Eklesiastee̱ 4
4
1Kósꞌe̱ ti̱ askotsijen ngiñá an, kó kui nii̱ xi kamábe an: Achichí má xota̱ xi tjíꞌbiniéꞌniuú xá, kuí nga̱sondiee̱, kó kui xota̱ xi bo̱a̱ ndyi̱tsꞌe̱én, kuí boá xi botixómaá, ndyi̱kjandà xotaa̱, kó nde jmíjín xi tsꞌéndájoón. 2Kósꞌe̱ kamábendikón án xota̱ xi je jesoón, ngatꞌa̱ kui xota̱ xi je jesoón tjín ngasee̱ kjo̱a̱tsja, ta̱bo̱a̱jiín xota̱ xi to̱kó síndo ngasee̱. 3Kó nga ja̱koxi̱ kuí xí kji̱e̱ tsenjiín xi ꞌniú tsjátjín ngasee̱, ta̱bo̱a̱jiín kui xi je jesoón ko̱jo xi to̱kó síndoo̱, ngatꞌa̱ kui, kji̱e̱ bejín ni xi ꞌniú ndajín xi kjima kui nga̱sondiee̱. 4Kó ti̱ kamábe an nga ngayeje xá, ko̱jo ngayeje ni nda xi niꞌaán, nga kuí boá xi ma onkonni xotaa̱. Kó kui nii̱, ti̱ ta̱kjo̱a̱ndaní bo̱a̱ nga, kó ta̱ tsꞌénboa tsíná. 5Xota̱ xi kitikjo̱a̱a̱ bókjojó má tsja nga ꞌbíjñá, kó ti̱kuíní bo̱a̱ xi tsꞌenkjié soboá yojoo̱. 6Ndakjiꞌi ngase nga chiboa ni kꞌuiéná, kó nga si̱ꞌankjaꞌyá chií, ta̱bo̱a̱jiín nga tsie ni kꞌuiéná, kó ta̱soboá si̱ꞌanxá ñá, ngatꞌa̱ ta̱ kjo̱a̱boa tsí boá, kui nii̱.
Tsi kꞌuíkjo yojoná, kꞌuié ngasená ngaꞌniú
7Askotsijen an ingo ndiè, kó ti̱ kamábe an ngo ni xi ta̱kjo̱a̱ndaní bo̱a̱ xi niꞌán kui nga̱sondiee̱: 8Kamábe an ngo nda̱ xi tikón soboá, xi jmí ndíjiín ko̱jo xi jmí ntsꞌi̱e̱jín, kó ngatsjéni̱xtjin nga tjitsꞌénxá, kó jmíni̱xtjin nga bo̱a̱ kjiꞌi kamánii̱, ta̱sá ꞌniú ngase kamámejeén nga tsie ngase ni kꞌuieé. Kui nda̱a̱ jmíni̱xtjin bi̱ tsꞌén tsꞌénkjó: ꞌYá xí tjítsꞌenxáñáa̱. Kó míkjo̱a̱a̱ nga tsꞌénmejée̱n ini̱ma̱na ni xi ndaa̱. ¡Ta̱kjo̱a̱ndaní bo̱a̱ kui nii̱, kó chꞌià é boá!
9Chjí ngasenii̱ jó xota̱, ta̱bo̱a̱jiín tsi ta̱ ngo tsí, ngatꞌa̱ ndakjiꞌi ngase ni xi sa̱ko̱ó kjo̱a̱a̱ xaá ngajoó. 10Ngatꞌa̱ tsi ngo kꞌo̱ka, xi ingoo̱ skjinínkꞌá, ta̱nga, ¡xi̱xꞌi̱a̱n xò xí ngo tsí maá! Ngatꞌa̱ kjiꞌanga kꞌo̱ka jmíjín xi skjinínkꞌá kuí. 11Kó ti̱ tsi jó má xi nijan kjoyójo, ja̱kꞌi̱e̱ ja̱ngaján sa̱ꞌínꞌasoo̱ xkjín, ta̱nga, kótsꞌèn sa̱ꞌínꞌasoo̱ yojoo̱ kui xi ngo tsí maá. 12Tsi ngo tsí má ngo xota̱, ka̱ma si̱ꞌaa̱n, ta̱nga tsi jó má, ka̱márií kꞌo̱xiéꞌá yojoo̱, ńꞌniú xí ján kjikjonii̱ tsájín tindsó.
Kjo̱a̱xo̱ngò ko̱jo kjo̱a̱kjínkón
13Chjí ngasenii̱ ngo nda̱ xo̱ngò xí ni̱ma̱ xi jmí to̱njiín, ko̱jo xi kjínkón, ta̱bo̱a̱jiín ngo nda̱ re xi xchá, ko̱jo xi kitikjo̱a̱ xi mejénjiín nga ku̱i̱ntꞌie̱é ngo kjo̱a̱botíxoma, 14ngatꞌa̱ kui nda̱ xo̱ngò xí kjínkoón, ndatsi ni̱ma̱ nga katsen ki̱a̱ nínga botixómá kui nda̱ re xchá xí kitikjo̱a̱a̱, kó ndatsi ndo̱bo̱a̱yà kjo̱tjoni, ka̱márií nga kui xi ko̱tíxoma ngajoo̱ kui nda̱ ree̱, 15kó kamábe an ngayeje xota̱ xi síndo kui nga̱sondiee̱ nga ki̱a̱ nijan tjimájo̱ kui nda̱ xi ko̱tíxoma ngajoo̱ kui nda̱ ree̱. 16Kó ndatsi achichí kamá xota̱ xi ki̱a̱ kijítji̱ngii̱, ta̱nga kui xota̱ xi jaskan kꞌuieé, ngiti̱ tsjajín ka̱maa̱ kjo̱a̱a̱ kui ree̱. Kó kui nii̱ ti̱ ta̱kjo̱a̱ndaní bo̱a̱ nga, kó ta̱ tsꞌénboa tsíná.
Currently Selected:
Eklesiastee̱ 4: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014