Eklesiastee̱ 10
10
Kje̱ꞌe ngase énkjínkón
1Xikótsꞌèn nga chisien xi je kꞌiee̱n kuí boá xi tsꞌénkjátsón ndásíje̱n xi kui soboá soboaá, bo̱a̱ tsꞌén ngo kjo̱a̱chi̱ni, ndajín tsꞌén tsꞌénkꞌijñá ngo nda̱ xi kjínkón ko̱jo xi yandikón. 2Ini̱ma̱a̱ nda̱ xi kjínkoón ni xi nda boá xi mongase nga tsꞌén, ta̱nga ini̱ma̱a̱ nda̱ xi kitikjo̱a̱a̱, ni xi ndajiín boá xi mongase kui. 3Xota̱ xi kitikjo̱a̱a̱ jmí kjo̱a̱kjíntakónjiín, nga ngaskande ndi̱yà nínga foaꞌa bokó nga xota̱ chi̱ni boá.
4Tsi nda̱ xi botixómaá sa̱ꞌínxchánjo̱o̱, ngata̱ ꞌbíjñímasínjín ji xáa̱. Kjo̱a̱chiyákjo̱a̱a̱ boá xi tsꞌénkjáꞌajenda ni xi ndajín xi niꞌaán.
5Ingo ni ngase xi je kamábe an kui nga̱sondiee̱ xi kixi̱jín mána an. Kuí boá ni xi ndajín xi tsꞌén xota̱ xi botixómaá: 6nga xota̱ xi kitikjo̱a̱a̱ boá xi boeꞌeé ngo xá xí nkꞌa, tji̱e̱nga xota̱ xi cho̱o̱n, xá xí ngindie boá xi boeꞌeé kui. 7¡Kamábe an nga xota̱ xi mosoo̱, ndi̱je̱ síndosoón, kó xota̱ xi botixómaá, tjimáyise!
8Xi sa̱ꞌínda ngo ti̱xa̱, ka̱márií nga ki̱a̱ kꞌo̱kayà.
Xi ko̱kján ngo xó, ka̱márií ye̱ skji̱ni̱e̱e̱.
9Xi ngo ndi̱jo̱o̱ ko̱kján, ka̱márií sa̱ꞌínꞌoón.
Xi bokján chikiín, ka̱márií ku̱i̱je̱nꞌon.
10Tsi ngiti̱ si̱ꞌanyojójín jachaa̱,
tsie ngase ngaꞌniú ko̱e̱je̱jo.
Tsi nda si̱ꞌan ngo ni, nda ngase tsꞌén si̱ꞌankjién kjo̱a̱kjínkoón.
11Tsi skji̱ni̱e̱e̱ ye̱e̱, nda̱ xi tsꞌénxájo̱ ye̱e̱,
nde jmí ni chjíjiín kui nda̱a̱.
12Achichí tsjá máná én xí chji̱a̱ nda̱ xi kjínkoón,
ta̱nga ni xi chji̱a̱ tsꞌoa nda̱ xi kitikjo̱a̱a̱, ti̱kuíní yojoo̱ xi tsꞌénchájá.
13Nda̱ xi kitikjo̱a̱a̱ nga ꞌbítsi̱yanii̱ nga chji̱a̱, én kitikjo̱a̱ boá xi chji̱a̱,
kó nga fetꞌanii̱ ni xi ta̱tsóta̱má boá xi chji̱a̱.
14Nda̱ xi kitikjo̱a̱a̱ achichí kjín én xí chji̱a̱,
ndatsi nde ngojín xi be mí ni xi ka̱ma,
ti̱nde ta̱ꞌyajín xi ka̱tso̱yaa̱ ni xi jaskan ka̱ma.
15Ndatsi ta̱ chií sa̱ꞌínxá xota̱ xi kitikjo̱a̱a̱, achichí fenda,
nga ngaskande nde ngiti̱ bejín
ndi̱yà xí fí xtji̱e̱e̱n na̱xi̱ńdáꞌniuú.
16Xi̱xꞌi̱a̱n xò na̱xi̱ńdá nínga ngo nda̱ xo̱ngò botixómá,
ko̱jo nínga xota̱ xi botixómaá achichí ta̱jñóyà ndyi̱tsꞌèn sꞌué.
17¡Ta̱nga achichíra̱ tsjaa̱ ngo na̱xi̱ńdá xí ngo nda̱ xi yandikón tsꞌénbotixómaá,
kui xi kuí má chi̱bo̱a̱a̱ nga kjinie nichinie,
tsi̱ꞌe̱ nga sakóngáꞌniuú yojoo̱, kó jmí tsi kjimachꞌi̱!
18Ta̱ngatꞌanii̱ kjo̱a̱tsiꞌeé nga kꞌo̱ka nkꞌaa̱ ndiꞌaa̱,
ta̱ngatꞌanii̱ kjo̱a̱tsiꞌeé nga ku̱i̱ti̱n ngayeje ndiꞌaa̱.
19Paa̱n boá xi cha̱n chiniená,
kó binoo̱ boá xi tsjáná kjo̱a̱tsja nga tindyión nga̱sondie,
kó to̱o̱n boá xi mejennii̱ ngayeje nii̱.
20Ngata̱ ndokjo̱e̱taꞌínjín ji,
ko̱jo ngata̱ ndajín tsꞌén niꞌínkjé jí kjo̱a̱a̱ nda̱ ree̱,
ti̱nde ngata̱ chꞌójín sée̱ nda̱ cho̱o̱n
kjiꞌanga ki̱a̱ tindyin ji ngi̱yaꞌmàa̱,
ngatꞌa̱ fítji̱e̱n eén xikoó tsi ni̱sie xi tjín nkꞌa jàn,
kó ngayejee̱ kui nii̱, ngo xi tjiín nga̱ ka̱tso̱yà.
Currently Selected:
Eklesiastee̱ 10: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014