Kjo̱a̱chaꞌándaseén 4
4
Xi ma nijoón kjo̱a̱chaꞌaá
Nda̱ chji̱ni̱e̱ꞌe̱én Néná
1¡Achichí jè kamá jmá to̱nsinieé!
¡To̱nsinié xi ndaa̱ je ngiti̱ ꞌna̱jín ngase!
Ndi̱jo̱ xi kamándani ndiꞌandikoón
je ta̱jñà kjitji̱e̱n kjiyojo ngayeje ndi̱yàtieé.
2Xotaa̱ na̱xi̱ńdáꞌniú Jerusalee̱n, kui xi ꞌniú ngase kiniꞌántjó
ta̱bo̱a̱jiín to̱nsinié xi ndaa̱,
¡ngotꞌe̱ ꞌne̱ jè ta̱ bo̱a̱ tsí tsꞌén ya xikoó ti̱ji̱í xí tsꞌénda nda̱ xi tsꞌénda ti̱ji̱í!
3Ngaskande cho̱chakaa̱l tsjaá chiki ndií,
ta̱nga ínchjín xí chji̱a̱ni na̱xi̱ńdáꞌniú xí tjóna,
ndajín ngase je kamá ta̱bo̱a̱jiín cho̱ꞌabestru̱#4:3 Cho̱ꞌabestru̱, kuí boá ngo cho̱ xi beꞌé chjo̱o ki̱a̱ ngi̱jin tsomií, kósꞌe̱ ki̱a̱ ꞌbíndo, kó ndasénjín maá tsí ko̱jna̱nié, ko̱jo tsi cho̱ xi ngasee̱ ko̱kján kui chjo̱o. Jmíjín xoò kjo̱a̱kjíntakón, kó tajá xò tsꞌénjo̱ ndií, xikó xoò tsi kuijín tsi̱ꞌe̱. xi ꞌbé nangi kixií.
4Achichí xíndaá ndí xí xi̱xi̱i̱, nga ngaskande na̱je̱n
kisitꞌa ꞌniú má nkꞌaa̱ ngi̱ya tsꞌoa,
Ndí jákjíndí xi̱xi̱i̱ ndyi̱míꞌá nichinie,
ta̱nga nde ngojín xi tsjaá.
5Kui xota̱ xi achichí ndikón tsꞌén iskjinie nichiniee̱,
je ki̱a̱ ngi̱ya ndi̱yàtié tjimáyà ngotꞌe̱ ꞌne̱,
kó kuí xota̱ xi tsajá ńjño koaán#4:5 Ńjño koaán, kuí boá kui a̱sie̱én xí katsꞌénkjién já re xi kisꞌie ngasꞌe̱. ngasꞌe̱,
je ki̱a̱ ngi̱jin xtjié jàn síndo ngotꞌe̱.
6Ngatꞌa̱ kamátsié ngase ni xi ndajiín ki̱a̱ na̱xi̱ńdáꞌniú Jerusalee̱n,
ta̱bo̱a̱jiín jé xí katsꞌén xotaa̱ ki̱a̱ na̱xi̱ńdáꞌniú Sondoma̱,
kui ngi̱ndiee̱ ta̱niján má kiniꞌánkjié,
kó jmí tsi xota̱ nga̱sondiee̱ xi bo̱a̱ katsꞌén.
7Xota̱ xi je kachjeꞌéjin ji kui ngi̱ndiee̱,
tsjie ngase kamá, ta̱bo̱a̱jiín nchꞌaàn,
ko̱jo tiboa ngase kamá ta̱bo̱a̱jiín ntsjeén,
naxórsa̱ ngase kamá yojoo̱ ta̱bo̱a̱jiín koraa̱l,
kó yojoo̱ tsja ngase kisꞌie ta̱bo̱a̱jiín ndi̱jo̱ safiroo̱.
8Ta̱nga ngotꞌe̱ ꞌne̱ je jmá ngase kamá ta̱bo̱a̱jiín ṉchji̱ndi̱i̱,
nde ngiti̱ jmíjín xi beni ki̱a̱ ngi̱ya ndi̱yàtié,
tji̱xi̱ín je kjijonꞌniú má ńdaa̱, jè kixíyà xikó maá ngo chikín kixí.
9Nda ngase kamaá xota̱ xi ki̱a̱ jesón ngi̱jii̱n kjo̱a̱xcha̱án,
ta̱bo̱a̱jiín xota̱ xi jesón kjindiaá, ngatꞌa̱ inda inda jesón kuí,
ta̱ngatꞌanii̱ nga ngiti̱ kasakojiín to xi tsjá tꞌanangii̱.
10Ínchjín xí nda ini̱ma̱a̱, ti̱kuíní xi katsꞌénchján ndií.
Ndií boá xi nichinie katsꞌén.
Bo̱a̱ kjiꞌi kjo̱a̱ni̱ma̱ xi jaꞌatio na̱xi̱ńdáꞌniú Jerusalee̱n.
