MAIX

Highlight

Copy