Matioo̱ 27
27
Bi̱ tsꞌén tsangínjo̱ Kjisoo̱ ngindyi̱ko̱n xtitjón Pilatoo̱
(Mar 15:1; Rka 23:1-2; Jua 18:28-32)
1Nga kisisie̱èn, ngayeje já ngito̱ko̱o̱ chináꞌmii̱ ko̱jo já xchá ngito̱ko̱o̱ na̱xi̱ńdaá, kamátikó xtín tsi̱ꞌe̱ nga índa nga sa̱ꞌínkꞌién Kjisoo̱, 2kó ítaꞌniú nga kijíjo̱, sꞌe̱ kiniꞌánkꞌasꞌiee̱n nda̱ xtitjón Ponsio Pilatoo̱.
Bi̱ tsꞌén katsꞌénxíndo yojoo̱ Jundaa̱
3Kósꞌe̱ Jundaa̱, nda̱ xi katsꞌénkꞌasꞌien Kjisoo̱, nga kamábe nga je si̱ꞌankꞌien Kjisoo̱, katsꞌénkꞌoyá yojoo̱ nga katsjáꞌóyá nginií nga kantié to̱ntiboaa̱ já ngito̱ko̱o̱ chináꞌmii̱, ko̱jo já xchá ngito̱ko̱o̱ na̱xi̱ńdaá, 4kó bi̱ katsó:
–Katsꞌenjé án nga katsꞌenkꞌasꞌienjnúꞌun nga kiniꞌánkꞌién ngo nda̱ xi jmí jéjiín.
Sꞌe̱ kui jaá bi̱ katsó:
–Kó ji̱n mí ndasenjne̱ kui nii̱. ¡Ni tse̱ boá xi̱ꞌba̱!
5Kó Jundaa̱ atítsojo to̱ntiboaa̱ ki̱a̱ na̱ngo̱xi̱i̱, jataxie, sꞌe̱ kijí, kó katsꞌénxíndo yojoo̱.
6Ta̱nga já ngito̱ko̱o̱ chináꞌmii̱ jaꞌáꞌyá kui to̱o̱n, sꞌe̱ bi̱ katsó:
–Kjo̱a̱kitii̱ tsjandièjín nga kui to̱o̱n ki̱a̱ ku̱i̱ndyia koxa̱ to̱nchji̱e̱e̱ na̱ngo̱xi̱i̱, ngatꞌa̱ chjií nga kiniꞌánkꞌién ngo nda̱ boá.
7Kó ngije asíyaá xkjín mí ni xi sa̱ꞌín, ngo tꞌanangi tsꞌatsie xi ꞌmí: Ngi̱ndiee̱ nda̱ xi tsꞌénda ti̱ji̱í, tsi̱ꞌe̱ nga ki̱a̱ ko̱ónijín xota̱ xi xín nangi chji̱a̱ni. 8Kó kuíni nga, ngaskande ngotꞌe̱, Ngi̱ndiee̱ jín, ꞌmí kui ngi̱ndiee̱. 9Kósꞌe̱ bo̱a̱ tsꞌén jatjosón ni xi katsó nda̱chji̱ni̱e̱ꞌe̱én Néná xi ꞌmí Jeremiyaa̱, kjiꞌanga bi̱ katsó: Kó iskjíbé nga kantié to̱ntiboaa̱, chjí xí íjñaá xota̱ Israee̱l nga bo̱a̱ tjín chjií kui nda̱a̱, 10kó katseꞌeé tsi̱ꞌe̱ nga tsꞌatsie ngi̱ndiee̱ nda̱ xi tsꞌénda ti̱ji̱í, xikó katsó Ndi̱a̱a̱.
Pilatoo̱ bi̱ tsꞌén katsꞌénkijentsꞌoa Kjisoo̱
(Mar 15:2-5; Rka 23:3-5; Jua 18:33-38)
11Kó Kjisoo̱ jachó kje̱n nda̱ xtitjón xi ꞌmí Pilatoo̱, kó kui nda̱a̱, bi̱ katsó nga asíyaá Kjisoo̱:
–A jí xí nda̱ Ree̱ xota̱ jundíoo̱ ji.
Sꞌe̱ Kjisoo̱, bi̱ katsó:
–Ja̱ bo̱a̱ kjiꞌi ni xi tꞌísé ji.
12Kó kjiꞌanga já ngito̱ko̱o̱ chináꞌmii̱, ko̱jo já xchá ngito̱ko̱o̱ na̱xi̱ńdaá yíngítaꞌin Kjisoo̱, jmí ni katsójín. 13Kósꞌe̱ bi̱ katsó nginí Pilatoo̱ nga asíyaá:
–A ndaꞌyéjín ngayeje ni xi tjíꞌmí kondra̱ tse̱.
14Ta̱nga Kjisoo̱ nde ngo én tsíchji̱a̱jín, kó ngaskande achichí kijíndikoón nda̱ xtitjoón kui nii̱.