11Jè jaꞌajenda Néná, ngatꞌa̱ ta̱nisién ꞌniú katsꞌénxchán.
Ítꞌandiꞌí na̱xi̱ńdáꞌniú Jerusale̱n, ngaskande nga kití xó xí kamándani.
12Kisꞌijinjiín re xi chji̱a̱ni tꞌanangii̱, ko̱jo xota̱ xi chji̱a̱ni kui nga̱sondiee̱,
nga kondra̱a̱ na̱xi̱ńdáꞌniú Jerusalee̱n, ki̱a̱ tsꞌasꞌienni nga̱ntjo̱a̱a̱ kui na̱xi̱ńdáꞌniuú.
13Ta̱nga bo̱a̱ kamá ta̱ngatꞌanii̱ jeé jáchji̱ni̱e̱ꞌe̱én,
ko̱jo ni xi ndajín xi katsꞌén já chináꞌmii̱,
kui xi iskjitjón jiín xota̱ xi jmíjéjiín,
ki̱a̱ ngamasien ndi̱yàtieé kui na̱xi̱ńdáꞌniuú.
14Xikoó tsi xota̱ xi ti̱ka̱ nga ta̱xkiya tjimáyà ki̱a̱ ndi̱yàtieé,
achichí jín yajaá, nga nde jmíjín xi mejeén tsꞌénjo̱ ńjñoo̱.
15¡Ti̱xiónboaꞌájnú ngatꞌa̱ xota̱ ndándí jún!
¡Ti̱xiónboaꞌájnú, kó nga niꞌánjo̱jínjnú ji̱n!
Kiꞌmií nga kichaꞌáyàtji̱ngii̱.
Kósꞌe̱ xín tsanga boaꞌá.
Kó ngaskande ngi̱jii̱n xota̱ xi bejín Néná, bi̱ kiꞌmií:
Ngi nijánjín kꞌi̱e̱ mindyion ngasejnú.
16Nga katsꞌénxchán Néná, katsꞌéntsojoboa,
kó ngiti̱ jmí xki̱ tsaꞌajín ngase.
Ngiti̱ kamábendikónjín chináꞌmii̱,
ti̱nde ni̱ma̱jín kamaá xota̱ xi xchaá.
17Jè kjifenda ndyikonjne̱, nga ta̱kjo̱a̱ndaní
nga ndyi̱chiyájne̱ nga tjín xí ko̱síko̱jojne̱.
Ta̱kjo̱a̱ndaní nga ndyi̱chiyájne̱ ngo na̱xi̱ńdá xí ka̱májiín kꞌo̱xiéꞌájne̱.
18Ndyi̱konda chikín chikín nínga mongínjne̱,
tsi̱ꞌe̱ nga ku̱i̱tjásꞌi̱e̱njínjne̱ ndi̱tse̱njne̱,
jè tikón tiña nga kju̱i̱e̱jne̱, jè jatjosón ni̱xtjinjne̱, jè jetꞌani ni̱xtjinjne̱.
19Kui xi ndyi̱mongatji̱ngijne̱, tsá ngase je kamá ta̱bo̱a̱jiín ja̱ xi tjín nkꞌa jàn,
ndyi̱mongatji̱ngijne̱ ki̱a̱ ngi̱jin kꞌijñaá,
kó ki̱a̱ nangi kixií índojne̱ chja̱ya̱.
20Jè kandobá kui nda̱ re xi jaꞌájin Néná,
kui xi katsjájne̱ tjo̱ xi kajnájénjne̱,
kui xi bo̱a̱ kiꞌmíjne̱ nga tji̱nkꞌi̱e̱én boá xi skónjne̱,
kó nga ka̱ma ku̱i̱ndyionjinjne̱ ngi̱jii̱n xota̱ xi kje̱ꞌe na̱xi̱ńdá.
21¡Tsjangatamaa̱, kó tsjangatꞌieé,
ji ndí chjo̱ón Endoo̱n,
ji xi tindyin ji ki̱a̱ nangii̱ Uu̱!
Ti̱ sꞌe̱ kjo̱chó ni̱xtjin nga ku̱i̱tja̱tí ji kjo̱a̱ni̱ma̱ nga,
ti̱ sꞌe̱ kjo̱chó ni̱xtjin nga ka̱machꞌi̱ ji,
ko̱jo ti̱ sꞌe̱ kjo̱chó ni̱xtjin nga tsjáxtí ji nga.
22Ji na̱xi̱ńdáꞌniú Jerusale̱n,
jè jatjosón kjo̱a̱botíjé xí katseꞌeé
kjo̱a̱a̱ ni xi ndajín xi kiniꞌín ji,
nginijánjín kongínjo̱ꞌniuú.
Ta̱nga ji ndí chjo̱ón Endoo̱n,
Néná ko̱tíjeé kjo̱a̱a̱ ni xi ndajín xi kiniꞌín ji,
kó jè tjíꞌbíjñátsijen jée̱.
Currently Selected:
Kjo̱a̱chaꞌándaseén 4: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014