Bi̱ tsꞌén katseꞌéjeé nga si̱ꞌankꞌien Kjisoo̱
(Mar 15:6-20; Rka 23:13-25; Jua 18:38—19:16)
15Kó xki̱ nga ma sꞌué paskuaa̱, nda̱ xtitjoón kamángaá nga ꞌbijñándé ngo nda̱ xi tjiꞌyá ndo̱bo̱a̱yà, ta̱ xi míꞌá xota̱ na̱xi̱ńdaá. 16Kó kui ni̱xtjin jàn ndo̱bo̱a̱yà kisꞌijña ngo nda̱ xi ta̱ ꞌyání xi kamábe, xi ꞌmí Barraba̱. 17Kó nga kamátikó xota̱ na̱xi̱ńdaá, bi̱ katsó Pilatoo̱:
–ꞌYání xi mejénjnú nga kꞌuijñándé án: A Barrabaa̱, axa̱ Kjisoo̱ kui xi Kristoo̱ ꞌmií.
18Ngatꞌa̱ ja̱bo̱a̱ ja̱ bo̱a̱ jè be Pilatoo̱ nga ta̱ kjo̱a̱a̱ kjo̱a̱ꞌontakón boá nga kiniꞌánkꞌasꞌien Kjisoo̱.
19Kó tji̱e̱nga tikón Pilatoo̱ ngi̱ndie nínga niꞌánjeé, chjo̱ón katsangiyaa̱ ngo én xi bi̱ tsó: Ngata̱ jijín chingajin nii̱ kui xota̱ kixi̱i̱, ngatꞌa̱ achichí kjo̱a̱ni̱ma̱ jaꞌatio an ngi̱jin ńjñána ngoye ta̱ngatꞌanii̱ kui.
20Ta̱nga já ngito̱ko̱o̱ chináꞌmii̱, ko̱jo já xchá ngito̱ko̱o̱ na̱xi̱ńdaá, katsꞌeén kjo̱a̱ꞌniú xota̱ na̱xi̱ńdaá tsi̱ꞌe̱ nga, nga ta̱sá Barrabaa̱ xi kꞌuijñándé, kó nga ta̱sá Kjisoo̱ xi si̱ꞌankꞌien ka̱tso̱. 21Kó nda̱ xtitjoón, bi̱ katsó nga asíyaá xota̱ na̱xi̱ńdaá:
–ꞌYání nga jó kui jaá xi mejénjnú nga kꞌuijñándé.
Kó bi̱ katsó xota̱ na̱xi̱ńdaá:
¡Barrabaa̱!
22Sꞌe̱ Pilatoo̱, bi̱ katsó nginí:
–Kó mí ni xi sa̱ꞌinjo̱ an Kjisoo̱, kui xi Kristoo̱ ꞌmií.
Kó ngayeje xota̱ na̱xi̱ńdaá, bi̱ katsó:
¡Tjatꞌe ji kro!
23Ta̱nga bi̱ katsó nda̱ xtitjoón:
–Ja̱ mí ni xi ndajín xi katsꞌén.
Ta̱nga ta̱sá má ꞌniú ngase askjandáyà xotaa̱ nga bi̱ katsó:
¡Tjatꞌe ji kro!
24Kó nga kamábe Pilatoo̱ nga ngiti̱ jmí ni kamájín katsꞌén, nga ta̱sá kamákján ngasee̱ xota̱ na̱xi̱ńdaá, iskjíbé chií ndáfoa sꞌe̱ aniéjón tsja ngindyi̱ko̱n xotaa̱, kó bi̱ katsó:
–Jmí jéjínna kjo̱a̱a̱ nga ko̱yà kuí nda̱ kixi̱i̱, ni tsa̱jún boá kui nii̱.
25Kó bi̱ katsoó xota̱ na̱xi̱ńdaá:
¡Ji̱n ko̱jo ndíjne̱ ngatamajéjne̱ kjo̱a̱a̱ nga ko̱yà kuí nda̱a̱!
26Kósꞌe̱ Pilatoo̱ íjñandé Barrabaa̱, kó katsjákjo̱a̱ tsi̱ꞌe̱ nga kjoaá Kjisoo̱, sꞌe̱ katsꞌénkꞌasꞌien tsi̱ꞌe̱ nga kjótꞌa kro.
27Kósꞌe̱ jájuún nda̱ xtitjoón, kijíjo̱ Kjisoo̱ ndi̱tsen ndiꞌa nínga niꞌánjeé xotaa̱, kó ki̱a̱ kamátikó jájún xi ngasee̱. 28Kó ki̱a̱ kachjeꞌéxiín ńjñoo̱ Kjisoo̱, sꞌe̱ katsꞌénkajá ngo ńjño xi koán, 29kó ngo korona̱ ndaꞌyá íꞌá to̱ko̱, sꞌe̱ ngo yáxá íyá tsja fojní, sꞌe̱ kui jaá tsajnókie nga asiéntꞌaa̱tikoó, nga bi̱ katsoó:
¡Tinde nda̱ Ree̱ xota̱ jundío̱!
30Kó atítiajón, iskjíbé yáxaá, sꞌe̱ tsꞌanié to̱ko̱ Kjisoo̱. 31Sꞌe̱ ngije tsajnókie, jaꞌáxiín ńjño xi kjitꞌa nga̱xto̱n, sꞌe̱ katsꞌénkajá nginí ńjñoo̱, sꞌe̱ kijíjo̱ tsi̱ꞌe̱ nga ko̱ótꞌa kro.
Bi̱ tsꞌén akjatꞌa kro Kjisoo̱
(Mar 15:21-41; Rka 23:26-49; Jua 19:17-30)
32Kó nga jatjo ki̱a̱a̱, kamábe ngo nda̱ xi chji̱a̱ni na̱xi̱ńdáꞌniú Sirene̱ xi ꞌmí Ximo̱, kui nda̱a̱ kiniꞌaán kjo̱a̱ꞌniú tsi̱ꞌe̱ nga asíko̱jo nga yaꞌajo̱ kroo̱ Kjisoo̱.
33Kó nga jachó ngo ngi̱ndie xi ꞌmí Ngólngota̱, ngi̱ndiee̱ ńdato̱ko̱ ini̱ma̱, tsó kui eén, 34ki̱a̱ katseꞌeé bino̱ xi kiniꞌánkꞌájinni ni sa, ta̱nga ngije askotꞌa Kjisoo̱, kamámejénjiín katsꞌe.
35Ngije akjatꞌa kro, jájuún katsatonjo̱ kjo̱a̱chꞌáṉcha̱ ńjñoo̱ Kjisoo̱, sꞌe̱ iskjíbé ńjño xi katsꞌén nga ngo nga ngo. Bo̱a̱ tsꞌén jatjosón ni xi katsó nda̱chji̱ni̱e̱ꞌe̱én Néná, nga bi̱ katsó: Katsꞌénkjaꞌasoón xkjín ńjñona, kó katsatonjo̱ kjo̱a̱chꞌáṉcha̱ ńjñona. 36Kó ki̱a̱ kisꞌińdo, nga askondá Kjisoo̱. 37Kó ngo yátie yítꞌa nkꞌaa̱ to̱ko̱ kroo̱, xi bi̱ tsó: KUÍ XI̱ꞌBI̱ XI KJISOO̱, NDA̱ REE̱ XOTA̱ JUNDÍOO̱.
38Kósꞌe̱ nijan akjatꞌajo̱ kro Kjisoo̱ jó jáchéjé, ngo nga fojnií, ko̱jo ngo nga skoón. 39Kó xota̱ xi jaꞌa ki̱a̱a̱ achichí chꞌo katsoó Kjisoo̱, kó katsꞌénkatjí má to̱ko̱, 40nga bi̱ katsoó:
¡Ji xi niꞌínkixóndé jí ngo na̱ngo̱xi̱, sꞌe̱ xi ma ján ni̱xtjin niꞌínde nginí, ꞌna̱xiéꞌé so̱bo̱e̱ ji yojòo̱, tsi ndií Néná jí, kó ti̱tjaje̱n ji kroo̱!
41Ti̱ bo̱a̱ ti̱ tsꞌén tsajnókie já ngito̱ko̱o̱ chináꞌmii̱, ko̱jo já chji̱ni̱e̱kjo̱a̱kitii̱, ko̱jo já fariseoo̱, ko̱jo já xchá ngito̱ko̱o̱ na̱xi̱ńdaá, nga bi̱ katsó:
42–Tsꞌaxiéꞌá kje̱ꞌe xota̱, ta̱nga májiín ꞌboxiéꞌá soboá yojoo̱, tsi kjeén nga kui xi nda̱ Ree̱ Israee̱l, ngatjatjajen kroo̱ ngotꞌe̱ má, ki̱a̱ ka̱maa̱ nga sꞌi̱jinjne̱ kui. 43Kamáꞌniátakón Néná, ja̱ Néná ngatꞌaxiéꞌá ngotꞌe̱ ꞌne̱ tsobo̱a̱ tsi tjoó, ngatꞌa̱ bi̱ katsó: Án xí ndií Néná.
44Kó ti̱ bo̱a̱ ti̱ tsꞌén chꞌo katsó jáchéjé xí nijan kisitꞌajo̱ kro Kjisoo̱.
45Kó ndeskande nga ndisꞌueé, kó ngaskande nga kamá chi̱bo̱a̱ ján nga kamángixón, ngayeje nga̱sondiee̱ kisꞌiejñó. 46Kó ngije ma kamá chi̱bo̱a̱ ján nga kamángixón Kjisoo̱ ꞌniú askjandáyà, nga bi̱ katsó:
–Elí, Elí, lama sabaktani.#27:46 (Ne tsa̱ꞌa̱n, Ne tsa̱ꞌa̱n, ánní nga tiꞌbíjñímasínní. Tsó kui eén)
47Kó tjín káꞌá xota̱ xi síndo ki̱a̱a̱, nga tsintꞌié ni xi katsó Kjisoo̱, bi̱ katsó:
–Nda̱ chji̱ni̱e̱ꞌe̱én Néná xi ꞌmí Eliyaa̱ tsꞌénchji̱a̱a̱.
48Kó ti̱ kjiꞌa tsanga má ngo nda̱ xi kijíkjaꞌá ngo nixó xí katsꞌénkꞌandyi̱ni bino̱ san, sꞌe̱ ngo yáxá ítokó, sꞌe̱ katsjaá Kjisoo̱ tsi̱ꞌe̱ nga kꞌuí. 49Ta̱nga xota̱ xi ngasee̱, bi̱ katsoó:
–Xióchònjnú, akjénráa̱ nga Eliyaa̱ kjo̱e̱ꞌékꞌaxiéꞌá.
50Kó Kjisoo̱, ti̱ askjandáyà nginí, sꞌe̱ kꞌien ngijee̱. 51Kó ńjñotjibé xi tjíchjáni ngi̱ya nínga ꞌniú ndikoón na̱ngo̱xi̱i̱ jó tjín kamá nga katjondiyá, ndeskande nkꞌa jàn, ngaskande ngindie jàn, sꞌe̱ kjindibá ngo kjo̱a̱ndi̱ko̱n kuí tꞌanangii̱, kó ndi̱jo̱o̱ tsakjanga, 52sꞌe̱ katjoxꞌá ngayeje nga̱tsjo̱ó, kó ngaskande achichí má yojo kꞌiee̱n xota̱ tsjiee̱ Néná xí ja̱bo̱a̱ je jesón xi jaꞌáꞌyá nginií, 53kó ngije jataxie nga̱tsjo̱ó, ngije jaꞌáꞌyaá Kjisoo̱, kui xotaa̱ tsꞌasꞌien na̱xi̱ńdáꞌniú tsjiee̱, kó achichí má xota̱ xi kamábe.
54Kó ngito̱ko̱o̱ jájuún ko̱jo jájún xi ndyi̱konda Kjisoo̱ nga kamábe kjo̱a̱ndi̱ko̱ón, ko̱jo ngayeje ni xi kamaá, achichí katsakjónní, kó bi̱ katsó:
–¡Ja̱koxi̱ nga kui nda̱a̱ xi ndií Néná!
55Kó kjín má ínchjín xí ta̱ kjin askotsijennii̱ ni xi kamaá, xi tsajátji̱ngii̱ Kjisoo̱ ndeskande Ngalilea̱ nga katsꞌénseén, 56ngi̱jii̱n kui ínchjiín kisꞌińdo na̱ Riya̱ Lenaa̱, ko̱jo na̱ Riyaa̱ na̱aa̱n Sandiyaá ko̱jo Kosiee̱, ko̱jo na̱aa̱n ndií Sebendeoo̱.
Bi̱ tsꞌén akjanijín Kjisoo̱
(Mar 15:42-47; Rka 23:50-56; Jua 19:38-42)
57Kó nga kamángixoón, jachó ngo nda̱ cho̱n xi chji̱a̱ni na̱xi̱ńdáꞌniú Arimatea̱ xi ꞌmí Kosie̱, xi ti̱ xota̱ tsi̱ꞌe̱ Kjisoo̱ kamá nga, 58kó kui nda̱a̱ kijíkoón Pilatoo̱, kó tsíꞌaá yojo kꞌiee̱n Kjisoo̱, sꞌe̱ Pilatoo̱ katsjákjo̱a̱ tsi̱ꞌe̱ nga kui nda̱a̱ si̱ꞌankꞌasꞌiee̱n yojoo̱ Kjisoo̱. 59Kó Kosiee̱ iskjíbé yojo kꞌiee̱n Kjisoo̱, kó ngo ńjñotjibé tsjie ítsakjájón, 60sꞌe̱ íjñá yojo kꞌiee̱n Kjisoo̱ ngo ngi̱ya nga̱tsjo̱ó tja̱tsi̱e̱, xi kamánda tꞌa ngo ndi̱jo̱je, sꞌe̱ katsꞌéngátíkjayá ngo ndi̱jo̱je xi íchjáni nga̱ntjo̱a̱a̱ kui nga̱tsjo̱ó, sꞌe̱ kijí kui nda̱a̱. 61Kó ki̱a̱ kje̱n nga̱tsjo̱ó síndo na̱ Riya̱ Lenaa̱, ko̱jo na̱ Riyaa̱ xi ingoo̱.
Bi̱ tsꞌén kichindá nga̱tsjo̱ó Kjisoo̱
62Kó nga kamángindyiojón, ngije jaꞌa ngo ni̱xtjin nga ikꞌíjñanda sꞌué paskuaa̱, kamátikó ngayeje já ngito̱ko̱o̱ chináꞌmii̱ ko̱jo já fariseoo̱ kje̱n Pilatoo̱, 63kó bi̱ katsó:
–Ndi̱a̱, je jaꞌátsjienjne̱ nga kui nda̱ ndisoo̱, bi̱ katsó nga kisꞌijña: Ngije kjo̱a̱ꞌa ján ni̱xtjin kjo̱a̱ꞌáꞌyána. 64Nangíyé ji nga xchindà nga̱tsjo̱ó ngaskande xi ma jaán ni̱xtjin, ngatꞌa̱ tsájmi̱ tsi ta̱ xota̱ tsi̱ꞌe̱ kjo̱e̱ꞌe nga jñoó, sꞌe̱ kjo̱jo yojoo̱, kó bi̱ ka̱tso̱o̱ xota̱ na̱xi̱ńdaá: Jè jaꞌáꞌyaá ngi̱jii̱n xota̱ xi je jesón, kó kui kjo̱a̱ndisoo̱ je ngase, ka̱ma ta̱bo̱a̱jiín xi tjoón.
65Kó Pilatoo̱ bi̱ katsó:
–Tangínjo̱jnú jájún, kó nda nga konda nga̱tsjo̱ó.
66Sꞌe̱ kijí kui jaá, kó askondá nga̱tsjo̱ó, kó ngo ndi̱jo̱je íjñachjaá nga̱ntjo̱a̱ nga̱tsjo̱ó, sꞌe̱ ki̱a̱ kisꞌińdondá jájuún.
Currently Selected:
Matioo̱ 27: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
Matioo̱ 27
27
Bi̱ tsꞌén tsangínjo̱ Kjisoo̱ ngindyi̱ko̱n xtitjón Pilatoo̱
(Mar 15:1; Rka 23:1-2; Jua 18:28-32)
1Nga kisisie̱èn, ngayeje já ngito̱ko̱o̱ chináꞌmii̱ ko̱jo já xchá ngito̱ko̱o̱ na̱xi̱ńdaá, kamátikó xtín tsi̱ꞌe̱ nga índa nga sa̱ꞌínkꞌién Kjisoo̱, 2kó ítaꞌniú nga kijíjo̱, sꞌe̱ kiniꞌánkꞌasꞌiee̱n nda̱ xtitjón Ponsio Pilatoo̱.
Bi̱ tsꞌén katsꞌénxíndo yojoo̱ Jundaa̱
3Kósꞌe̱ Jundaa̱, nda̱ xi katsꞌénkꞌasꞌien Kjisoo̱, nga kamábe nga je si̱ꞌankꞌien Kjisoo̱, katsꞌénkꞌoyá yojoo̱ nga katsjáꞌóyá nginií nga kantié to̱ntiboaa̱ já ngito̱ko̱o̱ chináꞌmii̱, ko̱jo já xchá ngito̱ko̱o̱ na̱xi̱ńdaá, 4kó bi̱ katsó:
–Katsꞌenjé án nga katsꞌenkꞌasꞌienjnúꞌun nga kiniꞌánkꞌién ngo nda̱ xi jmí jéjiín.
Sꞌe̱ kui jaá bi̱ katsó:
–Kó ji̱n mí ndasenjne̱ kui nii̱. ¡Ni tse̱ boá xi̱ꞌba̱!
5Kó Jundaa̱ atítsojo to̱ntiboaa̱ ki̱a̱ na̱ngo̱xi̱i̱, jataxie, sꞌe̱ kijí, kó katsꞌénxíndo yojoo̱.
6Ta̱nga já ngito̱ko̱o̱ chináꞌmii̱ jaꞌáꞌyá kui to̱o̱n, sꞌe̱ bi̱ katsó:
–Kjo̱a̱kitii̱ tsjandièjín nga kui to̱o̱n ki̱a̱ ku̱i̱ndyia koxa̱ to̱nchji̱e̱e̱ na̱ngo̱xi̱i̱, ngatꞌa̱ chjií nga kiniꞌánkꞌién ngo nda̱ boá.
7Kó ngije asíyaá xkjín mí ni xi sa̱ꞌín, ngo tꞌanangi tsꞌatsie xi ꞌmí: Ngi̱ndiee̱ nda̱ xi tsꞌénda ti̱ji̱í, tsi̱ꞌe̱ nga ki̱a̱ ko̱ónijín xota̱ xi xín nangi chji̱a̱ni. 8Kó kuíni nga, ngaskande ngotꞌe̱, Ngi̱ndiee̱ jín, ꞌmí kui ngi̱ndiee̱. 9Kósꞌe̱ bo̱a̱ tsꞌén jatjosón ni xi katsó nda̱chji̱ni̱e̱ꞌe̱én Néná xi ꞌmí Jeremiyaa̱, kjiꞌanga bi̱ katsó: Kó iskjíbé nga kantié to̱ntiboaa̱, chjí xí íjñaá xota̱ Israee̱l nga bo̱a̱ tjín chjií kui nda̱a̱, 10kó katseꞌeé tsi̱ꞌe̱ nga tsꞌatsie ngi̱ndiee̱ nda̱ xi tsꞌénda ti̱ji̱í, xikó katsó Ndi̱a̱a̱.
Pilatoo̱ bi̱ tsꞌén katsꞌénkijentsꞌoa Kjisoo̱
(Mar 15:2-5; Rka 23:3-5; Jua 18:33-38)
11Kó Kjisoo̱ jachó kje̱n nda̱ xtitjón xi ꞌmí Pilatoo̱, kó kui nda̱a̱, bi̱ katsó nga asíyaá Kjisoo̱:
–A jí xí nda̱ Ree̱ xota̱ jundíoo̱ ji.
Sꞌe̱ Kjisoo̱, bi̱ katsó:
–Ja̱ bo̱a̱ kjiꞌi ni xi tꞌísé ji.
12Kó kjiꞌanga já ngito̱ko̱o̱ chináꞌmii̱, ko̱jo já xchá ngito̱ko̱o̱ na̱xi̱ńdaá yíngítaꞌin Kjisoo̱, jmí ni katsójín. 13Kósꞌe̱ bi̱ katsó nginí Pilatoo̱ nga asíyaá:
–A ndaꞌyéjín ngayeje ni xi tjíꞌmí kondra̱ tse̱.
14Ta̱nga Kjisoo̱ nde ngo én tsíchji̱a̱jín, kó ngaskande achichí kijíndikoón nda̱ xtitjoón kui nii̱.
Bi̱ tsꞌén katseꞌéjeé nga si̱ꞌankꞌien Kjisoo̱
(Mar 15:6-20; Rka 23:13-25; Jua 18:38—19:16)
15Kó xki̱ nga ma sꞌué paskuaa̱, nda̱ xtitjoón kamángaá nga ꞌbijñándé ngo nda̱ xi tjiꞌyá ndo̱bo̱a̱yà, ta̱ xi míꞌá xota̱ na̱xi̱ńdaá. 16Kó kui ni̱xtjin jàn ndo̱bo̱a̱yà kisꞌijña ngo nda̱ xi ta̱ ꞌyání xi kamábe, xi ꞌmí Barraba̱. 17Kó nga kamátikó xota̱ na̱xi̱ńdaá, bi̱ katsó Pilatoo̱:
–ꞌYání xi mejénjnú nga kꞌuijñándé án: A Barrabaa̱, axa̱ Kjisoo̱ kui xi Kristoo̱ ꞌmií.
18Ngatꞌa̱ ja̱bo̱a̱ ja̱ bo̱a̱ jè be Pilatoo̱ nga ta̱ kjo̱a̱a̱ kjo̱a̱ꞌontakón boá nga kiniꞌánkꞌasꞌien Kjisoo̱.
19Kó tji̱e̱nga tikón Pilatoo̱ ngi̱ndie nínga niꞌánjeé, chjo̱ón katsangiyaa̱ ngo én xi bi̱ tsó: Ngata̱ jijín chingajin nii̱ kui xota̱ kixi̱i̱, ngatꞌa̱ achichí kjo̱a̱ni̱ma̱ jaꞌatio an ngi̱jin ńjñána ngoye ta̱ngatꞌanii̱ kui.
20Ta̱nga já ngito̱ko̱o̱ chináꞌmii̱, ko̱jo já xchá ngito̱ko̱o̱ na̱xi̱ńdaá, katsꞌeén kjo̱a̱ꞌniú xota̱ na̱xi̱ńdaá tsi̱ꞌe̱ nga, nga ta̱sá Barrabaa̱ xi kꞌuijñándé, kó nga ta̱sá Kjisoo̱ xi si̱ꞌankꞌien ka̱tso̱. 21Kó nda̱ xtitjoón, bi̱ katsó nga asíyaá xota̱ na̱xi̱ńdaá:
–ꞌYání nga jó kui jaá xi mejénjnú nga kꞌuijñándé.
Kó bi̱ katsó xota̱ na̱xi̱ńdaá:
¡Barrabaa̱!
22Sꞌe̱ Pilatoo̱, bi̱ katsó nginí:
–Kó mí ni xi sa̱ꞌinjo̱ an Kjisoo̱, kui xi Kristoo̱ ꞌmií.
Kó ngayeje xota̱ na̱xi̱ńdaá, bi̱ katsó:
¡Tjatꞌe ji kro!
23Ta̱nga bi̱ katsó nda̱ xtitjoón:
–Ja̱ mí ni xi ndajín xi katsꞌén.
Ta̱nga ta̱sá má ꞌniú ngase askjandáyà xotaa̱ nga bi̱ katsó:
¡Tjatꞌe ji kro!
24Kó nga kamábe Pilatoo̱ nga ngiti̱ jmí ni kamájín katsꞌén, nga ta̱sá kamákján ngasee̱ xota̱ na̱xi̱ńdaá, iskjíbé chií ndáfoa sꞌe̱ aniéjón tsja ngindyi̱ko̱n xotaa̱, kó bi̱ katsó:
–Jmí jéjínna kjo̱a̱a̱ nga ko̱yà kuí nda̱ kixi̱i̱, ni tsa̱jún boá kui nii̱.
25Kó bi̱ katsoó xota̱ na̱xi̱ńdaá:
¡Ji̱n ko̱jo ndíjne̱ ngatamajéjne̱ kjo̱a̱a̱ nga ko̱yà kuí nda̱a̱!
26Kósꞌe̱ Pilatoo̱ íjñandé Barrabaa̱, kó katsjákjo̱a̱ tsi̱ꞌe̱ nga kjoaá Kjisoo̱, sꞌe̱ katsꞌénkꞌasꞌien tsi̱ꞌe̱ nga kjótꞌa kro.
27Kósꞌe̱ jájuún nda̱ xtitjoón, kijíjo̱ Kjisoo̱ ndi̱tsen ndiꞌa nínga niꞌánjeé xotaa̱, kó ki̱a̱ kamátikó jájún xi ngasee̱. 28Kó ki̱a̱ kachjeꞌéxiín ńjñoo̱ Kjisoo̱, sꞌe̱ katsꞌénkajá ngo ńjño xi koán, 29kó ngo korona̱ ndaꞌyá íꞌá to̱ko̱, sꞌe̱ ngo yáxá íyá tsja fojní, sꞌe̱ kui jaá tsajnókie nga asiéntꞌaa̱tikoó, nga bi̱ katsoó:
¡Tinde nda̱ Ree̱ xota̱ jundío̱!
30Kó atítiajón, iskjíbé yáxaá, sꞌe̱ tsꞌanié to̱ko̱ Kjisoo̱. 31Sꞌe̱ ngije tsajnókie, jaꞌáxiín ńjño xi kjitꞌa nga̱xto̱n, sꞌe̱ katsꞌénkajá nginí ńjñoo̱, sꞌe̱ kijíjo̱ tsi̱ꞌe̱ nga ko̱ótꞌa kro.
Bi̱ tsꞌén akjatꞌa kro Kjisoo̱
(Mar 15:21-41; Rka 23:26-49; Jua 19:17-30)
32Kó nga jatjo ki̱a̱a̱, kamábe ngo nda̱ xi chji̱a̱ni na̱xi̱ńdáꞌniú Sirene̱ xi ꞌmí Ximo̱, kui nda̱a̱ kiniꞌaán kjo̱a̱ꞌniú tsi̱ꞌe̱ nga asíko̱jo nga yaꞌajo̱ kroo̱ Kjisoo̱.
33Kó nga jachó ngo ngi̱ndie xi ꞌmí Ngólngota̱, ngi̱ndiee̱ ńdato̱ko̱ ini̱ma̱, tsó kui eén, 34ki̱a̱ katseꞌeé bino̱ xi kiniꞌánkꞌájinni ni sa, ta̱nga ngije askotꞌa Kjisoo̱, kamámejénjiín katsꞌe.
35Ngije akjatꞌa kro, jájuún katsatonjo̱ kjo̱a̱chꞌáṉcha̱ ńjñoo̱ Kjisoo̱, sꞌe̱ iskjíbé ńjño xi katsꞌén nga ngo nga ngo. Bo̱a̱ tsꞌén jatjosón ni xi katsó nda̱chji̱ni̱e̱ꞌe̱én Néná, nga bi̱ katsó: Katsꞌénkjaꞌasoón xkjín ńjñona, kó katsatonjo̱ kjo̱a̱chꞌáṉcha̱ ńjñona. 36Kó ki̱a̱ kisꞌińdo, nga askondá Kjisoo̱. 37Kó ngo yátie yítꞌa nkꞌaa̱ to̱ko̱ kroo̱, xi bi̱ tsó: KUÍ XI̱ꞌBI̱ XI KJISOO̱, NDA̱ REE̱ XOTA̱ JUNDÍOO̱.
38Kósꞌe̱ nijan akjatꞌajo̱ kro Kjisoo̱ jó jáchéjé, ngo nga fojnií, ko̱jo ngo nga skoón. 39Kó xota̱ xi jaꞌa ki̱a̱a̱ achichí chꞌo katsoó Kjisoo̱, kó katsꞌénkatjí má to̱ko̱, 40nga bi̱ katsoó:
¡Ji xi niꞌínkixóndé jí ngo na̱ngo̱xi̱, sꞌe̱ xi ma ján ni̱xtjin niꞌínde nginí, ꞌna̱xiéꞌé so̱bo̱e̱ ji yojòo̱, tsi ndií Néná jí, kó ti̱tjaje̱n ji kroo̱!
41Ti̱ bo̱a̱ ti̱ tsꞌén tsajnókie já ngito̱ko̱o̱ chináꞌmii̱, ko̱jo já chji̱ni̱e̱kjo̱a̱kitii̱, ko̱jo já fariseoo̱, ko̱jo já xchá ngito̱ko̱o̱ na̱xi̱ńdaá, nga bi̱ katsó:
42–Tsꞌaxiéꞌá kje̱ꞌe xota̱, ta̱nga májiín ꞌboxiéꞌá soboá yojoo̱, tsi kjeén nga kui xi nda̱ Ree̱ Israee̱l, ngatjatjajen kroo̱ ngotꞌe̱ má, ki̱a̱ ka̱maa̱ nga sꞌi̱jinjne̱ kui. 43Kamáꞌniátakón Néná, ja̱ Néná ngatꞌaxiéꞌá ngotꞌe̱ ꞌne̱ tsobo̱a̱ tsi tjoó, ngatꞌa̱ bi̱ katsó: Án xí ndií Néná.
44Kó ti̱ bo̱a̱ ti̱ tsꞌén chꞌo katsó jáchéjé xí nijan kisitꞌajo̱ kro Kjisoo̱.
45Kó ndeskande nga ndisꞌueé, kó ngaskande nga kamá chi̱bo̱a̱ ján nga kamángixón, ngayeje nga̱sondiee̱ kisꞌiejñó. 46Kó ngije ma kamá chi̱bo̱a̱ ján nga kamángixón Kjisoo̱ ꞌniú askjandáyà, nga bi̱ katsó:
–Elí, Elí, lama sabaktani.#27:46 (Ne tsa̱ꞌa̱n, Ne tsa̱ꞌa̱n, ánní nga tiꞌbíjñímasínní. Tsó kui eén)
47Kó tjín káꞌá xota̱ xi síndo ki̱a̱a̱, nga tsintꞌié ni xi katsó Kjisoo̱, bi̱ katsó:
–Nda̱ chji̱ni̱e̱ꞌe̱én Néná xi ꞌmí Eliyaa̱ tsꞌénchji̱a̱a̱.
48Kó ti̱ kjiꞌa tsanga má ngo nda̱ xi kijíkjaꞌá ngo nixó xí katsꞌénkꞌandyi̱ni bino̱ san, sꞌe̱ ngo yáxá ítokó, sꞌe̱ katsjaá Kjisoo̱ tsi̱ꞌe̱ nga kꞌuí. 49Ta̱nga xota̱ xi ngasee̱, bi̱ katsoó:
–Xióchònjnú, akjénráa̱ nga Eliyaa̱ kjo̱e̱ꞌékꞌaxiéꞌá.
50Kó Kjisoo̱, ti̱ askjandáyà nginí, sꞌe̱ kꞌien ngijee̱. 51Kó ńjñotjibé xi tjíchjáni ngi̱ya nínga ꞌniú ndikoón na̱ngo̱xi̱i̱ jó tjín kamá nga katjondiyá, ndeskande nkꞌa jàn, ngaskande ngindie jàn, sꞌe̱ kjindibá ngo kjo̱a̱ndi̱ko̱n kuí tꞌanangii̱, kó ndi̱jo̱o̱ tsakjanga, 52sꞌe̱ katjoxꞌá ngayeje nga̱tsjo̱ó, kó ngaskande achichí má yojo kꞌiee̱n xota̱ tsjiee̱ Néná xí ja̱bo̱a̱ je jesón xi jaꞌáꞌyá nginií, 53kó ngije jataxie nga̱tsjo̱ó, ngije jaꞌáꞌyaá Kjisoo̱, kui xotaa̱ tsꞌasꞌien na̱xi̱ńdáꞌniú tsjiee̱, kó achichí má xota̱ xi kamábe.
54Kó ngito̱ko̱o̱ jájuún ko̱jo jájún xi ndyi̱konda Kjisoo̱ nga kamábe kjo̱a̱ndi̱ko̱ón, ko̱jo ngayeje ni xi kamaá, achichí katsakjónní, kó bi̱ katsó:
–¡Ja̱koxi̱ nga kui nda̱a̱ xi ndií Néná!
55Kó kjín má ínchjín xí ta̱ kjin askotsijennii̱ ni xi kamaá, xi tsajátji̱ngii̱ Kjisoo̱ ndeskande Ngalilea̱ nga katsꞌénseén, 56ngi̱jii̱n kui ínchjiín kisꞌińdo na̱ Riya̱ Lenaa̱, ko̱jo na̱ Riyaa̱ na̱aa̱n Sandiyaá ko̱jo Kosiee̱, ko̱jo na̱aa̱n ndií Sebendeoo̱.
Bi̱ tsꞌén akjanijín Kjisoo̱
(Mar 15:42-47; Rka 23:50-56; Jua 19:38-42)
57Kó nga kamángixoón, jachó ngo nda̱ cho̱n xi chji̱a̱ni na̱xi̱ńdáꞌniú Arimatea̱ xi ꞌmí Kosie̱, xi ti̱ xota̱ tsi̱ꞌe̱ Kjisoo̱ kamá nga, 58kó kui nda̱a̱ kijíkoón Pilatoo̱, kó tsíꞌaá yojo kꞌiee̱n Kjisoo̱, sꞌe̱ Pilatoo̱ katsjákjo̱a̱ tsi̱ꞌe̱ nga kui nda̱a̱ si̱ꞌankꞌasꞌiee̱n yojoo̱ Kjisoo̱. 59Kó Kosiee̱ iskjíbé yojo kꞌiee̱n Kjisoo̱, kó ngo ńjñotjibé tsjie ítsakjájón, 60sꞌe̱ íjñá yojo kꞌiee̱n Kjisoo̱ ngo ngi̱ya nga̱tsjo̱ó tja̱tsi̱e̱, xi kamánda tꞌa ngo ndi̱jo̱je, sꞌe̱ katsꞌéngátíkjayá ngo ndi̱jo̱je xi íchjáni nga̱ntjo̱a̱a̱ kui nga̱tsjo̱ó, sꞌe̱ kijí kui nda̱a̱. 61Kó ki̱a̱ kje̱n nga̱tsjo̱ó síndo na̱ Riya̱ Lenaa̱, ko̱jo na̱ Riyaa̱ xi ingoo̱.
Bi̱ tsꞌén kichindá nga̱tsjo̱ó Kjisoo̱
62Kó nga kamángindyiojón, ngije jaꞌa ngo ni̱xtjin nga ikꞌíjñanda sꞌué paskuaa̱, kamátikó ngayeje já ngito̱ko̱o̱ chináꞌmii̱ ko̱jo já fariseoo̱ kje̱n Pilatoo̱, 63kó bi̱ katsó:
–Ndi̱a̱, je jaꞌátsjienjne̱ nga kui nda̱ ndisoo̱, bi̱ katsó nga kisꞌijña: Ngije kjo̱a̱ꞌa ján ni̱xtjin kjo̱a̱ꞌáꞌyána. 64Nangíyé ji nga xchindà nga̱tsjo̱ó ngaskande xi ma jaán ni̱xtjin, ngatꞌa̱ tsájmi̱ tsi ta̱ xota̱ tsi̱ꞌe̱ kjo̱e̱ꞌe nga jñoó, sꞌe̱ kjo̱jo yojoo̱, kó bi̱ ka̱tso̱o̱ xota̱ na̱xi̱ńdaá: Jè jaꞌáꞌyaá ngi̱jii̱n xota̱ xi je jesón, kó kui kjo̱a̱ndisoo̱ je ngase, ka̱ma ta̱bo̱a̱jiín xi tjoón.
65Kó Pilatoo̱ bi̱ katsó:
–Tangínjo̱jnú jájún, kó nda nga konda nga̱tsjo̱ó.
66Sꞌe̱ kijí kui jaá, kó askondá nga̱tsjo̱ó, kó ngo ndi̱jo̱je íjñachjaá nga̱ntjo̱a̱ nga̱tsjo̱ó, sꞌe̱ ki̱a̱ kisꞌińdondá jájuún.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014